قصيدة بجميع قبائل مملكتنا الحبيبة السعودية

قصيده بجميع قبائل المملكة العربية السعودية<<<<<< والنعم

بالله يا خالق أراضين وابحار **** الواحد المعبود رازق عبيده

الخالق الغفار علام الأسرار **** وفرق شعوب الأرض في كل يده

وابدي واسولف من عذيبات الأشعار **** أبيات شعر والمعاني وكيده

اشري وأبيع واعرف كيف بختار **** واختار من جزل البيوت الفريدة

واذكر تراث وعز وأمجاد وافخار **** قبائل تومن بدين وعقيدة

وصلت حضارتنا على سطح الأقمار **** ابنا الجزيرة والجزيرة مجيده

في ظل حكام لهم فعل واشوار **** آل السعود اللي تفك الضهيده

نسل الزعيم الحاكم العادل البار **** مجدد أمجاد الجزيرة بجيده

حتى أصبحت حره وحنا له أنصار **** في ظل اخو نوره هنوف سعيدة

وصارت لابو تركي بطوله وتذكار **** والفخر والأمجاد تبقى شهيدة

وخلف لنا املوك لهم فعل وأخبار **** الشعب واحد والقيادة رشيدة

والأمن بانينه على ساس وجدار **** وقرو على العابث عقوبة شديدة

وحنا حماة الدار من كل غدار **** وما همنا بطشه وخبثه وكيده

قبائل ما لحقناهم اوعار **** وعشنا بهذي الدار عيشه رغيدة

والحمد لله نحمده سر واجهار **** شعب تكاتف من سنين مديدة

ودون الوطن جيش على كل معبار **** لا رفرف البيرق ونادى عقيدة

بشرق البلاد وغربها دوم حضار **** وارض الشمال اللي نفوده مديدة

وارض الجنوب اللي تخيضر بالأشجار **** جزيرة فيها القبايل عديدة

ارض بها قحطان وافين الاشبار **** وياعز منهم بالشدايد بسيده

واذكر عتيبه يوم للطيب مغوار **** لا ثارت الهيجا وقرب ضديده

وشمر هل الطولات والجود مقدار **** اهل الكرم واهل الفعول الحميده

وقوم اعنزه مروين الاخصام الامرار **** أولاد وايل من عصور عهيده

ومطير قوم تكرم الضيف لا زار **** ويا ويل خصم في حراهم وعيده

واذكر قبيلة حرب يانعم الاخيار **** وتاريخهم يحكي سطور مجيده

وسبيع نعم القوم ووجيه الاسفار **** زبن الدخيل ليا زبن من طريده

واذكر قبيلة يام والطيب يندار **** اهل العلوم الوافيه والرشيده

ثم الدواسر تجعل الخصم منهار **** عيال زايد عز منهم سنيده

ثم السهول اللي لها الطيب مدرار **** وعن منهج العادات ماهي محيده

ثم اذكر العجمان حماية الجار **** والمرجله والجاه فيهم عتيده

واذكر بني مره طويلين الاعمار **** ما ينقد المري ولا له نقيده

ثم الهواجر لابة تقدح النار **** اهل الركاب اللي خطاها بعيده

واذكر بني خالد قبيلة وامار **** قوم لهم في المجد قول ورصيده

وبني تميم اللي لها الطيب مصدار **** بني تميم وكل فعل تجيده

ثم الزعوب اللي بها الخصم يحتار **** شجعان ما ترضى سوا ما تريده

العازمي وافي وفي الطيب بيطار **** روحه على كل المصاعب صميده

ثم الظفيري في المصاعيب جبار **** والطيب والامداح بأصله وطيدة

ثم اذكر الأشراف بجلال وإكبار **** أهل الحجاز اللي تفك الزهيدة

ثم الهذيلي له مواقف ومندار **** راعي الفخر راعي العلوم السديدة

ثم البقوم اللي لهم جيش وامهار **** ريف الضيوف ليا لفاهم وليده

واذكر ثقيف اللي لهم مجد وآثار **** ومهما حسبنا من كلام نعيده

وبلحارث أهل العز بشهود واقرار **** ا لحارثي ياطيب فعله وجيده

والمالكي معروف لا صار ما صار **** في موقف اهل الطيب يبذل جهيده

واثني تحياتي عدد وبل الامطار **** على سليم وكل خصم تكيده

واذكر جهينه هل مواقيف وادوار **** تلقى الجهيني راسم الطيب بيده

واذكر بلي والمجدله فعل واظهار **** وتاريخهم يحكي فعول فريده

وبني عطيه في المواجيب حضار **** قوم بوقت الجد قوم عنيده

ثم الحويطي والكرامه له اشعار **** ثم الشراري له فعول مفيده

ثم الرشيدي في الصعيبات صبار **** على علوم الطيب فعله يزيده

وباقي جنوب الدار والقاف مادار **** باقي على قلبي كلام واشيده

زهران نعم القوم في وقت الاضرار **** والخصم عينه من لقاها سهيده

والغامدي معروف له عزم واصرار **** راعي المراجل والعلوم المفيده

وشمران قوم والجمايل لها اطوار **** وبلقرن سم للقلوب النكيده

والاكلبي والمحلفي مابعد بار **** والحارثي طيبه وفعله يشيده

وبني شهر وبني عمر سيف بتار **** قوم على الاخصام نار وقيده

والاسمري والاحمري صيتهم سار **** بين القبايل والمواقف شهيده

واذكر عسير الهول ذربين الاذكار **** وابها احتموها فالسنين الشديده

وادهم والصيعر على حد الاقطار **** يحمون حد الدار من اللي يريده

وامشي مع الساحل مع جمله افكار **** رسمتها والطير زان اتغريده

وانزل على جيزان تاريخ واديار **** ورجال فيفا والقبايل عديده

وارجوا العذر واهل المواجيب عذار **** الي نسيته مانذكر في القصيده

الواهبي عدد ابيوته بالأدوار **** من شاعر ماشل قلبه حقيده

شهران ربعي هم هل المدح والكار **** واهل الكند واهل السيوف الجديدة

يوم البلد ما يامن الزند لا ثار **** زيزومنا ابن مشيط نعم الوليدة

فالجهل شجعان وفي السلم تجار **** من بطن بيشه للتهم لارفيده

حبيت أبين موقفي بين شعار **** وارجوا سموحتكم على ذا النشيدة

ماحب أنافق واتعنصر تعنصار **** ولا ني باطيع أهل العقول البليدة

ما كل من طب البحر قيل بحار **** وما كل من شل الفشق جاب صيده

فالشعر بستان به ورد وأزهار **** واللي تعداها بيوته فقيده

وأقولها في الشعر تكرار وامرار **** ظرف بلا عنوان يلغى بريده

وبعض السوالف له مواقف ومحضار**** وشعر بلا معنى لزوم نبيده

وصلوا على المرسول شفاع الأبرار**** محمد الهادي وقدوة عبيده



اتمنى اشوف ارائكم

اسير الحب