ناوي إف جي 2014 للنفود. عادي ولا أوتوماتيك؟

فارس مشاري @user_302763 · 25-08-2014

السلام عليكم جميعاً ، انا قررت اشتري اف جي 2014 فل كامل ، ما شاء الله ، بس انا محتاااار بين اني اخذ قير عادي او اوتماتيك ، تكففون الي عنده خبره بينهن والي يعرف وش احسن قير عادي ولا اوتماتيك يقولي لاني راح اعتمد كلامك وراح اتوكل على الله الي معه اف جي يا ليت يردولي الله يخليكم الموضوع جدي . وانا عايش بالمدينه يعني بايام العطل جمعة وسبت راح اطلع لنفود ، وباقي الاسبوع بالمدينة. وشكررررررا.

Azizm123 @user_300396 · 28-08-2014

رغبتك بالقير العادي او الاوتو ترجع لك !

لكن بنبهك على شغله ! ترى الأف جي القير العادي يجي بمواصفات سياحيه فقط ! يمكن الشاص احسن من مواصفاته !

القير العادي : بدون كاميرا خلفية - دون مساحة خلفيه - بدون سستم ومضخم صوت - بدون حساسات - بدون دعاسات جانبيه - بدون انوار على المرايات - بدون بوصله اللي تجي بالنص - بدون تكايه للكراسي - بدون بلوتوث - بدون صاجة ..

القير الأوتو فيه كل اللي ذكرت فوق .. والأمر راجع لك إذا بستغني عن كل هالمواصفات عشان القير العادي ! انا عني اشوف اشتري الأوتو اريح وفيه مواصفات رفاهيه اكثر ..

فارس مشاري @user_302763 صاحب الموضوع · 28-08-2014

اشكركم كلكم حقيقة على النصائح وشكرا لابو اسد علئ التقرير الكامل ، وننتضر اراء الشباب الاخرين .

AR_REEM @user_298993 · 26-08-2014

من تجربه للــ أوتو

أشوفه انه ممتاز في البر وموفي ماشاء الله لكن يلزم انك تنسم وتبدل بين النمر بشكل صحيح

على العموم بالبر والتطعيس لا شك العادي أفضل وبمراحل لكن مشكلته هي ان الكلتش فيه ضعيف

والغالبيه غير الكلتش على ممشى 35-40 الف على الضمان طبعا والحل هو بتركيب كلتش رياضي ويكون

أقوى من السابق , عيب اخر الدفع الرباعي المستمر في القير العادي يزود من الصرفيه لكن في نفس الوقت

يعطي ثبات أفضل في المنعطفات من القير الأوتو , إذا تهمك المواصفات فــ أعرف ان العادي استاندر مقارنه

بالقير الأوتوماتيك رقم 2 لكن يميزه وجود أنظمة الدفع الرباعي وهي الدي فلوك و a-trc

تفاصيل المواصفات على الرابط تحت

http://www.toyota.com.sa/modelsprices.asp?model_id=9

بالتووووفيق لك

رحال للأبد @user_183085 · 26-08-2014

عندي اف جي اوتو
في التطعيس احط القير على L او 2 مع الدبل الخفيف حتى مايعشق كثير ويهبط عزم الموتر

فارس مشاري @user_302763 صاحب الموضوع · 26-08-2014

الله يعافيكم واحد واحد ع النصايح وخاصة ابو اسد على الرد الجميل عن القيور ، اخوي كوفر مي ، اذا خذيت اوتماتيك هل فيه تعشيق مع الاوتو زيادة يعني مثل المفخرة ، ونشوف رأي الشباب الحلوووين .

cover me @user_164128 · 26-08-2014

باعتقادي الان اختلاف القير صار الى ميول الشخص لان القير الاوتو تطور بشكل كبير جدا

و صار قوي وسريع في التعشق خاصه مع وجود ميزه توبترونك تتحكم في التعشيق

طبعا بشرط تكون السياره مخصصه للبر وجيوب كثير قيورها اوتو و ماشاء الله عليها ماقالت شي لكن يعتمد على السواق و خبرته في البر

الاوتو اريح و العادي امتع <<< و شوف الي تميل له اكثر

لحن المشاعر @user_126547 · 25-08-2014

انا شفت عيب واحد بالقي العادي
كثير يشتكون منه .. ماكملو 40 الف
خربت الكلتشات .. طبعا بسبب الحور عليه
لكن الملاحظ عليه كلتشاته ضعيه وماتتحمل
ف انصحك بالاوتو

انا وسيارتي @user_181125 · 25-08-2014

وعليكم السلام ورحمة الله

أخونا أبو أسد ماشاء الله موسوعة في الدفع الرباعي ومشاركته رائعة جداً كما هي العادة :xyxthumbs:

الاوتوماتيك أريح قيادة بالديرة والنفود

وكل مكان يوصل له العادي يوصل أيضاً الأوتوماتيك وأتحدى من يقول غير هذا !!!!!

وعند البيع الاوتوماتيك أرغب ،

ولاتنسى صلاة الاستخارة .

أبـوأسـد @user_15810 · 25-08-2014

للمعلومية

ترى نظامين دفع في الاف جي يختلف بين القير العادي والقير الاوتوماتيك

فالقير التماتيك نظام الدفع فيه Part-time 4WD
يعني الموتر يمشي بالدفع الخلفي مع أمكانية تشغيل الدبل على الخفيف والثقيل

وهذي صورة للدبل في القير التماتيك

بالترتيب H2 معناه الدفع العالي بعجلتين وهي للخلفي طبعا
ثم H4 ومعناها الدفع العالي بالاربع عجلات وحنا نسميه الخفيف علشانه للمهام الخفيفة
ثم N وهو تفضية تشبيك الدبل بالدفرنسات
ثم L4 معناها الدفع المنخفض بالاربع عجلات وحنا نسميه الثقيل علشانه للمهام الصعبة :smilie16:

أما القير العادي نظام الدفع فيه Full-time 4WD
يعني الموتر طول الوقت ماشي بالدبل الخفيف ولا يفصل حتى لو تمشي على الفصلة يشتغل الدفع الرباعي المستمر فيه فقط أمكانية تشغيل الدبل الخفيف بالقفل الوسطي والدبل الثقيل

هذي صورة للدبل في القير العادي

بالترتيب H معناه الدفع العالي ودام ماكتب فيها الارقام فهي مقصودة مسبقا أنها للعجلات الاربع
ثم HL ومعناها الدفع العالي مع خاصية القفل الوسطي الي تعطي نسبة 50% أمام و50% بالخلف وتسمى بالانجليزي Lock center differential
ثم N وهو تفضية تشبيك الدبل بالدفرنسات
ثم LL معناها الدفع المنخفض مع خاصية القفل الوسطي وطبعا حتى كل السيارات الي فيها زر للقفل الوسطي يصير ماله فايدة الزر القفل الوسطي لما تشغيل الدبل الثقيل لأن القفل الوسطي راح يشتغل معه تلقائيا سواء ضغطته أم لا

وبخصوص ليش التماتيك مافيها هذي الميزة Lock center differential
بالعكس موجودة لكن ماتكتب لك لأنك من يوم تشبك الدبل يتحول الدفع على طول 50/50 لكن هذي الخاصية فقط للسيارات الي الدفع الرباعي فيها مستمر بنظام Full-time 4WD لأنك مستحيل تمشي فوق 80 كيلومتر/ساعة وأنت قافل القفل الوسطي لأنه يتعب الدفرنسات والقير لما تتجاوز هذي السرعة فبيكون مثلا وضعية H في القير العادي قوة الدفع بالخلف أعلى من الأمام بنسبة 60% إلى 70% للخلف والباقي للامام وطبعا هي متغيرة بحسب ظروف الطريق

للمعلومية القير التماتيك فيه خاصية التكيف للطرق الوعرة يعني مو زي أي قير تماتيك أسم النظام Electronically Controlled automatic Transmission with intelligence (ECT-i) فهو مثلا بالرقيات ينزل نمره من نفسه مو ضروري أنت تنزل نمرة على طول إلا في حالة أنت تبي تحشر الموتر بالأول :smilie16:

عموما القير التماتيك فيه جيد والقير العادي ممكن افضل بالبر لكن اشوفه بنسبة لي متعب بالمدينة والبر لان تغييرك من اي نمرة للقير التماتيك مايضطر منك تدخل رجلك اليسار كل شوي علشان تضغط الكلتش

ولا تنسى أن كنت تعشق فكرة الموتر يكون خلفي (للطعوس من ناحية كب الرمال بأعلى الطعس أو بالشوارع علشان الدرفت وماشابه الخ) فهي مهي موجودة بالقير العادي

صحيح أن نظام Full-time 4WD موضوع كأكثر تماسك وثبات من Part-time 4WD لكن البعض يفضل الثاني علشان بعض الامور الي ذكرتها فوق أضافة أن Full-time 4WD بيكون فيه أعلى استهلاك وقود بسبب الجهد المتواصل في الدفع طوال الوقت
وبحسب الموقع تويوتا الامريكي موضح أن أستهلاك الوقود للقير التماتيك في الاف جي أفضل من العادي في المدينة والخط والمتوسط :ch19:

شوف أنت وش يعجبك بعد ما قريت الي كتبته:c0214:

super_safari @user_201024 · 25-08-2014

و عليكم السلام و رحمة الله
تم نقل الموضوع إلى قسم الدفع الرباعي

للنفود طبعًا العادي أفضل. و أنت تقول أنك بتستخدمه نهاية الأسبوع بس. أيضًا دريتكم ما هي زحمة.
أذًا خذ العادي.
الأوتوماتيك إذا ما نسمت كفرات و عشقت الدبل ما يتحمل القير و تنحرق الكلتشات. و قد صارت لأكثر من واحد بسيارات مختلفة. و توضيب القير ما هو رخيص أنت عارف.

فارس مشاري @user_302763 صاحب الموضوع · 25-08-2014

شكرا للمشاركة انا من حائل انا متحمس اني اسوق العادي لاني قليل اسوقه اول كان معاي اوتماتيك تخبر حايل مافيه زحمة واجد عاد نشوف رأي الشباب ونصايحهم بانتضارهم .....

Driving Concept @user_302891 · 25-08-2014

وعليكم السلام
ماشاء الله مبروك مقدما
انا ماعندي نفس السياره بس السيارات كلها تقريبا زي بعض من ناحية العادي والاوتوماتيك انا اعشق العادي لانه يعطيك حريه ويحسسك انك انت اللي تسوق ماهو السياره اللي تسوق عنك غير انه ممتع في القياده اما الاوتماتيك ممل جدا في القياده هذا بالنسبه لي وانا كنت بقولك خذ اوتوماتيك لو كنت في مدن فيها زحمه خياليه طول السنه مثل جدة والرياض تكره العادي فيها اما المدينه مافيها زحمه الا اوقات المواسم وتقدر تتفاداها وشكلك تحب البر ومعروف ان مافي مقارنه بين العادي والاوتوماتيك في البر العادي افضل بكثير يعني خيارك الافضل هو العادي هذا بالنسبه لرأي ونشوف رأي الشباب وبعدها قرر