أخيراً انحلت مشكلة في الفيرا كروز وبقيت المشكلة الأعظم

السلام عليكم .. حبايبي مشكورين على هالمنتدى الجميل واللي فيه معلومات وآراء تغني الواحد عن الحواطة في المعارض والوكالات ..

انا اشتريت فيرا كروز 2008 من معرض سيارات في أبوظبي بتاريخ 30/4/2009 والسيارة كانت ماشية 20 ألف كيلومتر .. فحصت السيارة في الوكالة وقالولي السيارة أوكي وتوكلت على الله واشتريتها .. والحين كملت عندي تقريبا 9 أشهر قطعت فيها 13 ألف كيلومتر .. بصراحة السيارة نقلة متميزة في عالم صناعة السيارات الكورية .. السيارة ممتازة ومصممة بشكل انسيابي وفخم وفيها من الرفاهية ما تغنيك عن السيارات الغالية .. واجهتني عدة مشاكل ومنها :
1. المسند بين كرسي السائق وكرسي اللي جنبه انكسر وتم استبداله عن طريق الضمان .
2. فتحة المكيف الخلفية انكسرت وتم استبدالها عن طريق الضمان أيضاً .
3. الستيرنغ ناعم (مثل ما قالوا الشباب) زيادة عن اللزووم وبالتالي من الشمس تغير لونه والشباب في الوكالة ما قصروا بدلوه كامل على الضمان .
الحين نجي للمشاكل الكبيرة والميكانيكية ..
1. مشكلة البريك .
2. مشكلة القير .
========================
أولاً : مشكلة البريك .
وصف المشكلة :
صوت (طقطقة) عند الضغط على البريك في السرعة الخفيفة (10-30كلم) .
الحل :
وديت السيارة للوكالة وقالولي السفايف نظيفة بنسويلك خراطة للديسكات .. قلتلهم سووا ولكن المشكلة بقيت كما هي .. ثاني مرة وديت السيارة للوكالة وقالوا السفايف نظيفة بنسوي تنظيف لها قلتلهم سووا ولكن المشكلة بقيت .. ثالث مرة وديت السيارة للوكالة وقالوا فيه كليب موجود في السفايف لازم يتبدل قلتلهم بدلوه (وهو على الضمان طبعاً) قالوا والله هذا الكليب ايي مع الكيت كامل قلتلهم والحل قالوا بنظفه قلتلهم نظفوه .. وللعلم في كل مرة كنت اقولهم بدلوا السفايف ويقولوا مافيه داعي لتبديلها لانها نظيفة ولكن للأسف بعد ما نظفوا الكليب رجع الصوت مثل أول .. المرة الرابعة وديت السيارة وقالوا لازم نسوي خراطة للديسكات مرة ثانية وسووا ودفعت عليها (60) درهم ... ولكن للأسف الصوت طلع مرة أخرى .. وفي النهاية رحت حقهم وقلتلهم ما بطلع من عندكم بدون ما يروح الصوت قالوا خلاص ارجع ثاني يوم .. ورجعت ثاني يوم وكانوا مبدلين السفايف والديسكات .. السفايف على حسابي الخاص والديسكات على الضمان .. والحمد لله رب العالمين الصوت الحين رايح ومافيه صوت وارتحت من المشكلة الأولى .

الحين انيي للمشكلة الثانية وهي القير :
وصف المشكلة :
صوت (دفعة) أو (دقة) أثناء عملية الغيار العكسي للقير .. يعني لما تكون السيارة على سرعة معينة (فوق الستين) وأدوس البريك بشكل قوي قبل لا توقف السيارة يدق القير في الغيار العكسي الأخير وتحس بدفعة تختلف من مرة لأخرى بقوتها ..
يوم حسيت في المشكلة هذي سرت الوكالة وشيكوا عليها وقالولي أول مرة انهم بدلوا قطعة في الشفت .. اخذت السيارة وطلعت جربتها ولكن المشكلة بعدها ما انحلت ورجعت عليهم وقلتلهم بعدها المشكلة قالولي نحن شيكنا على القير ومافيه مشكلة على العموم بنسوي تحديث للسوفت وير للقير وسووا التحديث والمشكلة خفت شوي لكن بعدها .. قالي مدير المهندسين هناك انه الفيرا كروز فيها هذي المشكلة البسيطة ولا تخاف منها (فيه فضاوة بين القير والشفت) .. المهم المشكلة مازالت لين الحين .. اذا حد صادف هالمشكلة ياليت يخبرنا عشان نستفيد من الحلول ..

وفي الختام تحياتي لكم وأشكركم الشكر الجزيل على هالمنتدى الحلو ..