السلام عايكم و رحمة الله و بركاته
أولا ارحب في ادارة و اعضاء المنتدى اللي صراحة يعتبر المرجع الاول في الجيوب و سيارات الدفع الرباعي
ثانيا: ابغى اعطيكم مواصفات سيارتين صراحة احترت ايش اخذ منها فياليت و بالذات المجربين و اهل الخبرة يعطونا رايهم بدون تعصب وعلى بركة الله نبدأ:
أولا:
ميتسوبيشي باجيرو 2008 ماكينة 3.8 فل كامل بقوة اقصاها 269 حصان تبترونيك و دبل منفصل وبعد التجربة صراحة فيه رساوة ولا اروع صوت الماكينة يعني عالي حبتين و اضاءة داخلية زرقاء (جميلة) تندا ماشالله 90*90 زينون و مسرح صوتي بقوة 3000 واط مع 12 سماعة شاشة معلومات فنية مصغرة مكيف له شاشته و ثلاجة و جنط 18 و نقول ياباني ياباني بس البريك زي ماهو عليه ما تغير مثل باقي السيارات حيث يكون صغير و السيارة برضه تشتغل بالمفتاح مو كبسة زر و الكراسي كهربا بس بدون ذاكرة في البر اخبر كان معانا منه موديل 88 كان شي عجيب فما بالك ب2008 لكن العيب اللي قاهرني بدون شاشة(يقولولك في بشاشة زيادة 12000ريال و هي كينوود وهات 8500 اركب الاجدد من كينوود و بكاميرا خلفية) و عليه الجلد البيج تقول مركبينه من اعفن معلم تنجيد في البلد و الجلد الاسود افضل بس برضه لك عليه شوي و انه موديله 2008 وسعره 128000 ريال بدون رسوم ادارية لكن تقسيط بسعر الكاش
ثانيا:
جيب شيروكي 2009 ماكينة 3.7 فل كامل بقوة اقصاها 235 حصان بدون تبترونيك بس دبل منفصل شكله حلو اضاءة داخلية بيضاء (جميلة) مع شوية اضاءة خضرا تندا صغيرة شوي بدون زينون و مسرح صوتي 9 سماعات و شاشة بذاكرة 20 جيجابايت و نافيجيشن و ديفيدي بلايرو بلوتوث لاستخدام الجوال وهي من افضل انواع الشاشات على مستوى جميع السيارات و الشركات و جنط 18 بس البريك زي ماهو لك عليه ما تغير مثل باقي السيارات حيث يكون صغير و السيارة برضه تشتغل بالمفتاح مو كبسة زر و كرسي السايق كهربا والظهر للأسف زي التعشيق و طبعا بدون ذاكرة و نوعية الجلد اللي عليه ولا اروع و في البر اخواننا المصريين شهادتهم مجروحة فيه لكن انا للان ما جربته و يهمني اعرف قوة ماكينته و رساوته في الخط بكل أمانة وسعره 127000ريال كاش بدون رسوم ادارية بس باين عليه انه قابل للمساومة يعني ينزل 2000 او 3000
فكرت في الايدج لكن بعد ما سقته شلت الفكرة من راسي هو صحيح حلو وماكينة و لاانعم و معزول عن الخارج تماما و فخامته جدا ممتازة لكن رساوته تبقى رساوة الفورد و رميته اذا قحص و المازدا لله في الله ما عجبني و تبقى عينة هذي السيارات على ما يسمى كروس اوفر يعني مو الجيب اللي تعتمد عليه
وانا انشالله ناوي على السيارة في هذي الفترة يعني ابدا مو بعيد فياليت تشورونا عاجلا و اللي له خبرة في هذي السيارتين بالذات لا يحرمنا من رايه و يزيدنا اذا في مزايا او عيوب ما ذكرناها ولكم كل الشكر و التقدير
