تركيب شاشه على اوبروس 2009

طالت الغيبة tewster

وين الغيبة منتظر الشاشة الثانية الي قلتها

وكذلك ابغا اعرف نوع العازل الحراري الي ذكرتة وايش اسم السوق اللي في الصين .

وتقبل تحييياااتي .

السلام عليكم
يسعدني ويشرفني مرورك الكريم
شاشه المعلومات هي نفسها ماغيرت شي فيها بس انا حاط صوره بناتي بس الله يخليهم لي
عشان نور الشاشه قوي شوي انا حاط صوره عشان يخف نورها شوي
تحياتي

مشاء الله تبارك

هذا الي كان ناقص الاوبيروس

الي لفت انتباهي كأنك مركب شي مكان شاشة المعلومات؟

بعد اذنك تويستر حطيت الصور بالرد رقم 1

السلام عليكم
شرفني مرورك الكريم
ولكن الشاشه الي فوق هي نفسها بس حاط صوره بناتي ريفان وريتال ههههههه
واعتبر الشاشه عندك حبيبي ولا نقدر عليك
تقبل تحياتي

ماشاءالله تبارك الله ..... الله يعطيك خيرها ويكفيك شرها

السيارة ماشاءالله طالعة جناااااااان

وعلى فكرة لاحظت انك مغير الشاشة الصغيرة اللي فوق حقت الساعة...... ممكن تفيدنا اكثر؟؟

واذا فكرت انك تجيب كمية من الشاشات ياليت تحسبني انا اول زبون عندك

ولك كل الشكر والتقدير

السلام عليكم
اشكر مروركم الكريم
بالنبسه للشاشه حكايتي معها حكايه
ذذهبت الى الصين وبالتحديد مدينه كوانزو وهي مدينه تسويق عالمي
طبعا راسلت مواقع كثير قبل الذهاب واخذت عنوانهم بالصين عشان الشاشه
المهم جاك ابوريفان الي هو انا
وصلت بالليل الساعه 11 بعد سفر بالجو 10 ساعات
جات النكبه دور تكسي احد يتكلم انجليزي مافي معصي ماخير كلام صيني وخلها على ربك ههههههههههه
وش تتكلم معهم لاحول الله مالك الا تشعل مخك ولغه الاشاره وقفت تكسي الا هي حرمه قمت اعطيها بلغه الاشاره مافي فايده قامت تعصب علي الا جاء واحد سوداني الله يجزاه الف خير قالي بساعدك
المهم قلت له شوف ياكبتن ابي فندق حلو ومرتب قالي بقول لها وروح
المهم رحت معها وعليها سواقه معفنه هههههههههههههههه مافي الا قوه دعس وتحد الناس وانا اقول وش ذا النكبه
المهم رحت للفندق بصراحه روعه كله عرب انا قلت في خاطري تحيى السعوديه ههههههههههههههههههههههههه
وصلت الفندق 12 بالليل وقلت ابي انام ومن اصبح افلح
نمت الا دق علي المترجم وجاني
قلت له ابي سوق السيارات وعندي عناوين المحلات
المهم رحت السوق الزينه وشفت عالم ثاني وخيالي
ايش سوق ياناس كل مايخطر في بالك موجود
المهم رحت للمحلات الي انا مراسل لهم
المهم بحكم خبرتي في الكترونيات شفت الشاشات اسعارها تقريبا 340 دولا و 360 دولار بس الشاشه الي شفتها بالصوره غير عن الي قدامي يعني شي ولا بريال والحمد لله ما اخذت من عندهم
جاني المتجرم وبصراحه يعجبك قالي حبيبي ذول شركات نصب وتقليد الجود a قلت له ابي شي اصلي مرتب قالي تعال معي في شركه هنا من افضل الشركات للشاشات بالصين وانت مهندس الكترونيات شوف واحكم
قلت له مشينا
رحت للشركه مشي اول مادخلت الا شاشه ابورس قدامي رحت شفتها وفحصتها الا شاشه صح وجوده عاليه ونوع المعالج ممتاز وكذلك وزنها اثقل وطريقه اللحام في البورد خيالي تحس متعوب عليها
المهم جاتني وحده اسمها ماريسا قالت احنا من اكبر الشركات بالصين ونورد لدول اوربا وتقدر تسال عنا وتشوف وجابت لي شهاده ايزو الدوليه
بصراحه انا انهبلت جوده الشاشه عاليه جدا المهم قلت ابي اتعامل معكم مستعد اخذ كميات كبيره منكم تصل الى 200 حبه
قالت ايش رايك نعزمك يوم في المصنع في مدينه شينزن تبعد 400 كيلو من كوانزو قلت لها تم
المهم بعد يومين رحت للمصنع وشفت خط سير الانتاج والله مصنع رهيب وشفت اجانب كثير ياخذون 3000 حبه يعني شي غريب
سالت واحد اجنبي برازيلي قالي في امريكا الشركه هذه من افضل الشركات عندنا لانها جوده a
المهم تحمست انا
وادخل على مدير المصنع واعرفه بنفسي وابو الشباب طلع عقد قالي اقراه وفي شروط ان الشركه تتعامل بكميات كبيره مو حبه حبتين لا من 100 وفوق
قلت له الحبه كم سعرها قالي 540 دولار تقريبا انا انصدمت قالي في ارخص بس اتحداك بجوده هذه الي بالسوق تقليد
قلت له هات العقد ابي اخذ حبه الان وابي 100 شحن قالي توكل على الله
المهم اخذت حبه وجيت السعوديه وركبتها زي الحلاوه
والحمد لله الى الان وهي من احسن مايكون
لكن لما تطلب حبه تعال نحسبها سواء
540 دولار يعني 2025
شحن 102 دولار 382
جمرك 165 ريال
الكلي 2572
اذا اخذت جمله الحبه 400 دولار
شحنها 70 دولار \جمرك 165
المجموع 1927 ريال
بس لما تاخذ جمله لابد يكون عندك سجل تجاري ونوع النشاط
في انواع بالسوق الصيني على 300 دولار بس معفنه مره ونوعيه البورد والمعالج سيئه جدا وشكلها والنظام الي فيها تعبان
واي استفسار انا حاظر

ماشاء الله تبارك الله

والحمدلله على سلامتك
وهذي الاشياء كانت ناقصه في السياره والحين اكتملت ولو تمدنا بالاسعار بخصوص الشاشه وطريقة الحصول عليها..وشكراااا

ماشاء الله تبارك الله

والحمدلله على سلامتك

بس عندي اسئلة :bigggrin:

انا ودي بشاشة ملاحة تدعم كل شي يعني تلفزيون جي بي اس ..... الخ وماتلغي ازارير الدركسون

واصطب خلفي ليد

تتوقع متوفر عندهم ؟؟ وكيف اجيبها من هناك

تعديلات حلوه

الله يعطيك من خيرها ويصرف عنك شرها

عيوني لكم
الي يحتاج باذن الله ماراح اقصر معه
تقبل تحياتي

تسلم حبيب قلبي وشرفني حظورك الكريم
تقبل تحياتي

مبروك التعديلات ماشاءالله روعة بس يا ليت تفيدنا عن الاسعار و ما اعرف اذا انتا نازل على الصين تقدر تفيد الاعضاء و تجيب معاك
و دمت بحفظ الله و رعايته

بصراحه كملت الاوبيروس

فعلا كل الي كان ناقص الاوبيروس الشاشه
وطلعت راكبه عليها ماشااء الله

الف الحمد الله على السلامه
والف الحمد الله على الشفاء
والف شكر على التقرير الرااائع

تحياااااااااتي

شكرا اخي على هذا التقرير المفصل لتركيب الشاشة

السلام عليكم
ماشاء الله عليك احيك على هذه الروح واي خدمه انا تحت امرك باذن الله بعد اسبوع انا رايح للصين ثانيه واعطينا اخر الاخبار بعد التركيب السياره والله تستاهل
الله يوفقك يارب
تقبل تحياتي
اخوك ابوريفان

لقيت نوع ممتاز وافضل ويركب مكان شاشة المعلومات فوق ويعرض معلومات الطريق والمسجل والمكيف بعد وفي واي فاي ومتصفح انترنت ودلع لأبعد درجه بس فيه مشكلتين

الاولى نظام الخرائط فيه لا يتوافق مع الانظمه المستخدمه عندنا يعني الخرائط ما تشتغل عندنا بالاضافة لأنه سعره بدون شحن حوالي 3000 ريال وهو بكوريا ما حصلت منه اي نسخه بالصيني لأن الصين احلى ما فيهم يصنعون على الطلب اما كوريا نظام هذا اللي عندي تبي والا انقلع

مشكور على الافادة واللي طلبتها نفس اللي عندك بالسيارة ونفس القوائم ونفس الشيئ أنا أطلعت عليها عبر الفيديو وكلمت واحد من الشباب يدرس هناك بس مشكلته غبي بالالكترونيات وهو اللي بحث عنهم وووصلني بمندوب مبيعات بأحد المصانع وعرض علي اكثر من 150 موديل لكل السيارات الكورية واليابانية وكلهم يشتغلون بتوافق تام مع نظام السيارة المخصصه لها يعني اللي طلبتهم نفس ضفيرة الوكاله وايضا نفس نظام الحكم والمعلومات وازرار التحكم بالدركسون تشتغل معاهم تمام وجربهم لي بالفيديو لأني فقشت عليه وقلت اني شركة إستيراتد مستلزمات سيارات وحاب اتعاون مع مصنع بجودة عالية وبشكل مباشر واعطاني هم بسعر طيب واعطانيهم كاملين مع اريل التلفزيون والكاميرا الخلفية واريل تقوية اشارة الجي بي اس مجانا وأيضا مع ميموري مدمج به خرائط الخليج أنا طلبت خمس حبات اوبيروس وحبة للموهافي وبالنسبة للتعريب لا تغاف لأن الشاشه الاوبريتنق سيستم تبعها CE يعني تقدر تعديل عليها وتغير الخطوط او اللغة وايضاً برنامج الخرائط بسهولة وعندي معرفه تامه بها بس قلت خل اخذ تعريبهم واعدله براحتي أسهل علي
وبالاضافة لأن نظام الملاحه المدمج iGo وصراحه هالنظام ما احبه ممل وعندي مجهز له نسخه معدله من Garmen XT ونظام Route 66

وبالنسبه للطلبه خلاص دفعنا الداهم عن طريق البيبل وهي في الطريق الان

اخوي عالم ثاني
نصيحه لا تطلب عربي خلها انجليزي راح تشوف كلام ماله معنى حتى بالعربي هههههههههههه
انا الي عندي عربي ومتندم لكن الشاشه ماشاء الله جدا روعه
اتمنى لك التوفيق