قير فورد ماركيز 2004

عدم تركيب الفلتر يضيع العزم , زين أن سيارتك كانت تمشي :smile: و الحمد لله إنك لحقت عليها.
شكرًا لإفادتك لنا بالحل.

السلام عليكم

واخيرا لقيت الحل !!

وعند بنشري بعــــد !!!!

الفني الاول اللي غيرت عنده الفلتر والزيت طلع للأسف ما عنده سالفه

وبعدما رجعت له بسبب المشكله المطروحه سالته عن وضع تركيب الفلتر ( حسب افادة اخوي ترافلر) قال لي ميه ميه !!

وطبعا من ذاك الوقت وانا حايس بالصناعيه كل واحد يقول الزود عندي ...

واخير استخرت واسشرت اني اغير الفلتر والزيت ...

ورحت للبنشري ومعاي الزيت والفلتر والوجه


واول ما نزل الغطاء السفلي لقي الفلتر طايح بالصحن !!

طبعا انا ما قلتله عن المشكله ....

قال تحمد ربك ان القير ما اعطاك عمره ....

وركب الفلتر الجديد وثبته صح وغيرت الزيت ورحت اجرب الموتر ماخليت طلعاه الا وانا شاقحها ... اختفت المشكلة نهائيا..

الآن ولله الحمد القير ميتين بالميه !!


ملاحظة : بعد تغيير الفلتر والزيت وعند تشغيل السياره لابد من الاخذ في الاعتبار ان القير ولفتره قصيره جدا مايقبل تغيير للخلف

ولا للامام .... ولكن حاول تغير بالريوس والباركنق ( P و R )

وراح تنحل المشكله ....


واخيرا ..

اقول للاخوه المشاركين بالموضوع تستاهلون التاج

واخص الاخ ترافلر .........


وبارك الله فيكم جميعا ..

ما لقيت صور لموديل 2004 للأسف , لكن حصلت صور لموديل 1996 و ما تفرق كثير. و قد عرضت بعضها في موضوع آخر.

هذا بلف البدي و هو راكب في القير ((الكارتير مفكوك))



و هذا بعد تنزيله من القير و فتحه لأجل التنظيف:



*************

بالنسبة للحساسات لم يتم توضيحها في الصورة , فاستعنت بصورة لنوعية أخرى (بيجو) و كلهم نفس المبدأ للمعلومية لكن اختلاف بسيط بالتصميم:



من جهة أخرى:



طبعًا الحساسات (Electro Valve) هي ما يشبه الدوائر السوداء الخمس على جانب بلف البدي. و تتواجد في كل القيرات بنفس الشكل تقريبًا في أي نوعية أخرى.

هذا ما عندي. أتمنى أن تكون استفدت إن شاء الله و أخذت فكرة.

اخوي الغالي super_safari
اسعد الله ايامك ..
من ناحية ان المهندس مو واضح فهذي مايبي لها طقة عصا !
والدليل ... أنه ما وضح لي الصورة بالكامل كما هو الحال بالمنتدى ... وأشكرك وأشكر من ساهم بالتوضيح من القلب .
والشيء الاخر .. أني تلقيت نفس النصائح الي ذكرتها لي من بعض الزملاء بعدم المجازفه مع هذا المتهندس !
وبالنسبه لنوع السياره : فورد قراند ماركيز موديل 2004
وانا ساكن بالطائف ..
أتمنى إذا أمكن تعرض صورة القطعة لتعم الفائده للجميع
ودمت بوافر الصحة والعافية ,,

لا توجد قطعة بهذا الاسم: [تتبع نظام التغييرات] !!!!!! شكل الفني لا يتصف بالوضوح معك لا أدري لماذا! لكن أفهم من وصفه [تتبع نظام التغييرات] أنه يقصد بلف البدي Valve Body أو ما يسمى بالعربي: مخ القير. و هو ليس بعيد عن كلامي عندما توقعت لك مشكلة حساسات. لأن الحساسات راكبة في بلف البدي. و هي بالفعل تسبب الفصلة السريعة التي ذكرتها في ردك هذا الأخير.
و تركيبها لا يتطلب فرط قير بالكامل , ليس أكثر من فتح الكارتير و سيظهر لك مباشرةً بلف البدي.
و تركيب الحساسات في بعض السيارات يستلزم إنزال بلف البدي فقط من القير و يظل القير راكب مكانه , طبعًا هذا في أصعب الحالات.

ما أتوصل إليه من خلال تفاهمك مع هذا الفني هو أنه غير واضح و يبالغ في الأمور! فهو:
أولاً لم يذكر لك اسم القطعة بشكل صريح (بلف البدي).
و ثانيًا - بناءًا على الخراب في بلف البدي - كبَّر لك الموضوع و قال يجب فرط القير!!!!!

شوف غيره الله يعينك, مشكلتك إن شاء الله يسيرة بناءًا على ردك الأخير, و لازم تتعب في البحث هذي نقطة ما فيها نقاش.

إذا مو معروفة لك أشكال القطع و محتاج صور لبلف البدي و الحساسات و أنه لا يقتضي فرط القير فاطلبها و أجيبها لك , عشان تتفاهم مع الفنيين و أنت عندك شوية معلومات.

و لكن..
ما موديل سيارتك و نوعها بالضبط؟
في اي ميدنة أنت؟

أخوي الغالي .. احب ترابك يانجد

اشكرك عالنصيحه وراح اجربها .... وعسى الله ييسرها .....

بالرغم من ان المهندس استبعد شغلة الكهرب ,, ويقول اذا كان القير تغييراته طبيعيه فما رح يبين معاك العطل لان المشكله ميكانيكيه في حالة انك رحت تكشف كمبيوتر ..

لان الكمبيوتر يبين الاعطال الكهربائيه فقط ,, وهذا شيء مستبعد ..

وانا بصراحه احترت معاه :confused1::confused1:

وتقبل فائق تقديري ,,,

اخوي super_safari
اسعد الله اوقاتك ..

النتعه اللي اتكلم عنها اقصد أن الموتر يعشق بس بشكل قوي كأنه يفصل القير ويشبك مره ثانيه
لادرجة أن الكفر الخلفي يفحط ويشتغل نظام مانع الانزلاق .... :confused1: وهذا فقط يحصل اثناء الطلوع

والمهندس يقول القطعه داخل القير ( تتبع نظام التغييرات ) يعني لازم يفرطه بالكامل .... وهذا الشي اللي ما ابيه يسير

أقدر لك اهتمامك ودمت بوافر الصحة والعافيه

هلابك اخوي هاذي المشكله حصلت مع اخوي بماركيز 95 ولما كشف عليه قالو له توضيب لمافصلنا سلك منظم الهواء رجع طبيعي انت افصل سلك منظم الهواء الموجود بعد قربه الهواء مباشرة كخطوة اولى وجرب اذا ضبط غيره واذا ماضبط شيك على حساسات القير بفحصها بالكمبيوتر وربي ييسر امرك بالتوفيق.............

النتعة الي تتكلم عنها هل يصاحبها فضاوة أم لا؟ لأني أتوقع مشكلتك بالحساسات طالما التعشيق و العزم ممتازين على كلامك.
يرجى التأكد من اسم القطعة مرة أخرى من الورشة ؛ لأنها لو حساسات ما تكلف هالمبلغ 1300 ريال حتى مع أجرة يده!

يطيك العافيه اخوي trveller ومشكور على تجاوبك

رحت شيكت عالفلتر وقال لي الميكانيكي اللي غيرت عنده أول الفلتر والزيت وبعض التصليحات أن الفلتر راكب في مكانه صح ........

والمشكله أني مسافر بعد اسبوع وخاف يوقف بي الموتر :confused1: