الأخ الفاضل / sa97
الحقيقة الموضوع اللي طرحته يحتاج مجلدات للشرح ، لكن انا من وجهة نظري صوت بأن اسعارها مقبولة
أولا : برجاء عدم التعصب والنظر للموضوع بعقلانيه ، والا متعصب ضد تويوتا أو متعصب معها فرجاءا لا يقرأ ردي هذا .
ثانيا : ليش ما نسأل أنفسنا رغم غلاء الاسعار فالناس تتهافت على تويوتا ، لماذا ؟
معقول كل ها الناس اغبياء وجهله ومضحوك عليهم ؟؟؟؟
ثالثا : دائما لما نقارن سيارات ببعض ومن باب العدالة لازم نقارن نفس الفئة أو فئة منافسة ، يعني على سبيل المثال نقارن الكامري بالالتيما أو الاندكروزر بالباترول وعلى هذه الوتيره .
أخواني شركة تويوتا بغض النظر عن الوكيل استطاعت وبكل جدارة أن توجد هذه المعادلة المهمة في جميع فئات سياراتها ( الجودة العالية ، توفر قطع الغيار ، سهولة الصيانة ، قيمة عالية عند اعادة البيع ، الخدمة الشاقة )
الجودة العالية : يعني قلة الاعطال وايضا متانة في هيكل ومحركات السيارة وهاذي نقطة مهمة جدا خاصة في اجواء الخليج ووضعنا الاجتماعي اللي يخلي تعطل السيارة كابوس حقيقي خاصة مع رداءة الصناعيات اللي عندنا في المنطقة .
توفر قطع الغيار : يعني لو تعطلت السيارة لا سمح الله تلقى قطع الغيار بسهولة وانتو كلكم تعرفون ان قطع غيار تويوتا موجودة مثل ما يقولون في البقالات وهذا طبعا يوفر الوقت والجهد ، واصحاب بعض السيارات من غير تويوتا بدون ذكر اسماء يعرفون وش معنى هذا الكلام جيدا ، يعني لما يقعد اسبوعين أو ثلاثة اسابيع ينتظر بواجي والا كويل ، واكيد سمعتوا او عايشتوا مثل هاذي المواقف .
سهولة الصيانة : وهذا ايضا أمر مهم جدا ، يعني تعقيدات بعض السيارات تجبرك على اعمال الصيانة بالوكالة وهذا طبعا مكلف للغاية ولكن مع التعقيدات تضطر تسلم رقبتك للوكيل ، بعكس تويوتا واللي ممكن تصلحها عند اغلب الورشات العادية .
اعادة البيع : وهذا ايضا مهم ، يعني لما تشتري سيارة بخمسين أو ستين ألف وتجي تبغى تبيع بعد سنة أو سنتين لأي سبب وتعرضها للبيع وما تخسر الا 10 % أو حتى 20% من قيمتها اعتقد انه شي يستحق الاعجاب .
الخدمة الشاقة : اللي ما صدق هاذي النقطة يسأل أصحاب شركات الليموزين .
ملاحظة : فيه أحد منكم شاف واحد في القايلة في الظهر معه كورولا أو كامري أو هايلكس أو لاند كروزر موقف على جانب الطريق ومتعطل وفاتح غطاء المحرك والرديتر مبخر المويه ( اتحدى يكون احك منكم شاف هذا المنظر )
وبعد هذا اخواني تقولون تويوتا غالية ، اذا كانت كذلك فاللي ياخذونه بالبداية هو حق صيانة خمس سنين جايه ما راح تحتاج فيها صيانة بإذن الله
آسف اخواني على الإطالة ولك تقديري جميعا
انا معاك في كل اللي قلته
انا متعصب لتويوتا وكل الناس عارفيني بالذات الكامري لكن بقول لك شي
انا بعت الكامري لاجل هوندا اكورد وابتلشت فيها من خرابات ومشاكل لكن ابيك تجاوب على اللي باساله لك الحين:
1- ليش الالتيما فيها مواصفات الرفاهية افضل او مشابهة للي موجودة في لكزس فئة اي اس وحتى الاكورد ؟ وليش الكامري ما تفرق بينها وبين اللي يمسك كرسيدا 79 من قلة المواصفات اللي مافيها الا دركسون وقير بس ؟
2- ليش ارتفاع سعر سيارات تويوتا عند الوكالات وهي مصنعة في استراليا بينما وراد اليابان في السودان واليمن هو نفس سعر سياراتنا هنا المستوردة من استراليا؟
ليش الشاشات الداخلية المركبة من المصنع مباشرة ماخوذة من السيارات حتى قبل وصولها للسعودية ؟ وليش تجي بشحنة اخرى مع قطع الغيار الالكترونية الاخرى؟ هل لاجل يبيعها علينا الوكيل بسعر اضافي ؟
ليش الاكسسوارات صينية وتافهة مع احترامي ؟
انا ما اكره تويوتا الحين لا بالعكس انا ما ابي الا تويوتا وتربيت على التويوتا كل سياراتنا تويوتا
لكن ما احب اللي معه التيما يدفع اقل مني ويتهنى مثله مثل راعي اللكزس مع العلم ان مافيه احد اشتكى من كثرة الاعطال بسيارة التيما وحتى الاكورد اللي تركبها ماشاء الله من فخامتها من الداخل
انا ابي اعتمادية تويوتا وقوتها شوف الالتيما والاكورد 187 حصان والكامري مجرد 157 حصان ومع ذلك القوة للكامري
لكن فيه شي انتم ما تعرفونه في الكامري وهو القير الاوتو اللي يجي معه
فيه مشكلة مع شركة عبداللطيف وهو انهم بس يبون يكسبون وخلاص
القير الموجود مو هو نفسه اللي معتمدته تويوتا للكامري من المصنع لانه القير اللي يطلع من المصنع يجي (ستيب ترونك) نفس اللي موجود بالاوريون والقير اللي يجي عندنا هنا قير اوتو ايش العيب في القير هذا ؟
انه بس ضعيف الاستجابة وايضا ضعيف التورك والضغط يعني يسرب قوة السيارة كثير وما يعطي الانطلاقة الصحيحة للمحرك على عكس القير الاصلي اللي هو نفس قير الاوريون مع اختلاف الطنجرة فقط وهذا اللي اعتقده هذا اذا ما اكان اصلا فيه اختلاف تلاحظون ان قوة المحرك او اغلبها تروح للاطارات.
