انا أبغى أشتري كامري امريكية ممكن اعرف منكم العيوب ؟؟ تكفون

السلام عليكم ورحمة الله وبركاته
اخوي والله الكامري الامريكي روعه بمعنى الكلمة
لها معي اكثر من خمس سنوات موديلها 2001 اربعة سلندر
ممتازة صدمت عليها بالواجهة مرتين وركبتلها واجهة كامري سعودي مافيه اي مشاكل
فيه سببين الناس خايفه منهم ليش ماادري
اول شي الفحمات الامامية للي معي اذا جيت محلات غيار اطلب فحمات كامري 1996 امامي 6 سلندر
وبالنسبة للخلفية قماشات والله معد اذكر اعتقد انها كرسيدا لاني اكثر من سنتين مركبها
وعندك برضو للمبات الخلفية لمبات امريكي ( انا تفاجأت)
وبالنسبة لباقي القطع كلها متوفرة
مثال
انا مركب يايات سعودي
هوبات سعودي
واجهية كاملة سعودي
الجنط مقاس 15 سعودي مافيه اي مشاكل مثل القراندي
كل القطع الاستهلاكيه وغيرها مثل 2001 السعودية


ملاحظة
انا بالنسبة لي احس اني الامريكي اريح من السعودي ليه ما ادري الممشي افضل بكثير النظافة انظف بكثير وبرضو الراحة اريح وبعدين بالنسبة للمسجل تجي وكالة cd وكست

وانشاء الله اكون افدتك

الحمد الله

وأشكر كل من تفاعل مع الموضوع انا شريت لي كامري 2005 أمريكي من صالة مجموعة السلام بالدمام امريكي ولله الحمد من فضله لها معي فوق السنة وما صلحت فيها غير قماشات او زيت ولا بنزين والله صراحة الكامري الإمريكي إبداع لأبعد الحدود

نتمنى من عبداللطيف جميل ينزل بمثل هالمواصفات الجبارة ..........................

مساكم الله بالخير
احب بأول مشاركتي اذكر بعض النقاط للكامري الامريكية
الله يسلمك انا عندي كامري 2004 أمريكي
مواصفات الامريكية ..اللي شفته .. المعاون دبل .. احنا انسميه بالكويت معاون اللي هو يجي سبرنقه ورا التواير .. ولما سألت الناس اللي عندهم كامري وارد الخليج .. قالولي ان سياراتهم اتطامر بالمطبات ..بعكس الامريكية ثاااابته ما اتطامر بفضل معاونياتها ..
البريك الخلفي درام .. يعني امان اكثر
وتختلف من داخل شوي.. مثل فيها اثنين اير باق ..عند السايق وجنب السايق
والاضاءة فيها لمس(تتش) تختلف عن الثانية
والمكيف دائري فر .. يسمونه تتش بعد
الحرارة ثابتة على النص ما تتحرك نهائيا ..
والصراحه احسها اقوى من وارد الخليج ..
..
اما عيوبها شقتني شق
لدرجة اني تعبت وانا ادور سفايف(فرامل) وما حصلت..واخيرا اكتشفت ان سفايف اللكزس ES300 تركبله ..
وكنت ادور معاونيات ما حصلت
وكنت ادور على بوبرنق خلفي وما حصلت
وادور على بعض الكماليات .. ما حصلت
القى تقليد مو اصلي...والاصح انك اتركب كل شي اصلي عشان تعطيك عمر اكثر..يعني دلعها تدلعك..

ومادري يمكن هالمعلومات اتفيدك
وللمعلومية .. السيارة للحينها عندي..ماشالله عليها.. ومادري ليش عندكم الامريكي اغلى من الياباني.. بالكويت العكس.. لأن قطع غيارها مو متوفر بكثره عشان كذا سعره طايح..فا انصحك تشتري من الكويت بس شوفلك وحدة نظيفة وافحصها فحص شامل بالكمبيوتر

واذا طلع البدي زين وصبغة وكالتها ومحركاتها ممتازة ..توكل على الله واخذها
اخوك بو نواف

حبيبي انا كان عندي وحده فل كامل والله جدا روعه انت تبي العيوب اول شي الشمعات الاماميه القاعده ماتركب يبغالك تولفها وبعدين المرايات الجانبيه ما تتعطف يعني تدخل بين سيارتين تورط

قبل قليل التقيت بشخص لديه كامري امريكي وقال لي ابعد عن الامريكي
قال القطع قد تحصلها ولكن بصعوبة وفي محلات محدوده
حتى الآن لم يجد اصطاب لأنه يختبف عن السعودي

انصحك بالامريكي
لانه موصفات حلوه والقطع نفس السعودي

انا انصحك بشده بالكامري الامريكي ال 4 سلندر اما السته فالا انصحك به لان قطعه غير متوفره مثل ال4 ماعليكم من الي يقول قطعه مو متوفره في بعض القطع نفس قطع الكامري الخليجي وبعضها نفس اللكزس es مثل الاقمشه هي نفسها حق ال es وصراحه ماتحس انك راكب في ياباني كانها فورد راحه وعزل افضل ومواصفات اكثر وشكل اجمل وتحمل مثل الخليجي بس قطع البدي والاكسسوارات اغلى من الخليجي بشوي

وانا انصحك بها وبكثره واذا تبي تلقى النظيف تعال القطيف او معارض الدمام الي على طريق ابو حدريه

اخوي توكل على الله
انا معايه لها سنتين ونص الحمد لله كل القطع متوفره تجدها عند النهدي اصلي واذا ماعنده يطلبها لك
بالنسبه للحراره الحمد لله مشتكيت منها ولا عمرها ارتفعت الحمدلله اخوي اربعه شهور كنت اداوم عليها للمدينه دوام يوميا يعني يوميا فوق 450 كيلو والحمد لله السياره ممتازه
فيه مشكله اعاني منها المكيف والسبب عين الله لايوفقه لا في الدنيا ولا الاخره
اخوي استخير والله يوفقك
واي خدمه حاضرين

والله فكره الاستعمال الامريكي جايزه لي هاذي الايام

وكنت بالبدايه بفكر بالفورد بس الحين هونت وكنسلت الفكره

وعندي حاليا حوالي 40 الف هل تكفي القى فيها كامري نظيف أستعمال أمريكي

ووين القاها بالدمام لان أكثر المعارض الي رحتها عندها بس فورد

^^^^^^^^^^^^^^^^^^^^^^^
يا الغالي 60 الف بالميل

أشكر لكم مروركم على الموضوع وانا صراحة اعجبتني موصفاتها حيل

بس بسألكم اغلب ما أسأل يقولون ماشية 80 الو ولا ستين الف
هل الكلام هذا صحيح ولا لا

اخوي عندة اكورد 2007 ومشاها فوق 140 الف
وهذيك 2002 وماشية 70 الف

صراحة شي يشيب الراس منه ؟؟؟؟؟؟؟ أفيدوني تكفون والله تاعب على الفلوس لين جمعتها
ما أبي أضيع نفسي .........

وأنتم حسبت أخواني .......شورو علي

اخوي الكريم . . .
ابي انصحك نصيحة لوجه الله تعالى . . . ويشهد الله اني ماني شريطي سيارات ولا ني مستفيد شي من هالكلام هذا غير اني ابي الاجر من الله بس . . .

انا صاحبي كان معه كامري امريكية موديلها 2001 على ما اظن وصار عليه حادث انعدم الصدام الخلفي والرفرف والشمعات والشنطه . . .
وقالوا له الوكاله القطع الموجوده عندنا ياباني وماتركب على سيارتك . . .لكن بنعطيك اسعار القطع . . .
وراح للتشليح يدور ومالقى . . .

اخر شي اخذ من شركة التامين قيمة القطع وباع السياره تشليح . . .
وشخص ثاني خرب عنده العكس وصارت له تقريبا نفس الحكايه لكنه حصل القطعه بالشليح . . .

نصيحة ياخوي . . . روح لمحلات قطع الغيار والوكاله واسألهم وتأكد بنفسك . . .
السياره اليابانيه استخدام امريكي ما انصحك فيها نهائيا . . .

والله من وراء القصد . . . والرأي لك . . .

على فكرة ترى الكامري تلقا قطعها طلبيه يمكن تجي وتراه عايدي لو ركبت بعض القطع الاستهلاكية فكلها كامري قريبة من بعض لكن انصحك اذا بتشتري مره وحدة اشتري اوريون نفس المكينه والقوة وكذا كنك شريت كامري سته سلندر ولكن يعيبها الجنوط واحيانن الاكسسورات ما عدا السلامه تعتبر عالية في السلامة هذا والله ولي التوفيق

الكامري الامريكية ممتازة جداً ولن تواجه مشاكل ابداً سوى تغير القطع الاستهلاكية ؛ والقطع متوافقة تماماً مع قطع الكامري الخليجية عداً الانوار الخلفية والامامية حيث يحتوي لون الاشارة لون برتقالي في الموديل حتى 99 اما 2001 و 2002 بصراحة ما ادري نفس الشيء او لا

وبالنسبة للحرارة ما عليك من كلام الناس الكامري ما تحتاج تغير لرديتر ولا شيء بالرغم من انه صغير وصفتين الا انه التويوتا يتحمل الحرارة في اشد الظروف وبدون اي مشاكل وهذا عن تجربة لسيارة ولد عمي معاه من 8 سنين موديل 98

كان عندي وحدة
ما واجهت مشاكل بقطع الغيار
:)
اذا حصلت شي نظيف
توكل :)