أفضل ورشة للفورد .. بالرياض

[سامي 999]

السلام عليكم ،،

..

مساء / صباح الخير جميعا ً

أحبّتي الكرام

عندي استفسار بسيط :

اشتريت فورد كراون فكتوريا 97 ( سعودي ) بودي وكاله -ولله الحمد-

لكن يحتاج لصيانة مثل :

1- تصفية ماكينة
2- ميزان (مساعدات وأذرعة ...إلخ)
3- فيه صوت خفيف في الكرونه إذا وصلت 80 وإذا زادت السرعة يختفي

..

يا ليت من إخواني أعضاء منتدى السيارات يدلّوني على أفضل مهندس أو ورشة متخصصة في الفورد ! ( بالرياض )

ولكم مني كل الشكر والدعاء

وفقكم الله

[احب ترابك يانجد]

هلابك اخوي الله يعطيك خيرة ويكفيك شرة تصفية المكينه
1- البواجي واسلاكها
2-صفاية البنزين
3- السير
4-فلتر هواء
5- منظم البنزين ان احتاج تغيير يغير وتغييرة افضل
6- تسييخ الرديتر مع تغير البلف حتى لو مافيه حرارة ضروري جدا الغرض منه تنظيف المكينه وتقليل مشاكل خراب طرمبه الماء بسبب التسدد بالرديتر اذا كان متسدد
7- التشيك على خراطيش الماء وتتغير اذا كانت تحتاج تغير
8- الفحمات الامامية والخلفيه وان انت بنصف عمرها لاباس بها خليها وغيرها بعدين
9- تغير فلتر القير مع زيت الطنجرة بهالحاله راح ياخذ 12 علبه زيت
10- التشيك على صليبات عمود الكردان
من ناحية الاذرعه
1- اذرعه قصيره 2 داخلي و2 خارجي
2- ذراع شاص
3- ذراع الدوده
4- 2 ركب فوق 3ركب تحت ويفضل تكون الركب بمشاحم من نوع موج افضل
5-جلب مقصات فوق وتحت ونادر خرابها لكن شيك عليها
6- مسامير عمود التوازن مع جلب عمود التوازن

واسف ع الاطاله لكن هذا المجمل بالتشييك الكامل لكن ان احتجت اسعارهم انا حاضر لكن شوف وش الخربان عندك وشيك عليهم اللي خربان غيرة اذا امكانياتك تمام
ومن ناحية الونه بالدفرنس عند 80كم اذا كانت بشكل خفيف هذا طبيعي وخصوصا عند تبديل القير من الثالث الى الرابع وبعدها يختفي الصوت لكن شيك على زيت الدفرنس احتياط واسف ع الاطاله واي شي تحتاجه حاضرين وبالتوفيق.........

[سامي 999]

بيّض الله وجهك ما قصّرت

كتب الله لك الأجر لنفعك أخوك المسلم

[احب ترابك يانجد]

امين وياك وكل مسلم و الورشة فيه ورشتين بصناعيه الشفا هم افضل شي من ناحيتي مركز النشوان وورشة عبدالعزيز النافع لكن عبدالعزيز النافع افضل لكن يبي لك تكون من بعد العصر مباشر عشان تحصله وهو يفيدك اكثر انا ماجربته لكن يمدحونه واسمع به من قرايبي ويصلحون عنده وسعودي واخير لك من اللي ماهم من ثوبنا 100 مرة وبالتوفيق........

[سامي 999]

ألف شكر أخي الغالي ..

أفدتني كثيراً

..

ننتظر إضافات من الأحبّة

خصوصا ً عن أفضل الورش ، ويا ليت تكون شرق الرياض

[مركز جوانا]

حيااك الله اخي
مركزنا عزيزي بشرق الرياض
ولا ندعي باننا الافضل
لكن اجزم باننا من القله القلائل في فحص سيارات الفورد بالجهاز الخاص بها
وعمل الصيانه اللازمه لعملائنا دون تهويل او ابتزاز
صاحب المركز

[سامي 999]

مركز جوانا

طيب ؛ يا ليت توصف موقعكم الله لا يهينك

[سامي 999]

من عنده إضافة فلا يبخل علينا !؟