اكورد 2014 ( استفسار )

اخوي بينك وبيني انا كنت ناوي عليها وانا من اشد المعجبين فيها بس الفل 6 سلندر 140 الف ؟؟

مبلغ جامد ازودها شوي وطقلي مرسيدس بنز مستعمل


انا انحشت يوم شفت الاقساط في الشهر 1900 وشوي ودفعه مقدمه 25 الف والاخيره 42 هههههههههههه


انا بحط امل ثاني وهو اني اخذ قرض من البنك وشتريها مستعمله او كاش من الوكاله

حرام عليك والاكورد سوقها ناجح في السعودية وقطع غيارها متوفر
ولها زباين وفوق كذا تمسك سعرها بعد البيع مثل تويوتا
بس عيبها قطع غيارها غاليه شوي بس تستاهل

الحمدلله مستقر بداخل مدينه ولهذا السبب رشحت الاكورد واخترتها عشان اشتريها ، موتر صلاتي على النبي مايحتاج له كلام سواء قوه وتحمل ورساوه ..

كلامك سليم ، ماشاء الله جربت ال 2013 من ناحيه الاتساع جدا واسعه وفخمه وقويه وراسيه

بالنسبه للدركسون خفيف لأنه كهربا مو مثل بعض السيارات الاخرى

ماشاء الله تبارك الله ، الله يعطيك خيرها ويبعد عنك شرها

والله ياخوك الواحد يبي مواصفات والافالون سعرها مبالغ فيه صراحه

انا ماقدر افتيك من ناحية الموافقه وغيره لاني شاري السياره فوق 5 سنين ( موديل 2009 ) ولا اذكر بالضبط اللي صار وخصوصا اني شاريها كاش


السياره بشكل عام صبوره جدا ماشاء الله ومشاكلها معروفه ( اصلاح طرمبة دركسون ) والاصلاح غير مكلف وماياخذ وقت

لكن الموديل الجديد مافيه طرمبه صارت الطاره كهرب وهذا يعني ان الموديل الجديد مافيه مشكله من هالنوعيه باذن الله


انا الحمد لله مرتاح مع السياره وماغير لها الا فلاتر وزيت وفحمات وشغل وامش الحمد لله والسياره ماشيه 340 الف ماشاء الله


واعرف اشخاص معهم نفسي موتري ونفس الموديل مايشتكون منها الحمد لله الا مثل ماقلت لك بعضهم يضطر يسوي اصلاح للطرمبة وتكلف مع شغل يد مايزيد عن 450 ريال



نصيحتي لك :

اذا انت ساكن داخل مدينه فالسياره مناسبة جدا

لكن اذا راعي خطوط ما انصحك باي سياره 4 سلندر ودفع امامي

لانها بتتعبك في الخط رغم رساوة الاكورد اللي تميزها لكنها متعبه في الخطوط

المراتب قاسيه والسياره مطبها قاسي بالاضافه وجود حذفه مادري اذا حلوها في الموديلات الجديده ولالا


لكن السياره من ناحية الصبر اذا ماكانت الاولى فهي الاول مكرر

الاكورد الجديدة ممتازة من ناحية الاتساع الداخلي وكشكل جميلة من الخارج والداخل

اعجبني فيها اتساعها من تجربة والخامات الجيده في الداخلية افضل من المنافسين سوف اكون صريح معك . المحرك ممتاز لما تفصل نظام ECO .الخامات الداخلية جيدة جدا

العزل الخارجي ممتاز وجربت بجهاز قياس الضوضاء بسرعه 140 فرقت عن الكامري والالتيما 3 درجات لصالح الاكورد , اي انها اهدأ .

مالم يعجبني ان عجلة القيادة خفيفه والسيارة في المناورات غير ثابته كثير وتناقز بالطريق . الالتيما هنا افضل .

ملاحظة : المشكلة الي واجهتنا ان باب السائق كان ينسم وبارز للخارج قليلا وكان يحتاج ميزانية فقط وتم تعديل ذلك على الضمان .

انا امتلك اكورد 2013 سبورت اللي سعرها 137 الف

عن تجربة السيارة ممتازة جدا وانصحك فيها

وعن الوكيل تعامله مش ولابد ليس الافضل وليس الاسواء

افضل سيارت والواحد يطمئن لها هي هوندا وتويوتا
ومدام اخترت الاكورد فهي سياره بمعنى الكلمه
او شوف الافالون ايظا xl سعرها 106 الاف

كلامك صحيح ، ولكن ما اخس من قديد الا عسفان ، لو جينا نحسبها عالوكلاء كان محد بالسعوديه شرا له سياره ، وكل واحد اخس من الثاني سواء بالاسعار مقارنه بالمواصفات او مرمطه العميل اذا صار مشكله ، وانا صراحه من النوع اللي مايعتمد عالوكيل في شيء ، اللهم اني ادفع له شهريا مبلغ وقدره وبالنهايه دفعه اخيره وصلى الله على محمد ، والورش والخبرا برا الوكاله على قولتهم على قفى من يشيل .

اشكرك عزيزي على الرد

من أفضل السيارات اليابانية.

لكن أهل مكة أدرى بشعابها !

أفضل طريقة انك تسأل مستخدمي الأكورد وتعامل الوكيل معهم وماهي المشاكل التي يواجهونها سواء : اسعار القطع أو مدة الصيانة والحجز .

بالنسبة لي اقتنعت اقتناع تام خصوصا في السعودية أن افضل السيارات هي تويوتا وبس

مع احترامي للآخرين ولمن تفوقوا على تويوتا إلا انك ترتاح مع تويوتا :
قطع غيار متوفرة سواء اصلي او تجاري أو تشليح
اعتمادية كبيرة
سهولة الصيانة واجراءاتها.
سعر اعادة البيع ووجود المشترين.

ولم أقل هذا الكلام الا من تجربة ذقت معها المرارة !!!

الهوندا قد تنجح في مكان آخر يكون فيه الوكيل تحت سلطة النظام والمحاسبة واحترام الانسان !!!

الله يبشرك بالخير ، اجمعين ان شاء الله

وننتظر رد الشباب على استفساري بخصوص متى يردون علي بالموافقه علما بأن الموظف بالوكاله قال تستغرق يوم بالكثير ..

اكورد ياحبيبي عن تجربه سياره بكل معنى الكلمه

افضل ماخترت

والله يوفقك ياشيخ

وين فزعتكم يالربع ؟؟