السلام عليكم
لي فترة ابي اكتب هالموضوع عشان الكل يستفيد وفولفو من الماركات المظلومة بالخليج واغلب اللي يتكلمون عليها ما عمره ركبها فما بالك انه قاعد ماغير يسفل بالسيارة من دون اي تجربة او علم
المهم خلونا نخش بالموضوع على طول لأني ما أعرف اسوي مقدمات.
راح اكتب لكم تجربتنا مع الفولفو S80 موديل ٢٠٠٩ بعد ممشى وصل ل ١٠٠،٠٠٠ كم وكيف كانت معنا طول هالمدة
قبل ما أبدأ راح اعرف على السيارة بشكل بسيط فولفو S80 موديل ٢٠٠٩ ستة سلندر ٣.٢ لتر ٢٤٠ حصان وقير ٦ تعاشيق السيارة طلعت من الزاهد الوكيل السابق لفولفو ووكيل رينو حاليًا.
السيارة حاليًا ماشية حدود ١٠٠،٠٠٠ كم
طبعًا فولفو ماركة ما تحتاج تعريف سويدية وسياراتها من أأمن السيارات اللي تمشي الشوارع.
الفولفو الS80 تعتبر سيدان متوسطة الحجم ويقولون انها تنافس المرسيدس الإي كلاس والاودي A6 ومن هالفئة رغم اني اختلف معهم صراحة
السيارة خارجيا شكلها ممل وعادي جدًا هذا رأيي الشخصي. من الداخل المواد المستعملة ممتازة جدًا والخشب المطفي يعطيك لمسة فخامة رائعة والجلد الداخلي جودة عالية وصامد الى هذي الفترة بشكل ممتاز رغم الإهمال فيه نوعًا ما.
السيارة موديل ٢٠٠٩ فما لحقت على التقنيات الجديدة لفولفو مثل السيتي سيفتي سيارتنا غير متوفرة بإختيارات النقطة العمياء ومثبت السرعة المتفاعل(الرادار) او نظام الملاحة( مع انه سيئ فالحمدالله انه غير موجود:1::)
السيارة تعليقها مريح جدًا واتعب وانا اقول اني ما اتوقع ركبت سيارة براحة تعليقها المطبات والحفر وتعرجات الطريق ما تحس فيها بشكل كبير، ازعاج الهواء قليل تحت ١٦٠ اكثر ازعاج ممكن تسمعه هو الكفرات نوعاً ما مب ذاك الزود لكن على حسب الكفر والطريق ممكن يقل بشكل كبير.
المكينة عزمها ممتاز بالرغم من وزن السيارة العالي اللي ما يساعد لكن تسارعها جيد جدًا
كأي فولفو وسيارات فولفو معروفة انها مملة بالقيادة وهذي السيارة ليست استثناء مهما تحاول تلعب معها في المنحنيات راح تحاول ترجعك بشكل مستقيم ما ادري كيف بس شعوريا تحس السيارة تقاومك انك تحاول تستمتع فيها وشي عادي متعة قيادتها مهو اكثر شي يجذب زبائنها.
وأكثر شي يفسد متعتها هو قير السيارة بكل صراحة القير جدًا سيئ خصوصاً في اوقت الزحمة والوقوف التسارع المستمر بطئ وتحس بكل تعشيقه وغير سلس في المدن
ممتاز جدًا في الخطوط لكن سيئ جدًا داخل المدينة.
صرفية البنزين معقولة.داخل المدينة الصرفية ترتفع بشكل رهيب واتوقع يعود للقير السيئ بس صرفيتها تقل بشكل كبير اذا مسكت لك خط.
الجودة الداخلية ممتازة جدًا مافي اي قربعه او اصوات ديكور رغم كل هالمدة ممكن تسمع في اوقات المواسم لكن قليل جدا وبالراحة تتغاضى عنه واغلب الأحيان اكتشف انه اغراض نسيتها قاعدة تتحرك وتسوي صوت:23:. النظام الصوتي بالسيارة صراحة مبهر وجودته عالية بالرغم من انه السماعات القياسية.
بالنسبة للأعطال ! طبعا اتوقع مدة اكثر من ٧ سنين و ١٠٠ الف كم مدة كافية انك تتعرف على جودة السيارة واعتماديتها بشكل كامل بس قبل لا أبدأ بالأعطال خلوني اتكلم عن الصيانة وتكاليفها.
من شرينا السيارة ومحافظين على الصيانة الدورية في الوكالة ! (عزيزي اللي مدرك السيارات وما تصرف شي الصيانة اكثر بكثير من مجرد تغيير زيت وسيفون )
صيانة السيارة كل سنة او ١٠ الاف كم ايهما اسبق وبالعادة السنة تخلص ما تكمل ١٠ الاف بالنسبة لنا.
القطع الاستهلاكية مثل الزيت والقماشات والفلاتر اسعارها معقولة جداً لكن اللي يخلي الفاتروة مرتفعة اجور اليد بالوكالة:26: بعض الأحيان تصير اغلى من القطعة نفسها. القماشات تكلف اقل من الف ريال بس اجور اليد حدود الألف!
لكن القطع تعيش مدة ممتازة صراحة يعني ما يحتاج تغير القماشات كل ٣ شهور او المساعدات كل سنة ( على فكرة الا الآن المساعدات ما غيرنها، مع ان المساعدات الامامية خلاص شكلنا بنغيرها قريب انتهى عمره)
الأخوان بالوكالة نويل ومنير جدًا محترمين وحليلين والسيارة اذا احتاجت صيانة ندخلها الصبح او الظهر وتخلص اخر الدوام الساعة ٥ وبعض الاحيان قبل وما يحتاج موعد ولا هم يحزنون الشي الكويس بالماركة الغير منتشرة صراحة، تكاليف الصيانة كانت تتراوح ما بين ال١٠٠٠ وال ٣٠٠٠ ريال حسب العمل والقطع والممشى ما قد تجاوزت ال ٤٠٠٠ ريال
بالنسبة للأعطال:
الحمدالله السيارة جودتها جدًا ممتازة وما تعطلت علينا ولا قد خرب شي كل هالمدة والممشى والله الحمد يعني حتى انا فاجأتني بجودتها صراحة بالرغم من كل الكلام السيئ في المنتديات وانها سنتين وتشليح ومن هالكلام.
ما خرب علينا الا شي واحد التكييف قبل فترة بسيطة اقل من ثلاث شهور هي قبلها بمدة سنة او اكثر يمكن الكومبريسر كان يطلع صوت ووديناها الوكالة وخوينا نويل وقال ان فيه مشكلة بالكومبريسر ويحتاج تغيير بس انه شغال تمام وبارد مافيهه شي غير الصوت فقال يمديكم تغيرونه الحين او تخلونه لين يقضي عمره فقررنا نخليه طبعا بعدها بهالفترة نكبنا التكييف صار يشتغل ويطفي وبدأ يخرب وديناه له وطبعا لازم يتبدل لأن انتهى عمره فمع التصليح قال انه لازم نغير الكومبريسر والثلاجة وطبعا كانت ضربة بس شغل اليد كان تقريبا ٢٠ ٪ من القطع بصراحة اجر اليد كان رخيص مقارنة بالشغل اللي سواه بدل الكومبريسر والثلاجة كلها وكذا شي القطع كلفت تقريبًا ١٠ الاف كومبريسر وثلاجة وصمام وفريون واشياء ثانية واجر اليد كانت ٢٠٠٠ مع المكاسر وزباينهم حنا ويعرفونا المجموع كان ١٢ الف بعد المكاسر وصلناها ٨٠٠٠ بالبداية قال ١٢ وبعدين قال بسوي خصم وخلاها ١٠ الاف وبعدين كاسرناه زيادة ووصلت ٨ الاف ويوم جينا ندفع طيحناها ل٧٥٠٠ :3:::3:: ولأنهم كانوا خلاص بيسكرون وبيفتح الوكيل الجديد زي ما تعرفون فكان السعر وداعية زي ما تقولون فدائما لا تمشي مع اول سعر . السيارة اخذت تقريبا يومين او ثلاثة بهالحدود. طبعا لما دخلت كانت وقت الصيانة الدورية ايضًا ف بما اننا دخلناها بفاتورة كبيرة عطانا الصيانة ب ٤٤٠ ريال وسواها مع بعض وهي بالاصل كانت الف و شي، المهم انه هذا كان الشي او المشلكة الوحيدة اللي صرفنا فيه وخرب بعد كل هالمدة بإستثناء الصيانة الدورية. وانا اشوف شي ممتاز مقارنة بالسمعة اللي يقولونها عن السيارات الاوروبية وفولفو
كملخص:
السيارة جدًا مريحة وهادية وراكدة طبعا فيها صوت المكينة بالسرعات المنخفضة زي اغلب السيارات الاوروبية لانه ثاني اكبر مكينة بعد الثمانية سلندر بس مع الوقت تتعود عليه
قيرها سيئ عزمها ممتاز جودتها الميكانيكية ممتازة، جودة الديكور الداخلي ممتازة جدًا تكلفة امتلاكها معقولة وارخص بكثير من الماركات الألمانية واللي حبيت انها ما تسوي حركات غدرة وتخرب عليك فجأة وتنتكب
يعني هالمشكلة حق التكييف بدأت لها اعراض وعارفين وحاسبين حساب انها بنخرب
السيارة تصلح جدًا للشخص الغير مهتم بالسيارات وهمه السلامة والجودة في السيارة والعمر الطويل، اما بالنسبة لعشاق السيارات مثلي :56: السيارة بتمل منها بعد سنتين ثلاثة بالكثير السيارة سواقتها مملة وشي طبيعي كفولفو القير سيئ ويستفزك تردده بعض الأحيان يعني بعض الاحيان تنتظره يله عشق ويقعد ساعة ما يعشق وبعض الاحيان يعشق نمرة وانت تبي تفرمل وتلف :5::
السيارة ببساطة ممتازة جدًا جدًا في الخطوط ثباتها وعزلها وراحتها فيها ممتازة
في المدينة اذا تهتم بطريقة القيادة والمتعة فراح تخيب ظنك
ان شاء الله تكونون استفدتوا وحبيت اشارككم تجربة فعلية وشخصية بدال كل من يفتي بمعلومات خاطئة وأي سؤال لا يردكم إلا الكيبورد
