لمالكي و مستخدمين Honda CR-V عطونا رايكم

سيارات الدفع الرباعي المتوسطة الحجم هي في الأساس صممت للاستخدام داخل المدن وهي تجمع بين ميزة الدفع الرباعي وثبات السيدان ..
بالنسبة للهوندا بصراحة الموديل الجديد متميز في شكله خاصة اللون الؤلؤي أما المواصفات ما أدري عنها ، أنا أملك اكس تريل من نيسان وهو سيارة منافسة للسي آر في، وبالنسبة لمبيعات الاكس تريل في العالم فاقت التوقعات والموديل الجديد 2008 حجز منه في الشهر الأول لطرحه في اليابان حوالي 6000 سيارة في حين المتوقع بيع 2500 سيارة شهريا، وعلى فكرة الصرفية للموديل الحالي
معقولة جدا أعبي البنزين ب20 ريال يمشي داخل المدينة 500 كلم والعزم قوي جدا وأظنه يتفوق على الهوندا 2,5 لتر بقوة 180 حصان .
وعلى العموم لا يعيب هذه السيارات كونها أربع سلندر بالعكس هذه ميزتها لأن المقصود منها أن تكون قريبة للسيدان في الحجم والصرفية خاصة إنها تأتي جميعها في نيسان وهوندا وتويوتا بصفين من المقاعد لخمسة ركاب، وأما اللي يفكر يشتري مثلا برادو فهو يأتي بحجم كبير وبثلاثة صفوف للمقاعد ولا يناسبه أبدا مكينة الأربع سلندر خاصة إنها بقوة 150 حصان ، وهذه وجه نظر .

أود أضيف معلومة عن السيارات الدفع الرباعي المستمر

أغلبهم ( تويوتا - هوندا - هونداي - نيسان - إلخ )

يمتازون بالثبات على الطريق أكثر أو قريب جداً من السيدان

والسبب الرئيس يعود لفكرة الدفع الرباعي المستمر نفسه

وليس من نظام الشركات عموماً

:cool:

سيارات هوندا محل ثقة بالنسبة للتحمل والفخامة والراحة والقوة. لكن في البر هذا أسوأ اختيار. كل المنافسين أفضل منه في البر، بمن فيهم الراف فور والهيونداي سانتافي. والمجربين يشتكون أن نظام الدفع الرباعي فيه يعمل متأخر، يعني بعد ما قد غرزت السيارة يبدأ الدفع الرباعي في العمل وقد لا يستطيع إخراج السيارة من التغريزة، مع المحرك ذو العزم الضعيف.


طبعاً أكيد ما تبغاها للبر، فلو أن الأمر كذلك خذها بدون تردد.

كان عندي راف فور موديل 2001، وكانت حقيقة سريعة جداً في الخطوط، أسرع من سيارتي الحالية فورتشنر ست سلندر. لكن كما قال الأخ أمير الأشباح، صرفية الوقود في الخطوط تزيد قليلاً بحكم الأربع سلندر. إلا أن هوندا مشهورة بالصرفية الممتازة للوقود.

صاحبي عنده وحده من الموديل القديم شوي ويمدحها وما قد سمعتها يشتكي منها بس بغض النظر على الفخامة والشكل الخارجي وش ريك بالفوتشنر بـ 100 الف فل ابشن و 6 سلندر وبتاع كله بر مدينه يعجبك ... وانت الحكم وعندك جيب جديد من نيسان بعد مواصفاته ممتازة وتتفوق على الهوندا ...والله يوفقك ولولا الأذواق لبارت السلع ؟؟:)

يعطيكم العافية يا شباب

مرحبا اخوي... آسف على التأخير لكني كنت مشغول مع الامتحانات

المثل يقولك اسأل مجرب ولا تسأل طبيب ( مدري اذا صح او لا:D )

امتلك 2007 فل بدون جلد, السيارة قمة بل روووعة في الاداء... بالخص لك تجربتي للسيارة في كلمات قليلة.

بالنسبة للمقصورة من الداخل تتفوق على اي سيارة في فئتها.. مقاعد مريحة تحس انه تحضنك وتقدر تروح تجرب هلشي.. مكيف كهربائي منفصل لمنطقتي درجة الحرارة ( يمين ويسار ) مسجل مع 6 CD changer يشغل MP3 وWMA بس للأسف مافيه مأخذ Aux مثل الموديل الامريكي علشان تشغل الi-pod مثلا مع انه موجود زر ال Aux. فيه الطبلون اكثر من رائع مع وجود شاشة معلومات في النص فيها صرف البنزين والمدى الي يوصلك فيه البنزين وعداد الكيلومتر بالاضافة إلى بوصلة. والدشبورد من الداخل مطعم بديكور رصاصي. والرؤية من داخل السيارة ولا اروع. مثبت سرعة والتحكم في الصوت في المقود. من الداخل السيارة فخمة بمعنى الكلمة وتحس فيه فرق الفخامة بين الهوندا والتويوتا.

اداء السيارة فضيع.. المحرك استجابته عالية ولا تحس انه 4 سلندر ( 2,4 i-vtec 178 حصان - محرك الاكورد نفسه ), وكذلك عن الدعس المفاجأ على البنزين ما تحس انه السيارة مطيورة مثل اي اربعة سلندر تسمع صوت المزعج عندك داخل السيارة وتقدر تجرب هلشي اذا جربت قيادة السيارة. الثبات في المعطفات ممتاز جدا بفضل نظام التعليق ونظام الدفع الرباعي.

والنسبة لصرف البنزيل شي اكثر من رائع.. طبعا يعتمد على دعسك للبنزين.. اذا خال البترول مرة تعبيها 50 لتر. لما افلفل السيارة يطلع عند ي ال Range 530 كيلومتر, في الخطوط ولا تحس بصرفها.. وداخل المدينة تمشيك تقريبا 450 كيلومتر

بكل صراحة انا كنت من الناس الي يرددون شعار ( تويوتا وبس! ) ولم اكن اصدق انه الهوندا بهذه الجودة العالية.. ولكن لما جربت اكتشفت الفرق الشاسع وتفوق الهوندا

انصحك في البداية في بالاستخارة واذا الله رد توكل على الله.. وانصحك اذا فكرت تمتلكها باضافة الاكسسوارت لانه تطلع اكثر روعة بالاكسسورات الي من عند الوكالة

السلام عليكم
بصراحة لم اجرب السيارة لاكني اثق في سيارات هوندا بشكل كبير
وانصحك بالاستخارة
بالبتوفيق

لم أجربها لكن ولد خالي عنده وحدة بس الموديل اللي قبل الحالي
الموتر ممتاز و ما عليه كلام
مكينته قوية
يتحمل الكرف
الراحة ليست بالحد المطلوب لكنها تفي بالغرض
التعليق هو أكثر ما أعجبني فيه ... ناعم كأنك تسير فوق السحاب
ثباتها مميز جدا .. يعني تقارع السيدان بالثبات
يعيبها صرفية البنزين عالية نوعا ما
بالنسبة لي أراها ثاني أفضل سيارة بفئتها بعد الراف فور

ما أدري عنها

من ناحية الشكل روعة

لكن رأي أنصحكم بالسيارتين هذولي

.1.
Hyundai veracruz






.2.

Hyundai santa fe





|3|

TKT نفس التساؤول أخوي عندي أنا بعد ؟؟
ودي لو أحد من المجربين الفعليين لهالسيارة يكشفون عن حقيقتها
لأني والله عازم عليها ورأيي من رأي أخونا happeyman إذا شفتها تلفت إنتباهك بقوة :eek:
أفيدونا يامجربين صرنا أثنين ... وعلى فكرة إذا ممكن نجد 6 سلندر على مستوى الخليج للي يعرف عنها ؟

أنا ما أنصح أربع سلندر فورويل

لأن هب قوي مش مال خطوط تصرف بترول بشكل غير طبيعي طبعا في الخط

دور على الستة سلندر أذا في بنفس القيمة

والله أن عند صديقي وحدة قومة حلوة لكن بعد170 كلم تحس أنها هب قادرة تكمل تقول خلاص

دور على السته سلندر لأن الأربعة في الخطوط يصرف وفي الرملة أذاكنت محمل يترفع عندك الحرارة بسب قدرة السيارة الضعيفة ((هذا الكلام حق الأربع السلندر بشكل عام فورويل ))