تأسيس ورشة لو مساحتها 300 متر راح تكلفك فوق 400 الف ريال سعودي
الورش تأسيسها مهب رخيصة لو تسوي عزل ارضي للزيوت بس ذا بيكلفك 40,000 ريال
غير أدوات السلامة اللي تطلبها منك الدفاع المدني إلزامي مثل صفارات الانذار و رشاشات الموية للطوارى لو صار حريق فاسمح الله هذه تكلفتها 35 الف ريال !!!
انا كنت بأخذ ورشة لقطة لكن ماكتبها الله بمبلغ اقل من 300 الف ريال ومساحتها مع الشارع 1200 متر فيها 10 أقسام من المتدنية ترصيص اطارات لين الصيانات المكلفة مثل سحب الشاصي الله يبارك لراعيها اللي اخذها ماشاء الله تبارك الله نظامها كراجات
اذا سويت دراسة جدوى لمشروع ورشة جاني تاجرين والثالث كان باب رزق جميل شرحت لهم كل شى وطلبوها مني الجدوى رفضت أسلمها لأحد منهم تعبي مايستفيد منه احد مع محاولات للوعود اغلبها كاذبه حتى باب رزق جميل شافني مصر على عدم تسليمها قال ماراح ندعمك الا ب 60, الف ريال وانت دبر الباقي
مع الاختصار وبدون ذكر التفاصيل
اذا انت بتقعد وتهتم بالورشة اعلمك راح تكسب منها اذا بتفتح ورشة وتسلمها لأحد يديرها فهي خسارة عليك ولا تستفيد الا الشى القليل
لكن بسالك انت تفهم بالميكانيكا او انظمه الميزان او توضيب المحركات والنواقل او معرفت خلل كهربائي مهب شرط تشتغل بيدك بس يكون عندك خلفيات لهذه الأمور وانت تجلس بالورشة تدير حلالك ...
لكن تبي الشور افتح لك مركز متوسط الحجم يعني اشتغل بالصيانات الخفيفة وتراها مربحة ولا راح تكلفك الشى الكثير غير تأسيسها و أجارها اذا هي سنوية او ست شهور على حسب الاتفاقيات
افتح مركز متخصص للميزان فقط يعني وزن إذاعة ترصيص اطارات تغير فحمات تغير مقصات بالاشياء هذه وكلها كم رافعة وجهاز ترصيص ومعدات و حفرة للميزان تكلفك هذه تقريبا 220-280 الف ريال غير سعر أجار المحل على حسب المكان والموقع
رواتب العمال من بين 3000-4000 ريال مع اعطائها نسبه بسيطة علشان يشتغل لك بذمه من بين فترة لفترة هذه النسبة لتحفيزه اذا انت بالسعودية احسب تكلفة العامل الواحد من بين 400-600 ريال تدفع شهريا للدولة بسبب العمالة الأجنبية
اذا وضعك المادي كويس وتبي تفتح ورشة انصحك بنظام الكراجات هذي تضمن سيارة اللي يصلحها عندك ويكون شغلك بالسليم مهب عشوائية مثل بعض مراكز وصناعيات اللي عندنا بالرياض مثل ام الحمام و الصناعية القديمة كلها شغل عشوائيات ولا عنده شهادة ميكانيكا والشغلة كسبها من الخبرة ولا يعرف يصلح كل السيارات أو شف لك مركز للتقبيل بسعر معقول وشكلة مقبول توفر عليك الكثير مثل ارضية عزل الزيوت وانظمة الدفاع المدني الاجبارية
موفق ان شاء الله
