بسم الله الرحمن الرحيم
حاس فيك وقلبي متقطع عليك .... المهم
انا عندي لك انشاء الله احسن حل
مناسب لراتبك وامكانياتك
ولا تخلي احد يلعب عليك
وخليك انسان واقعي , وليس خيالي , ترى راتبك 3000 ريال بس
اولا : حاول قدر الامكان انك تحول راتبك على بنك الراجحي الممتاز , أو جرب البنك الذي ينزل به راتبك .
ثانياً : اطلب قرض بطريقه شرعيه وقدره 70 الف ريال سعودي , مثل شراء اسهم وبيعها مثلاً , وترى الحلال زين عشان ربي يباركلك بسيارتك وتسلم من الحوادث , راح يكون القسط 1300 ريال تقريبا على خمس سنوات وفوائدهم ما تتعدا 9000 ريال بإذن الله , وعلى فكره بالنسبه لبنك الراجحي إذا اوراقك جاهزه راح ينزل المبلغ في حسابك قبل ما تقعد على الكرسي بدون مبالغه , انا مجربهم وهذا القرض الخامس من عندهم . والمهم انك لازم تعرف ان البنك ماراح يعطيك اكثر من هذا المبلغ , اصلا اذا قدرت تاخذ 70 الف من عندهم تعتبر انسان محظوظ
ثالثاً : الحين في يدك 70 الف انشاء الله , والخيارات امامك مفتوحه تقدر تاخذ اي سياره تبيها بحدود 70 الف , واذا تبي سياره وكاله جديده على يدك محد استخدمها غيرك وريحة الوكاله فيها وبقراطيسها ههههههه , انصحك تاخذ سيراتو قير توماتيك فل الفل بمواصفات خياليه جلد وفتحه وزر تشغيل وبصمة فتح وتسخين مقاعد وabs و مدخل usb و mp3 و جنوط ومانع انزلاق ومفتاح ذكي وغيره وغيره بـ 66 الف ريال , وكل هذا تعتبر سياره اقتصاديه, وباقي المبلغ سوي فيه تضليل حراري مع الرخصه , وتقدر تدخل موقع كيا او تروح الوكاله وتشوف السياره , وعندك كمان سيارة شيفروليه كروز اربع ابواب , ولا تحكم عليها حتى تركبها بالوكاله
والخيار الثاني :
انك تشتري مستخدم موستنج او كومارو , مستخدمه ومقطعين بطنها بالتفحيط وفاقعين مكينتها بالاستعراض بشارع التحليه , ومهلكين اقمشتها ودسكاتها من كثر الفرامل وهارين في اليايات والهيدروليك من كثر المطبات , وفي الاخير يروح يوديها تلميع ساطع ويلبسها اكياس يعني صدقني نظيفه , ويبيعها لك , وفي الاخير تاكلها بلحيك وانت تصلح وتدور قطع غيار
وانا والله انصحك بالجديد الجديد
ما فيه زي الوكاله اللي ريحته فيه وعلى يدك
وتعرف خراباتها اول بأول
اسألني انا شريت فورد وشريت اكسنت وشريت مرسيدس نفظت جيوبي تنفيظ عشان المكيف ودرجة الحراره ,
ولما شريت جديده والله واقسم بالله انها اقمشه وبواجي وزيوت وفلاتر بس يعني الاشياء الاستهلاكيه اللي على الصيانه الدوريه , ولازم تسويها عشان تحافض على سيارتك
ملاحظه ابعد عن التأجير قدر الامكان , لأنه نصب بنصب , وماراح تمتلك السياره إلا بعد خمس سنوات , يعني لو بغيت تبيع سيارتك بعد سنتين وبعد ما تتعين بعملك ما تقدر , لأنها تأجير وراح تضطر انك تكمل الاقساط ثلاث سنوات الباقيه , أو انهم يسحبون السياره عليك
وإذا لازم لازم تاخذ تأجير , لاتحط ولا ريال واحد مقدم انتبه انتبه , تراك لو حطيت مقدم وصار للسياره شي , بيقولون السياره تالفه ويسحبونها منك , وتروح فلوسك , طبعا هم يبيعونها تشليح وتعوضهم شركات التأمين بقيمة السياره كامله , يعني زي المنشار , طالعين ماكلين نازلين ماكلين
المهم هذا الحل اللي عندي , واذا جاز لك وسويته بالله علمنا ايش صار معك وايش اشتريت من سياره
