تكفون ياشباب فزعتكم FJ CRUISER VS XTERRA VS PAJERO

بقولك وش ميزة وعيب فكل خيار


[SIZE="6"]الأف جي كروزر:

المشكلة أنت تبي سياحي
ميزاته أنظمة الفرامل ABS,EBD,BA موجودة
فيه تراكشن كنترول TRC وتراكشن كنترول النشط المخصص للطرق الوعرة A-TRAC
مافيه دفلوك خلفي وهي ميزة محترمة للبر رغم ان ممكن A-TRAC يغني عنه لكن مو كثير ويعتبر أفضل كفاءة الدفلوك في البر
تانكي البنزين صغير على حجمه 72 لتر فأخر الموديلات حسنوها بأضافة خزان أضافي ويكون ممتاز لحجمه

ميزاته:
1- مريح المركب بالمقاعد الامامية
2- الموتر مخصص للبر
3- شكله مميز رغم أنه صار حاليا موضة قديمة بعض الشيء.

عيوبه:
1- الدخول والخروج بالمقاعد الخلفية مزعج جدا يعني ماهو ذاك الزين للعائلة غير المقاعد الخلفية مهي مريحة ابد.
2- الموتر عزله مو ذاك الزود بسبب وقوف الزجاجة الامامية غير انه يشتكي من التنسيم اذا بتمشي فوق 120 كيلومتر/ساعة.
3- مشكلة اغلب من يشتريه مراهقين فقد يلاحظونه الناس بنظره صغير لكن اذا منت فوق 35 سنة مو ضروري تشيل همها.
4- بعض المواصفات ناقصة فيه لنفس الفئة الي انت تتكلم عنها.


نجي للاكستيرا:

مواصفاته كويسة والموتر نشيط وانشط من الاف جي بالشارع لما تتكلم عن الاثنين نفس القير ويجي منه فئة الأوف رود بصراحة أنصحك به بقوة أذا كان موجود لدى الوكالة لميزة الدفلوك الخلفي وقيمته في 124 ألف انصحك وبشدة تشتريه دام ميزانيته حول ميزانية الاف جي كروزر.

ميزاته:
1- انشط من الاف جي كروزر بالشارع.
2- الدخول للمقاعد الخلفية أفضل مقارنة بالاف جي.
3- اذا اخذت فئة الاف رود بيكون الافضلية بتواجد الدفلوك الخلفي وأعتقد بيكون حول قيمة الاف جي الي بتشتريه.


عيوبه:
1- مجرب الاثنين سابقا ملاحظ الأف جي اريح منه سواء بالشارع او بالبر (اتكلم عن المقاعد الامامية) بسبب ان تعليق الاكستيرا الخلفي سيست وهذا الي مقلل مستوى الراحة فيه.
2- شكله شوي من بعض الاماكن لك عليه مثلا العفطة الي بالسقف بعدم وجود السلة او مايشابهها وأيضا الباب الخلفي جزء منه بارز تحس ماله موقع من الاعراب.
3- مافيه تراكشن كنترول خاص بالطرق الوعرة مثل الموجود في الأف جي A-TRAC لكن أن أخذت فئة الاف رود الي فيه دفلوك انسى هذي الميزة فالدفلوك افضل منه.
4- توني أنتبه بعض الشغلات ولازم تروح تشيك عليها بالوكالة وهي ماكتبو وش انظمة الفرامل الي فيه؟! ولا هل يوجد فيه نظام ثبات أو لا؟ والي يسمى بنيسان بأسم VDC اذا رحت الوكالة ولا يعرفون يطلعونها لك بالاخص نظام الثبات فيه طريقة تعرفها روح شوف السيارة بالفئة الي تبي تشتريها وخذ المفتاح ودق سلف الدقة الاولى فقط (الي بدون تشغيل) تطلع لك كل اللمبات والتنبيهات الانظمة بالطبلون ناظر وش فيه؟ عموما خروج علامة ABS لايعني أن جميع النظامين الباقيين وهم EBD وBA موجودة هذي لازم تشيك فيها بكتلوج السيارة حق المواصفات وليس الاستخدام, واذا طلعت لك لمبة VDC معناه نظام الثبات موجود.

على فكرة ترى بيوقف تصنيع السيارة عام 2015 لا يعني ان قطع الغيار بتوقف لكن ماعاد راح تشوف اكستيرا ممكن ينتج لسنة او سنتين قدام لكن خلاص ماعاد فيه شكل جديد وترى الاف جي نفس الطريقة.


الباجيرو:

رغم انه فئة مختلفة فهي 3 صفوف مقاعد مقارنة بالاف جي والاكستيرا لكن ميزته جودة المواد المستخدمة داخليا افضل من الاثنين وافخمهم داخليا والخليجي محرك 3.8 لتر بتحصل منه حول ميزانيتك بالمعارض

ميزاته:
1- أفخم داخليا من السيارتين السابقتين واكثر جودة بالمواد المستخدمة داخليا.
2- يشيل 7 ركاب مقارنة بالسابقين.
3- يجي دفلوك.

عيوب:
1- حسب تجربتي له صوته مكينته مرتفع ومزعج بعض الشيء أضافة انه مو قوي وللمعلومية بالشارع والبعض اضعف من الاثنين السابقين.
2- قيره بصراحة أغبى شيء شفته فيه فهو مايثبت على نمره بل من يوم يوصل الاحمر يغير للنمرة الاعلى وهذا يعتبر غباء لسيارة مخصصة للطرق الوعرة ممكن تكون نظام امان للقير لكن تصلح للسيارات المدنية وليس لسيارات الطرق الوعرة وكذا بتلاحظ أن سيارات اقدم وأضعف تطلع طلعات عادية وبكل سهولة بسبب انه يقدر يثبت النمرة مثل قيور العادي.
3- مطبة قاسي جدا وعيون القطط الي بشارع تحس بها بقوة بسبب تعليقه.

طبعا انتبه تاخذ محرك 3.5 لتر تراه مهو قوي ابدا ولا تاخذ الباجيرو سبورت.

حقيقة قد اشور عليك بالاكستيرا بالمرتبة الاولى ثم الاف جي كروزر

اما الباجيرو اذا انت راعي بر انصحك تشوف غيره بسبب سالفة القير والقوة
نعم كاستخدام في المدينة ممكن افضل من السيارتين السابقين ا
ونصيحتي لك خذ برادو 6 سلندر تراه افضل منه بمراحل صحيح مافيه دفلوك لكن التراكشن الي فيه يفي بالغرض بالبر رغم انه التراكشن حقه مو حق بر لكن بسبب ان نظام الدفع في البرادو يعتبر Full time 4WD يعني يشتغل طول الوقت على الكفرات الاربعة فهو التراكشن بيشتغل على الاربعة مو على الاثنين زي السيارات الثلاث الي بالاعلى

حقيقة البرادو غالي لكن حاول تدور 2014 جديد او خليجي ممكن تحصله ارخص
وكذلك انتبه تاخذ برادو 4 سلندر اذا اقتنعت بالبرادو[/SIZE]