والله زمن
صارت فيه اللومينا أحسن من الأكورد العريقة
المهنا بيك ، ودي أرد عليك ردود عقلانية
اولا ، من تجربتي الشخصية للكابرس SS موديل 2004 ، رحت أجربها ، مشيت في شارع رئيسي ، كنت أمشي 100 تقريبا ، طلع علي هندي بسيكله ، ضربت فرامل وزحفت السيارة معي ، بصراحة توحشت مررررة ، بينما في الأكورد كم مرة أمشي على سرعة 160 تقريبا ، ومسرع عشان ألحق على الإشارة ، وتصير حمراء ، وأضرب فرامل ، وتوقف زي الحلاوة ، والله لا تزحف ولا تقول حاجة
مع العلم إن جنوط الأكورد 16 تقليد ، وجنوط الكابرس 17 أو 18 جنط وكالة
ثانيا ، نظام الأمان في الأكورد تقول خايس مرررة
طيب خلني أقول لك ، الأكورد أردى نوع يجيك فيها 2 إيرباق مع فرامل ABS وهيكل ممتص للصدمات ، أوكي !!
اللومينا أردى نوع ما يجي فيها إيرباق أصلا ، وهذا الكلام من الوكالة لموديلات 2005 ، اللي أعلى منها يجي إيرباق واحد ، ثم إيرباقين وهكذا حتى توصل للـ LTZ الفل كامل تصير 4 إيرباق ، بس هذي سعرها فوق 80 ألف أو يمكن قريب من 90 ألف
طبعا ، كل الكلام عن الإيرباق إذا كان يعمل بكفاءة وجودة ، مع إن المشاهد إنه ممكن يسوي لك مشكلة ، واحد من زملائي صدم ومعه زوجته حامل ، وكان هو رابط حزام الأمان ، ولا طلع الإيرباق مع إن الحادث كان بوجهية اللومينا ، ومات الجنين وكان في الشهر التاسع ، طيب وين الـ 4 إيرباقات اللي تتكلم عنها ، مع العلم إن سيارته LTZ ؟
وأنا بنفسي شفت لومينات عند العيسى ، كلها مصدومة ومضوبة مع الوجه والله ما طلع الإيرباق ، وش رايك
بالنسبة للرساوة من تجربتي مع الكابرس - لاحظ إنها SS يعني رياضية - ما تفرق كثير عن الأكورد ، أجل كيف لومينا عادية مو رياضية ؟
تقول إن الـ 4 سلندر عيب ، ههههههه ، والله شي غريب ، الحين كل يوم بيصدمك واحد ويهرب ولازم أن تطرد وراه :D
وكل يوم لازم تطرد ورا أحد
وكل هذا أهم من الاقتصاد في البنزين
والله العظيم ، ما أشوف إني محتاج الـ 6 سلندر أبدا ، بالعكس سيارتي تجيب 220 ، وتسارعها جيد ، يعني وش تبي بالستة سلندر ، بالعقل
وإذا صار اهتمامك أنت بالقومات والمطارحات فهذا شي ثاني ، لكن على حساب صرفية البنزين ، لأن اللي يشتري أكورد بيعبيها بـ 45 إلى 50 ريال وتمشيه داخل المدينة 500 كيلو على سرعات عالية ، وبالسفر تمشيه 700 كيلو على سرعة 150 تقريبا
وإذا كان عيب الأكورد إنها 4 سلندر فعيب اللومينا قيرها 4 سرعات ، بينما الأكورد 5 سرعات ، يا عيني على هدوء وراحة المكينة ، صدقني ما تحس إن فيه مكينة أصلا :D
الأكورد نص فل وفل كام يجي فيها فحتة ومثبت سرعة ، وفخامتها ما تصف جنبها اللومينا ، بينما اللومينا يمكن يجي فيها فتحة ويمكن لا ، أصلا الأكورد السياحي يجي فيها فتحة ، فما بالك بالنص فل والفل
شكل الأكورد الداخلي وطبلونه أفضل بكثيير من اللومينا ، والكل يشهد على ذلك ، يكفيك طبلون LED ، بالإضافة إلى إن مرآة السائق الوسطية تجي عاكسة للنور ، واللومينا ما يجي إلا فل كامل وبالقوة بعد :D
وبعدين ، جب لي واحد انسرق مسجله ، أصلا مسجل الأكورد ما يركب إلا على الأكورد وش بيستفيد منه اللي بيسرقه ، وبالنسبة للجنوط البي إم واللكزس LS انسرقت جنوطها في شمال الرياض ، فما بالك عاد بالأكورد واللومينا
بعدين ، كيف بتكون حماية الجنوط ؟
تقول يا مهنا بيك
طبعا ما يخفى عليك ان هذه السياره معظم اللي يسوقونها شباب توهم مالهم بالسايقه ذيك الخبره ويسرعون سرعة خياليه
والأكورد مين يسوقها ، يمكن شيبان :D
الأكورد انتشرت بشكل أقوى من اللومينا ، وأكثر اللي ياخذونها شباب ، وللأسف صاروا يفحطون فيها ، ومع ذلك قليل تحصلها في التشليح ، على عكس اللومينا ، طيب إيش الفرق ؟ اترك الجواب لك :)
من المميزات اللي تتميز بها الأكورد عن اللومينا إن الأكورد تمسك سعرها بشكل خيالي ، الآن في المعارض موديلات 2003 ما تحصلها بأقل من 45000 السياحي ، وسيارتي انسامت بـ 50 ألف قبل فترة ، وهي مصدومة وماشية 80 ألف وقت السوم ، لكن شف كم أسعار اللومينا
من المميزات ، مكيف الأكورد فيه تحكم بالحرارة مزدوج ، للراكب تحكم وللسائق تحكم ، بينما في اللومينا تحكم واحد للراكب السائق
وفيه نقطة أحب أتلكم عنها ، ليش اللومينا والكابرس مصممة للخليج فقط ؟
لو هي سيارة ناجحة كان نزلت عندنا باسمها الأصلي ، وكان نزلوها في غير دول الخليج
تتميز الأكورد عن اللومينا بالفخامة الداخلية ، إذا فتحت الدرج نزل بشكل هيدروليكي ، مو يضرب تحت زي اللومينا ، وكذلك مساكات اليد اللي في السقف ، في الأكورد تلاحظ إنها ترجع بشكل هادئ وفخم مثل اللكزس ، بينما الكابرس رويال تشوف المساكة تضرب في السقف ولا كأنها سيارة فخمة ، فما بالك باللومينا
وكالة الأكورد عبد الله هاشم ، والله لا العيسى ولا الجميح يصفون جنبه ، ولا يصفون جنب جزء من خدمات عبد الله هاشم ، وهذا من تجرتي أنا ، صحيح إن قطع الهوندا غالية ، لكن إذا كانت السيارة تحت الضمان فتأكد إن كثير من القطع الاستهلاكية بتتغير على حساب الشركة ، مثل الفحمات ، هذا غير الفحص المجاني السنوي والخصم اللي عليه وهو 20 % لأجور اليد وقطع الغيار ، غير خدمة تغيير الزيوت واللي تأهلك لعمل تربيط مجاني للسيارة ، غير التقيد بالمواعيد ، وغير إن السيارة ما تجلس عنهم أكثر من يوم ونص ، لكن العيسى تجلس السيارة عنده 10 أيام عشان تغيير فحمات ، وفي النهاية ما يصلحونها زي الناس !!
والجميح أردى وأردى
تتميز اللومينا بأشياء لا تهمني أنا ، مثل المكيف الخلفي ومكينة 6 سلندر غبية ، ما تحسنت إلا في 2005 ، والوسع مع إنه ما يفرق كثير ، وراحة المراتب فقط ، لكن باقي الأشياء فالاكورد ولا شك أفضل ، أصلا وش جاب الخروف الاسترالي للعملاق الياباني
في النهاية ، الأكورد سيارة عريقة جدا ، من شركة قوية معروف قدرها وقوتها بين شركات السيارات ، هوندا اسم غني عن التعريف ، ومما يدل على نجاح الأكورد إن الجيل هذا يعتبر الجيل السابع لها ، وكل جيل يتطور عن السابق بشكل رهيب ، وعند مقارنة الأكورد بالكامري والألتيما والباسات والزوم في أكثر من موقع عالمي فارزت الأكورد بالمركز الأول ، لاحظ إنها تفوقت على الباسات
كلامي مبعثر وغير مرتب ، وأنا من يوم قال لي راعي اللومينا الـ LTZ الكلام اللي قلته في الرد الأول وأنا أنصح كل واحد بالابتعاد عن اللومينا والاتجاه للأكورد أو الألتيما
وأرجوا إنكم تعذرونني على سوء الترتيب
