السلام عليكم
أنا معي تاون كار موديل ألفين والسيارة معي لها 4 سنوات أقل شي وهذي مدة كافية أعتقد عشان تظهر عيوب السيارة ، السيارة حلوة ووسيعة وتمشي فيها عزم ، الصراحة قبل لا أشتري السيارة كنت متخوف بشكل كبير كانو الناس يحذروني منها ويقولون خراباتها كثيرة بما انها ما كانت منتشرة عندنا في ذاك الوقت مثل الحين وبعد ما حست وحست لقيت مكينتها والقير والدفرنس مثل حق الفكتوريا بالضبط فرحت وسألت عن الكروان قالولي تمام ! فقلت شكلهم ما وراهم سالفة خلني أشتريه وأتوكل
المهم أخذته وكان ماشي 40 ألف والحين ما شي 220 ألف .
السيارة وسيعة من الداخل وفيها لمسة من الفخامة أحسن من الماركيز والفكتوريا يستخدمون النيكل والخشب بكثرة في الداخلية
صرفية البنزين ما عليها والموتر أرسى من الفور والفكتوريا في الخطوط ومع اللفات
اللي يقهر في السيارة انها أفخم سيارة عند فورد فالمفروض تعطلع أفخم من كذا ومافيها ذاك التكنلوجيا مقارنة بمنافسيها من نفس الموديل يعني تركب السيارة مافي إلا المسجل والمكيف وأزارير الدركسون وزر التراكشن مافي شي ثاني
سواقة السيارة حلوة بس أحسها طويلة زيادة عن اللزوم فنادرا ما أشوف وحدة في الشارع صداماتها مهي محككة وتعبك في المواقف والزحمة شوي
يعيب السيارة ارتفاع سعر قطع غيار البودي بشكل مبالغ مثلا الاسطب الخلفي بـ 960 ريال من توكيلات الجزيرة والمرايا الجانبية منها ثلاثة أنواع وأسعارها من 700 إلى 1600 ريال ، الشمعة الأمامية كاملة بـ 1400 والزينون بـ 1900 ريال ! باب السائق بـ3400 ريال والكبوت بـ 2800 ريال < حوادثه كثيرة
على العموم موضوع قطع الغيار يهون إذا أمنت عليها فسعر تأمينها عن التعاونية بـ 2300 ريال بالسنة
السيارة أعطالها قليلة إذا حافظت على صيانتها وأشوف أعطالها معقولة
أسعار قطع الغيار الميكانيكية للقير والدفرنس والمكينة نفس القطع للكراون مع ختلاف بسيط ببعض القطع
على العموم السيارة لا أنصح بها ولكن لو كنت بتاخذ كراون أو ماركيز فليه ما تاخذ لينكون ؟!
أشوفه أفخم ويجمع مواصفات السيارتين الشكل والداخلية اللي تفرق بس
لكن كل وهواه وكلن وذوقه
ومشكورين على القراءة واعذروني إذا كان المحتوى مشتت ،،،
