ماشاءالله عليك يافكتور انواع الحماس مع الصبح, لك تقييم على مشاركتك الرائعه
حان دوري
- ما هو نوع سيارتك؟
هيونداي ازيرا 3.3 فل اوبشن
- كم موديل سيارتك؟
2007
- كم ماشيه؟
94000 ماشاءالله
- قيم استخدامك للسياره ( شاق, متوسط , خفيف )
بالنسبه للقير والمكينه استخدامي شاق وبقوه من استلمتها وانا دعس في دعس غير اني اداوم عليها مسافه طويله
اما بالنسبه للسياره بشكل عام كان استخدامي خفيف بس الحين اقدر اقول متوسط الى شاق بسبب خط الدوام كله مكسر ومطبات قويه قبل التحويلات ومجبور اكلها على سرعه وصرت ما احميها مثل اول اعطيها دقيقه الى دقيقتين وانا ماشي
- هل صادفتك حوادث لا سمح الله؟ هل الحادث قوي او متوسط او بسيط؟
صادفني حادث واحد اقيمه بسيط لأن التأثير كان على البدي ولا وصلت للميكانيكا
- ماهي القطع الاستهلاكيه اللي غيرتها؟
فرامل اماميه وخلفيه مره وحده
فلتر المكينه مرتين, فلتر المكيف مره, فلتر البنزين مره
زيت القير مرتين
بواجي مره وحده
موية الراديتر مره وحده
الحمدلله للحين ما غيرت ولا لمبه بالسياره, استغربت من سيارة فيكتور
الكفرات مره وحده
- ماهي القطع الغير استهلاكيه اللي غيرتها؟
الطبلون كامل لوجود خلل فيه
التكايه لظهور صوت
درج القفازات ( جيت بفكه عشان انظف الفلتر وكسرت قطعه فيه وصارت العصا اللي تثقل حركة الدرج ما تركب )
الستاره لوجود خلل مصنعي
الشدادات لوجود خلل مصنعي
الكومبرسر
صوفه سببت تهريب بالفريون
المساعدات الخلفيه وكراسيها
الاذرعه الخلفيه
للمعلوميه كل ما ذِكرُه تم تغييره على الضمان
- اكثر شي يعجبك فيها من تجربتك؟
الرساوه كثيراً
الهدوء وسواقتها بشكل عام
ولا انسى الساوند سستم الرائع
سعرها مكسب بصراحه لأن مواصفاتها كثيره
صرفية البنزين
وكيلها رائع
- اكثر شي يضايقك فيها؟
قساوة تعليقها بصراحه مبالغ فيه لسياره سموها هيونداي بنفسهم فخمه ولا ادري هل هم يناقضون نفسهم بنفسهم
جودة الكونسول الوسطي ( اللي فيه حامل الاكواب والتكايه ) اقل ضغطه عليه تسمع صوت تفقيش بيض بالاضافه الى غطاء حامل الاكواب اذا مسكت خط ومشيت على شارع خشن ( وياكثرها بالسعوديه ) اسمع زززز مزعج بصراحه ومن احط يدي على الغطا يروح الصوت , صرت الحين اسكر الغطاء على منديل عشان يثبت ومايزعجني
يضايقني ايضاً سرعتها القصوى هي صحيح 240 لكن هذا بالرابع ويكون الضغط داخل للأحمر يعني مستحيل امشي هالسرعه بإستمرار, واذا عطيتها خامس تنزل السرعه بالغالب 220 وفي افضل الحالات 230 ونادراً جداً تجيب 240 بالخامس
- من بعد تجربتك هل تجد ان السيارات الكوريه يُعتمد عليها ام لا ؟
اللي ضايقني بالازيرا هو خراب الكومبرسر وايضاً المساعدات والاذرعه مع ان الصوت اللي طلع لي بسبتها بسيط ويطلع نادراً لكن الوكاله غيروها على الضمان
عدا ذلك ماواجهت منها اي شي يضايقني فيها
اقدر اقول الازيرا يُعتمد عليها لكن ماراح اقول حمارة مكده اعزكم الله
---------------------------------------
- ما هو نوع سيارتك؟
هيونداي سوناتا قير عادي ستاندر
- كم موديل سيارتك؟
2002
- كم ماشيه؟
280 الف + عدد كيلوات غير معلوم ( فصلت العداد تقريباً سنه )
- قيم استخدامك للسياره ( شاق, متوسط , خفيف )
شاق جداً
- هل صادفتك حوادث لا سمح الله؟ هل الحادث قوي او متوسط او بسيط؟
الحوداث كثيره وتصنيفي لها قويه
اذكر منها 2
1- صدمتني تريلا من الجنب الايمن ( اذكر السوسو اخذت مليون عقده ذاك اليوم ) في الحادث هذا تضررت الاذرعه والعكس والجنط وكراسي المكينه والشاص صارت السوسو تمشي على جنب وتعبت لين وزنت الشاص مضبوط
2- كنت ماشي تقريباً 150 وكان الطريق قدامي بينفصل الى رئيسي وخدمه وانا كنت ماسك اليمين يعني ناوي اكون بالخدمه الا خويي اللي كان معي في آخر لحظه قالي خلك على الشارع الرئيسي وكسرت يسار تقريباً كسره قويه وكانت فيه سياره الظاهر بعد اللي معه قاله ادخل الخدمه في آخر لحظه طبعاً اول ما كسرت يسار انتبهت له وتفاديته بكسره ثانيه لليمين وزحفت على السياره وصقعت برصيف على جنب ورقيته وضربت في الجدار وفوق الرصيف السياره عقده ورجعت نزلت على الشارع
اضرار هذا الحادث للحين اشوفها بالسياره من تحت طبعاً وقتها كان كل كفر بجهه واحد لاف يمين والثاني لاف يساره والجنوط الاربعه كلها غيرتها مع المقصات اما الاذرعه طقطقو فيها الورشه ورجعوها مستقيمه وللحين بسيارتي ماغيرتها
- ماهي القطع الاستهلاكيه اللي غيرتها؟
السياره ماشيه كثير كل القطع الاستهلاكيه غيرتها اكثر من مره بالتأكيد
- ماهي القطع الغير استهلاكيه اللي غيرتها؟
راح استثني اضرار الحوادث
طرمبة البنزين اختربت علي مرتين
الاكزوز
قطعه بلاستيكيه اعلى الراديتر سببت تبخير لموية الراديتر
طرمبة المويه
العكوس غيرتها مرتين المره الاولى بسبب تلف الجلده وخروج الشحم واما المره الثانيه بسبب اني ركبت عكوس تجاريه وما طولت معي
مره خربت علي صوفه بالمكينه سببت تهريب زيت
اقفال الابواب الخلفيه
بكرات القزاز غيرت 3 تقريباً
- اكثر شي يعجبك فيها من تجربتك؟
صبوره لأبعد مدى
تعليقها مريح
الكراسي كبيره ووضعية الجلوس رائعه
سعرها ( ماخذها وكاله بـ 37 الف )
راسيه وهاديه
على صغر مكينتها 2.0 وحجمها الكبير الا ان ادائها رائع وبخط طويل تجيب 240 واطلع على كوامري 2.4
مكيفها بارد والكومبرسر الى اليوم شغال بكفائه ماشاءالله
- اكثر شي يضايقك فيها؟
صرفية البنزين كثيره على مكينتها الصغيره, كنت اعبيها فل اروح الرياض بمعدل سرعه 180 ما اوصل الا واللمبه شغاله
من بعد 120 يصير عزمها بارد بالخامس
صوت مسجل الوكاله ضعيف وعلى طول ركبت ساوند سستم
ضيق المساحه بالخلف اذا كان احد بيجلس بالخلف اضطر اني اقدم الكرسي شوي
- من بعد تجربتك هل تجد ان السيارات الكوريه يُعتمد عليها ام لا ؟
السوناتا حمارة مكده اعزكم الله وشهادتي فيها مجروحه بصراحه
