قناة السيارات
بورش باناميرا
بي ام دبليو الفئه السابعه تقريبا 740
السلام عليكم
عمري بحياتي ماقد انلحست .. زي لحسـة اختيار السياره
خاصه انها بتقعد معك مابين 3 الى 6 سنين
ماعاد تدري وش تاخذ .. ان قلت باخذ السياره الفلانيه قالوا بيتغير شكلها بعد سنه ..
وان قلت باخذ السياره هذي .. قالوا خرابتها ومدري ايش ووالوكيل ..
وان قلت باخذ السياره ذيك .. قال اصبر لين مدري وشو !!
تعبت نفسياً والله العظيم
الحين خلاص ودي ارسى على سياره بين ذولي
بورش باناميرا
بي ام دبليو الفئه السابعه
آخري 450 الف ريال ماشاءالله
وهل صحيح مرسيدس اس كلاس 350 تغير شكلها وهذا شكلها الجديد ؟
اخوي اختيار السيارة يعتمد عليك انت شخصيا ,,,
انت وش تبي بالسيارة ؟؟ تبغاها فخمه ومريحه ولا تبغاها رياضيه بحت ؟؟
1- تبي سيارة رياضيه بفخامه خذ الباناميرا بس من الحين اقلك ترا نظام تعليقها سبورتي جدا وقاسي بعض الشي
2- تبي فخامه مع راحة ركوب وتكون لينه معاك خذ البي ام
تحياتي لك
شف بورش وبس
انا عندي بي ام 2011 الفئة الخامسه يعني عشان ماحد يقول اسب البي ام
لكن لامقارنه بين بورش وبين باقي الشركات من وجهه نظري !
الباناميرا رااااااااائعه وتميز مثير بالشارع وفخامه + الاقل اعطالا بين الشركات هي بورش !
طيعني وخذ بورش ولاتندم باذن لله
هلا والله وغلا
والله كل السيارتين فخمه وكل وحده لها مميزاتها
الـ BMW فيها عرض صيانه مجانية 5 سنوات >>> أو عدد معين من الـ KM بس للأسف ناسي بالضبط كم هو
الـ بورش شكل جديد مقارنة بالـ BMW وداخليه أفضل وأفخم
أفضل حل
اطلب تجربة السيارتين من الوكالتين وشوف ايش اللي ترتاح له
مع إني أفضل البورش باناميرا
+
لاتنسى الفيست لفت حق BMW بيكون موديل 2012
البورش على حد ماسمعت من أحد الإخوان ان الفيست ليفت حقها 2013>>>مو أكيد هالخبر
الله يوفقك وييسر أمرك
ومبروك لك مقدما
بخصوص المرسيدس حبيت أطمنك إن مو هذا الشكل الجديد لها
إلى الآن ما اعلنوا عنها
ممكن تحصل صور تجسسيه لكن راح تكون مطموسه بالكامل
بالتوفيق للجميع
BMW 2012 نزلت بالوكالة ولا فيها اي شيء متغير
بالنسبة لي نصيحتي لك اشتر 740 افضل ضمان
ووكيل افضل وارخص من ناحية القطع
ساماكو سيء واتوقع علشان تشتري من عندة باناميرا يبيلك تنتظر 3 اشهر على الأقل
وسعرها 420 الف
ولو مابغيت تصبر عندك الوكار و اور كار وهالطقة يبيعونها ب 500 الف اقل شيء
اما البي ام بالكثير تصبر اسبوع سعر ارخص صيانة ارخص وكيل افضل ضمان قوي وسيارة قوية وتتحمل
انا مااسب البورش بالعكس من افضل السيارات بالعالم واقواها واجملها بنظري لكن الوكيل يخليك تتجنبها
ساماكو في البورش جداً سيئين واسمع القصص عنها
انا عندي اودي لكن الى الآن ماجربت الوكالة تجربة حقيقية لأنها ماراحت للصيانة الا مرة واحدة فقط !
والله يوفقك ويرزقك اللي ببالك
أنا الصراحة كنت مثلك محتار بين عدة سيارات وهي البي ام والباناميرا ومرسيدس CLS والاودي A8
وكنت أبي سيارة تكون قوية ومريحة وهادئة بنفس الوقت
بعد تجربة جميع السيارات رسيت على CLS وبقولك تجربتي لكل وحدة من رأيي الشخصي:
1- البي ام : هادئة جدا ومريحة والصراحة كانت من أهدئ السيارات الي جربتها وعنهم عرض الصيانة حلو بس المشكلة سواقتها مرة ناعمة وأحسها بتذوب بيدي لأنها حقت روقان وأنا عن نفسي أحب السرعة شوي عشان كذا ما عجبتني سواقتها عندهم خصم حكومي أيضا بس مأدري كم النسبة.
2- البانميرا: أفخم السيارات الي ركبتها من الداخل والخارج ولها هيبة الموظف جابلي وحدة جديدة 6 سلندر عشان اجربها ما مشت الا 15 كيلو ولكن أول ما مشيت فيها للأسف ما دخلت مزاجي قاسية جدا ومراتبها صغيرة ورياضية الى أبعد الحدود وصوت المكينة واضح جدا من الداخل ما أدري ليش ولما أسرعت فيها كانت خفيفة جدا وحسيت الهواء يدف السيارة شوي لأن هذاك اليوم كان هواء قوي شوي والشي الأخر وكيلها ما يمدحونه.
3- CLS : الصراحة سواقتها عجبتني تحسها مريحة بس مو زي البي ام والاودي وقوة المكينة صاروخ لاني جربت ال 500 حتى مشيت فيها الى سرعة 320 كلم/س وكانت هادئة وراسية جدا ماشاء الله شكلها جدا رووعة والشي الي عجبني فيها انه عندهم خصم لموظفين الحكومة قدره 9% فطاح مبلغ تقريبا يوازي الأربعين ألف وأخذتها باسم أخوي بما أنه موظف حكومي حتى أني طلبت وحده بمواصفات أنا أخترتها ويبيلها تقريبا 3 الى 4 شهور. والسيارة كانت داخلة مزاجي من أول ظهور لها تقريبا من 2005 اذا ماني غلطان حتى اسمي هنا بالمنتدى عليها.
4- اودي A8 : الصراحة الحق ينقال كانت من أفضل وأرسى السيارات الي جربتها بالسواقة وداخليتها فخمة ولكن من الخارج ما أعجبتني أبدا تحسها باردة شوي ما فيها تصميم مميز والشي الثاني أني لاحظت السيارة الي عند جارنا بدأ يطلع سواد كربوني حول الشكمانيين الخلفيين وكان واضح أنه مخرب البوية حول المنطقة هاذي والصراحة يوم شفتها كذا انفجعت فقلت كيف أفخم سيارات اودي وفيها عيب بايخ جدا زي كذا علما بأن سيارة جارنا الشكل الجديد ولونها أبيض ولسى ما مشيت شي. والمشكلة الثانية زي الباناميرا وكيلها سيئ جدا. وسعر الستة سلندر مرتفع جدا اذا قارنتها بالبي ام.
أتمنى أني أكون أفدتك بتجربتي ورأيي الشخصي عن السيارات الي ذكرتها لك.
والسلام عليكم ورحمة الله وبركاته
اخوي انصحك بالبي ام دبليو
ياشيخ يكفيك الشكل والهداوة اللي الكل يمدحها
وإذا على السرعة
كل السيارات سريعة حتى الأكسنت تجيب 220
وهذي هي اكسنت اجل البي ام كيف
واخوي نصيحة لوجة الله
لاتسرع السرعة مافيها خير واللي فقد شخص عزيز علية
يفهم كلامي زين
اما بالنسبة للي يقول اصبر شوي بيصير وييصير
ماعليك لانك حتى لو صبرت بيقلون اصبر مرة ثانية بيصير ويصير
الله يووفقك في اختيارك
رد مع اقتباس