ابي رايكم في هالسيارات ..لو كنت مكاني وش تختار؟؟

لعلمك الماونتنير ما فيه دبل ثقيل.

مشكور اخوي الخل الوفي ويعطيك الف عافية
انا امس جربت الماونتنير (نفس مركب الاكسبلورر) بصراحة مريحة جدا ما كأنك راكب جيب بس انه عزمة ضعيف شوي وثقثل

مشكور اخوي حمد
وياليت تعطينا رايك اذا عندك خيارات اخرى

كلمة دبل من Double هذا صحيح، لكن ما حد يقول على دبل السيارة Double بين صناع السيارات أو هواة الجيوب المتحدثين باللغة الانجليزية، ربعنا هم إللي سموه دبل. وهذا إللي أقصده بقولي إختراع محلي.

لكن قولة إن دبله الثقيل ضعيف، هذا غير صحيح. ميزة الدبل الثقيل إنه يعطي عزم عالي للسيارة لتجاوز العقبات بغض النظر عن قوة المكينة. وتعتمد قوته على نسبة القير فيه. ونسبة القير في الاكسبلورر 2.4:1، أي نفس نسبة القير في علبة الدبل في اللاند كروزر، فهو ليس ضعيف.

عيبه في البر انخفاض الخلوص الأرضي وزواياه السيئة، وعزم المكينة في حالة عدم استخدام الدبل الثقيل ضعيف.

إذا كنت راعي بر لازم تعيد النظر في اختياراتك

اخوي الخل الوفي

كلمة دبل ليست اختراع محلي كما تظن
للمعلومية ولو انه ليس موضوعنا كلمة دبل مأخوذة من الانجليزية double وتعني مضاعف او مزدوج
ودفع رباعي او دفع مزدوج حنا نسميه دبل نسبة الى الكلمة double بالانجليزية


وباسمع نصحيتك وباخذ دبل ثقيل ولو ان الاكسبلورر دبلة الثقيل حسب كلام الاخوان ضعيف ماينفع في البر

أصلاً كلمة دبل إختراع محلي، يعني كيفما استخدمته لا يعتبر خطأ.

الشاهد، لا تاخذ جيب بدون دبل ثقيل.

مشكور اخوي Automotive
انا بصراحة عاجبني الاكاديا شكله خطير بس مافيه احد مدحه لي يمكن لانه جديد
الاكسبلورر انا عاجبني بس مو مثل فخامة الاكاديا

اخوي الخل الوفي يعطيك العافية
للمعلومية اي دفع رباعي تتحرك فيه الاربع كفرات يسمى دبل سواء ثقيل او خفيف
وسمي دبل 4x4 لان الكفرات الاربع كلها تتحرك دبل الكفرين 4x2
الكفرين هو الدفع العادي والاربعة دبل

طبعاً أخي وبما أنك ذكرت أربعة خيارات فقط ، فلن أخرج عن هذه الخيارات بالرغم من وجود عدة بدائل للسيارات المطروحة ، وعلى كل حال فلم تذكر متطلباتك واحتياجاتك من السيارة ( فالكابرس سيارة سيدان كبيرة الحجم وهي مريحة ومحركها قوي ولكن أنا عندي قناعة شخصية باستحالة أن أشتري هذه السيارة ، فقد أقبلها كهدية أو قد أستأجرها عندما أسافر من هنا أو هناك ، لكن أشتريها فهذا محال ، لأنك باختصار تحتاج إلى ورشة خاصة بالقرب من بيتك ، وهذا الكلام ليس افتراء بل هو والله مشاهدات من أناس قريبين لديهم هذه السيارة ومحافظون عليها جداً لأنهم من كبار السن ومع ذلك لا تخلو من المشاكل ) أما الخيارات المتبقية فهي سيارات من نوع SUV أي متعدد الاستخدامات وبدأت هذه السيارات تلقى رواجاً كبيراً في دول العالم بشكل عام ودول الخليج بشكل خاص ، وقد يعتمد ذلك إلى وجود المناطق الصحراوية وحب الناس هنا إلى الطبيعة .

أنا عن نفسي أرتب الخيارات كالتالي ( أكسبلورر ، أكاديا ، إيدج )
ونصيحتي جرب كل واحدة من هذه السيارت داخل الحارات وعلى طريق سريع بسرعة متوسطة ، ليتضح الفرق .

هذا الزر إللي يشغل الدفع الرباعي ما هو دبل. الدبل إللي يكون فيه دبل خفيف ودبل ثقيل، وهذا غير موجود بين السيارات المذكورة إلا في الإكسبلورر. وسبب تسميته دبل في تصوري إنه يدبل قوة السيارة، مع إنه فعلياً يعطي أكثر من دبل قوة السيارة في معظم السيارات. وبعض الجيوب القليلة جداً دبلها يعطي أربع أضعاف قوة السيارة، مثل بعض موديلات الرانجلر الجديد والهمر H2 و H3 Offroad.

مشكووور اخوي الخل الوفي على المعلومات.

مشكور اخوي عمر
انا امس رحت شفت الباجيرو شكله لابأس من الخارج ومن الداخل روعة
بس كيف قطع الغيار والوكالة؟

مشكوووور اخوي محمد
الحافظ الله اذا انت ماتطعس في اماكن خطرة ان شاء الله ماعليك خوف
اما في الطريق العام الوضع آمن ان شاء الله

مشكوووور king car234
بالنسبة للأكاديا اللي يشفعلها انها من جي ام سي

اخوي الخل الوفي هي كلها فيها دبل بس الاكاديا والادج دبل مستمر
والاكسبلورر مفصول

وانا اقول بغض النظر اقصد رايك من ناحية الشكل فقط

السبب سلمك الله إنه الجيب لازم يكون الخلوص الأرضي فيه عالي، وبالتالي يضطروا أن يرفعوا مركز الثقل في الجيوب. وعند ارتفاع مركز الثقل يكون عامل الطرد المركزي عند الالتفاف في المنعطفات قوي جداً، يزيد من احتمال انقلاب السيارة بشكل كبير.

ولذلك فهذه نقطة مهمة في اختيار الجيب: تسأل عن ارتفاع مركز الثقل. وما فيه أحد يسأل عنها، لأن معظم الناس ما يدرون عنها. وكل ما كان مركز الثقل أكثر انخفاضاً كل ما كان تصميم الجيب أفضل. على سبيل المثال، أفضل جيب في انخفاض مركز الثقل هو الهمر H1، ومع ذلك، فهو أفضل الجيوب في الخلوص الأرضي، وهذا من أسرار سعره الباهظ.

والله يااخوي خياراتك مو شي ..
والاكسبلورر افضل السيئين ..
بس دام انك وصلت لسعر اكسبلورر فكر بالهوندا ام ار في .. وربي مركب مو طبيعي وهو الامن في جيوب فئته من الياباني والامريكي ..
صناعته كندية بس الهوندا يظل هوندا قوي جدا عالخط وخراباته واعطاله حسب اخر بحث جرى على 70 الف سيارة انه اقل جيب في العالم اعطالا ..
عند واحد من الشباب السيارة .. والغريب من شدة تعلقهم فيه الحين اخوه يفكر يشتري نفس السيارة نفس الموديل نفس المواصفات ..
عن نفسي اشوف انك تفكر بهالخيارات من الجيوب بالترتيب :
1- هوندا ام ار في
2- تويوتا برادو
3- ميتسوبيشي باجيرو

ومن السيدان :
1- افالون
2- اكورد ستة سلندر فل بـ 92 الف ريال (( عليها عرض ))
3- فولفو اس 80 تي 5 الشكل الجديد (( حطيتها الخيار الثالث لان شكلك مو من عشاق الاوروبي )) سعرها 129 الف ريال ..