فولفو S80 أو أكورد V6 موديل 2014

اتفق معك تماما بخصوص الجودة ..

ومن المعروف جدا جودة الفولفو على المدى البعيد مقارنة بمثيلاتها الاوروبية ..

وان شاء الله يجي يوم واجرب الـ S80 بعد ماجربت الـ S60 قبل سنة تقريبا وكانت في منتهى الروعة ..

شف ياغالي ابقولك وجهة نظري من واقع تجربة سيارتي الحالية فولفو s80 2008

جربت قبلها الياباني والكوري والامريكي والالماني

طبعا قبل لا اجرب الفولفو كانت اروع سيارة امتلكتها شبح 500 جبارة من كل النواحي رساوة عزل لايوصف فخامة ومتعة قيادة وماكنت اتوقع يجي سيارة بعد الشبح يكون فيها حتى لو بعض هالمميزات خصوصا ان الفياقرا اعتبره سقطه في تاريخ المرسيدس
وصراحة انصدمت قبل شهر تقريبا جربت عند الجفالي e300 شكلها الخارجي تحفه لكن قيادتها كأنها اي سيارة عادي ولا كأنها مرسيدس

نجي للفولفو انا اشتريتها لاني اعرف عنها بعض المعلومات وكان زميلي مايركب الا فولفو واستغرب منه مايغير ابدا يستخدم كم سنة ثم يبيع ويروح يشتري فولفو جديد

السيارة جبارة بمعنى الكلمة ووالله كل ريال تحطه فيها مايعتبر خسارة
لقيت فيها الراحة مقاعد لاتوصف طبية ولاتتعبك بالمشاوير الطويلة ولا السفر الطويل واللي يقولك امريكي ماجرب مقاعد الفولفو

والعزل ممتاز جدا طبعا زجاج النوافذ مدبّل وأحسن من بعض فئات المرسيدس والبي أم في العزل
الرساوة خرافية قبل اسبوعين كنت راجع من مكة للرياض ورجلي مانزلت عن 180 -200 مع اني ماأحب السرعه وعلى السيارات الثانيه ماأتعدى 140 بس في هالسيارة غير

طبعا الجودة اعلى من الالماني ولا فيه وجه مقارنة تحس السيارة ماشاء الله مدرعة وماتتأثر وتنهري بسهولة لو تحافظ عليها وصيانه أول بأول تخدمك عمر طويل وللمعلومية العمر الافتراضي للسيارة 25 سنة

طبعا المتانة في كل اجزاء السيارة عالية جدا وخصوصا البودي شي عجيب ولايمكن تشوف مثله على سيارات ثانيه لان بودي الفولفو مبطن من جوا بأعمدة فولاذ داخليه للأمان وثقل ووزن السيارة معطيها رساوة ماتتخيلها

الأمان حدّث ولا حرج اهتمامهم بأدق التفاصيل حتى البطانات والجلد والديكورات الداخلية مواد ضد الحساسيّة لان فيه جلود صناعية وبلاستيك في بعض السيارات ممكن يأثر على الجهاز التنفسي على المدى البعيد خصوصا مع الحرارة العالية لكن شف فكر فولفو وين واصل وفيها انظمة للأمان والسلامة مافيه سيارة تجاريها

اذا تكلمنا كقيمة السيارة والله تستاهل أكثر من قيمتها مقارنة ببعض السيارات الاوربية الثانيه وقطع غيارها معقول جدا وأرخص من بعض السيارات الالمانية ولاتنسى الجودة في القطع يعني اذا غيرت قطعه يبي لك كم سنه عشان تغيرها مره ثانيه

اذا انت من النوع اللي يفكر يبيع او تغير السيارة بسرعة فأكيد بتخسر كثير لان مافيه ناس تقدر هالسيارة وتعرف قيمتها

اذا مخطط على ان السيارة تجلس معك على الاقل خمس سنوات وراعي سفر توكل على الله وخذها وبتدعي لي وبتكون اجمل سيارة مرت عليك من تجربة شخصية وكثير سيارات بتطيح من عينك

انا ناوي اشتري جديد بإذن الله

طبعا لايمكن اني اقارنها بأكورد ولا اي سيارة يابانية او امريكية مع احترامي

بالتوفيق الله يكتب لك اللي فيه خير

يارجل اذا انت راعي خطوط ماتنفع الفولفو ثقيله ومكينه صغيره خذ امريكي ولا خذ ياباني سته سلندر والخيارات واجد
افالون < ياباني صناعه امريكيه
التيما 6 سلندر < ياباني صناعه امريكيه
اكورد 6 سلندر
تشارجر 8 سلندر
كرايسلر 8 سلندر
امبالا
الكابريس كنسلها شكلها قديم واحتمال تتوقف
التورس برضو كنسلها شكلها بيتغير
التشارجر والكرايسلر ما اعتقد وكيلهم اسوء من وكيل الفولفو اقل شي التشارجر والكرايسلر تحصلهم بالتشليح اما الفولفو مافي امل
انا انصحك نصيحة اخو ابعد عن الفولفو انا ما اقولك التشارجر والكرايسلر كويسه من ناحية الوكيل والصيانه لكن لو خيروني بينها وبين الفولفو بتجه لهم
عموما انا لو اني مكانك بيكون اختياري بين الاكورد والافالون

ما قد جربت الفولفو

لكن اذا انت راعي سفر

كرايسلر 300 او كابريس او امبالا

الامريكي افضل من الياباني بالخطوط

عزيزي

الاكورد ماخذ سمعة في حكاية العزل وكذا من الموديلات السابقة

الجيل الجديد 2013 وفوق فيه عزل خرافي وفيه راحة غير عن قبل لانهم غيروا نظام التعليق

اتمنى تروح الوكالة وتسوي لها تجربة قيادة اذا انك في الرياض

روح فرع خريص واطلب تجربة قيادة اكورد سبورت 2014

انا افكر بالامبالا لكن والله هونت ما فيه بعد الهوندا تضمن انها تشتغل معك كل صباح وتحس وكانها بتعيش للابد ماشاء الله
فوق هذا زادوا الراحة فيها وزادوا العزل الله يسلمك بس جربها وقول لنا تجربتك

هي راح تكون اكبر من S80 -كأبعاد فقط لكن من نفس الفئة- مثل ما كانت الـS90 السابقة
لكنها بتكون بدفع أمامي ورباعي مثل S80 ولن تكون بدفع خلفي مثل S90 أو الـ٩٠٠ سيريس

راح تتوفر بموديل بقاعدة عجلات طويلة S90 L
مع ان جيلي مصرة على انتاج سيارة أكبر من S90 عشان تنافس S كلاس والفئة السابعة
لكن الادارة السويدية رافضة الفكرة ومتخوفة منها وتشوف S90 L كافية

الله يذكرها بالخير S90 حيث كانت البديلة للفاخرة 960 ذو الشكل الصندوقي ..

لكن السؤال هل راح تكون امتداد لـ S90 القديمة ؟؟

الاوروبي عموما ياتاخذ شي فل او نص فل ولا لا تاخذ لانك بتاخذ سيارة مشلحه زيها زي المرسيدس والبي ام و الاودي مشكله ذي السيارات كل شي بحقه طبعا السيفتي ستاندرد عندهم انا اقصد الكماليات

اشوف الاكورد افضل و اضمن في البيع

موديلات ٢٠١٤ الجديدة نزلت من حوالي ٦ شهور
S80 و S60 و XC60 كلها نزلت بعد الفيس ليفت

لكن الجيل الجديد كليا من السيارة بينزل بعد نزول الـXC90 الجديد بـ٦ شهور
وبيكون اسمها S90 بدل S80 وبتكون أكبر من السيارة الحالية

سؤال بسيط ..

هل نزل الشكل الجديد "فيس لفت" للـ S80 بالوكالة حاليا ؟؟

اماكن الصيانة موجودة في الخبر والرياض وجدة
ولا فيه اي مشاكل بالنسبة للصيانة تحطها وتاخذها في نفس اليوم


وش اللي يخليها تتعطل؟!

الفولفو اعتمادية اكثر من الامريكي ومن السيارات الالمانية وهالشي معروف عنها
يكفي ان صاحبة الرقم القياسي في الممشى هي سيارة فولفو ماشية ٥ مليون كم!

عندنا XC90 عمره عشر سنوات نمسك فيه خطوط بدون اي مشاكل الحمدلله
فمابالك بسيارة جديدة

وعموما فيه خدمة مساعدة على الطريق اسمها OnCall من فولفو
وهذا رقمهم في السعودية ٨٠٠٨٩٧١٤٨٣

لو صار اي شي يجون يسحبون السيارة لين باب الوكالة


اذا انت حاب السيارة ومعجبتك مافي اي شي يمنعك الا شيئين:
١- سعرها عند اعادة البيع
٢- شكلها بيتغير قريبا وراح يفرق كثير

اخواني الحيران الحيران و S80 أفهم كم كلامكم إنكم من ملاك و عشاق الفولفو .. بالنسبة لي أنا لم أمتلك فولفو ولا أعرف طريقها للأسف .. أتمنى لو تفيدوني بالتجربة حتى لو مع سيارات أخرى .. فقط من باب المعرفة ..

يعني في نقاط مهمة فعلاً تحتاج تفكير .. التعطل في الخط لا سمح الله أو توفر أماكن الصيانة ,,

ياليت تعطونا من خبرتكم مع الفولفو وكيف كانت وكيف صارت ..


شكراً لكم ..

فعلاً ياغالي ,, أمس رحت الوكالة ( المتحدة) و وجدت الكرايسلر ب 141 و 6 سلندر ودفع خلفي ماشاء الله تبارك الله و التشارجر ب 126 الف برضوا 6 سلندر ,, بس الوكيل سمعته سيئة جداً .. هذي عيب السيارتين


شكراً لمرورك ..

عزيزي من واقع تجربة :-

مركز خدمة فولفو الحالي جيد جدا سواء من ناحية الاسعار او سرعة الانجاز
الفولفو قيادة لا يمكن ان تقارنها حتى بالبي ام او المرسيدس متعة وقوة ومغرزة في الارض لو على سرعة 200
سيارة نادرة الاعطال وعملية جدا ولا اذكر خلال 3 سنوات بانها توقفت علي فجأة

العيب الوحيد فقط هو سعر السيارة بعد الشراء وغير كذا المقارنة غير منطقية

واذا تبيها كلها عندك الفولفو :wink:

ما ادري وش تقصد بالخدمات اللي ما تلقاها عند فولفو لكن تلقاها عند الالماني؟
ولا ادري وش اللي بيخلي فولفو جديدة تتعطل في الخط؟
ولا تتعطل في الصيانة ولا شي ما ادري على اي اساس جالس تحكم عالسيارة
هل انت مجرب؟ :bigggrin:

عزيزي سالم الفولفو جودتها اعلى من اي سيارة امريكية او المانية
وانا ما اكلمك من فراغ اتكلم عن تجربة 4 سيارات فولفو

اذا تبي الراحه والرساوه بالخط لاتبعد عن الامريكي
واذا تبي الرساوه والامان لاتبعد عن الالماني
الالماني ما ا اعتقد ميزانيتك تجيب شي مقبول
والامريكي ماعاد هو مثل اول مافيه غير الكابريس والتشارجر والكلايسلر 300
انا شخصيا انصحك بالكرايسلر او التشارجر سياره امريكيه ( راحه ) بتقنيات المانيه ( أمان بعد الله ) واعتقد سعرها في حدود 140 الف
الفولفو صحيح حلوه لكن مالها سوق ولا خدمات بعد البيع انت رجال راعي خطوط لو تتعطل بالخط بتتورط ولو تتعطل برضو بتجلس بالصيانه وقت كثير ، وموضوع انك تبيعها على الوكاله بعد خمس سنوات لاتمشي ورا كلام الموظفين اذا ماكان فيه ورق رسمي

مكينة الـ5 سلندر كان اسمها 2.5T
وحاليا موجودة على S60 وV60 فقط


صدقني مثلها مثل مرسيديس S كلاس من هالناحية وهالشي عن تجربة :wink:

مافي سيارة تعزلك تماما عن محيطك الخارجي مهما كان العزل فيها قوي
لكنها أفضل من غيرها بكثير

لمست الوتر الحساس بالنسبة للراحة في الأكورد ..

أنا كنت في الوكالة و وضح لي الموظف إن T5 عبارة عن 5 سلندر .. وطلبت تجربة سيارة وقال انه لاتوجد S80 تجربة

وأعطاني سيارة صغيرة وقالي انها 5 سلندر و 213 حصان .. أخذتها وجربتها .. ك سرعة و قومة السيارة ممتازة
لكن عزلها ورساوتها كانت عادية جداً ,, ف ذكرت إنه ال S80 مستحيل تكون زيها وقال إن الفرق أفضل بشكل بسيط من ناحية العزل


لكن احتاج شخص يمكلك السيارة S 80 لأتواصل معاه بهذا الخصوص ..


شاكر ومقدر مرورك ويعطيك العافية ..