بسافر بسيارتي ولاكن

سيف22 @user_83017 · 10-07-2009

السلام عليكم ورحمة الله وبركاته

اخواني انا ان شاء الله ناوي اسافر على سيارتي ولاكن عندي بعض الاستفسارات

عندي الريديتر حاط في مويه عايديه تقريبا قبل 6 شهور هل تنصحوني اني ابدلها بماء
الريديتدر الاحمر

والحمدلله لم الاحظ اي شيء على حراره السيارة ولاكن قالي بعض الاخوة ان الماء العادي ممكن
يسبب تأكل للمكينه
واذا تنصحوني بتغييره رجاء ابي احد يدلني على محل ريديترات في الرياض لان مو كلهم واحد

بعضهم يفضي الماء الوسخ ويصب على طول الماء
الاحمر بدون تنظيف الريديتر

الشيء الثاني هل تنصحوني اغسل المكينه بستم بدل نفخها بالهواء لانها مغبرة مرة وعليها
بقايا زيت

الشيء الثالث عندي كفرات سيارتي تاريخها 2007 هل يستوجب على تغييرها ام ماذا؟

وجزاكم الله الف خيــــــــــــــــــر

وليد وبس @user_166165 · 12-07-2009

اخوي عبها مويه خضرا اسديلكو والباقي مويه مقطره نصيحه مني

وانتبه تحط فيها مويه عاديه راح تملح وتصدي انتبه تحط مويه عااااااااااديه

المويه الخضرا تبرد السياره بجد ولك وللزمن

ابولمياء @user_168528 · 11-07-2009

اخوي الله يحفظكم في سفركم وترجعون سالمين..

اما بالنسبة للسيارة وخصوصآ لومينا ضروري تغيير الكفرات جونا حار والكفرات التسلخ مع الحرارة .. مره رحت الامارات وشكل كفرات سيارتي اوكيه بس تاريخها قديم وشيكت مع البنشري وقال لي : لو تبي تروح لأوروبا ماعندك مشكلة ؟؟؟؟
وتفاجأت بعد مادخلت لأمارات انسلخ الكفر وغيرت السبير ومشيت عشرين كيلو وانسلخ الكفر الثاني وصار يومي يوم وركبت سيارتي على سطحا ووديتها لورشة في ابوظبي وقالي المهندس لابد من تغيير الكفرات بسبب عوامل الحرارة عندكم ؟؟
هاذي سالفة الكفرات اللي عكرت علي سفري وخسرت غير قيمة الكفرات قيمة السطحه 400 درهم.. والأنتظار الممل فنصيحتي غير الكفرات وخصوصآ مر عليها سنتين سلامتك انت وعيالك تفداها فلوس الدنيا ..

تقبل تحيات اخوك..

سيف22 @user_83017 صاحب الموضوع · 10-07-2009

المارودر 2004 شكرا لك وارحم الله والديك وبالنسبه لنوع السيارة لومينا 2002

Angel1 شكرا لك وجزاك الله خير والحمدلله الكفرات ليست بالسيئه

LTZ V8 الف شكر وجزاك الله الف خــــير

حبيب أمه الله يخليك لعيينن ترجيك وفعلا كلامك في محله اكتفي بنفخها بالهواء افضل

الجوكي بيض الله وجهك ولاكن كم سعر النتيتروجين للكفرات الاربع

الجوكي @user_169343 · 10-07-2009

اخوي الشباب ماقصروا
بس انصحك انك عند تغيير الكفرات لا تحط هواء عااادي
حط هواء نيتروجين ينفع مع حرارة الصيف العاليه
وانا مجربه -طبعا سيارتي كابرس-

حبيب @user_128378 · 10-07-2009

كل شي ولا تغسلها بستم
أنا مره غسلت سيارتي بستم مع إنه كلهم نصحوني ويوم غسلتها وقاعد اشغلها مااشتغلت معاي وكلفتني 500 ريال حق قطعه علشان تشتغل
وعلشان الرديتر بالأفضل تغير المويه والكفرات حسب نظافتها

! LTZ V8 ! @user_167943 · 10-07-2009

الشباب أفآدوك .. , ’

بالنسبـة للكفرآت يالغالي رح شيّـك عليها عند بنشري .. أو إنت شيك عليها .. إذا نظيفه والله مآله لزووم التبذير .. , ’

محبك

The_Game @user_133527 · 10-07-2009

بالنسبه للكفرات اذا شفتها مستهلكه غيرها اما اذا كانت جيده مالو داعي
والرديتر اذا كانت الحراره عاديه بس شيك وشوف اذا يحتاج تغيير ولا
اتمنى افدتك

المارودر 2004 @user_47732 · 10-07-2009

الافضل تغير موية الرديتر (علبه من المويه الخضراء والباقي موية مقطره ) وتنظف مجاري دورة الماء في السيارهـ

والمويه العاديه لها ضررها على السياره خاصة طرمبة المويه ومع مرور الوقت تجد فيها تاكل وصدا وملوحه بسبب الماء العادي

ولاتغسل المكينه بالماء لانها قد تضر بالكويلات او البواجي وتسبب لك تقطيع انفخها فقط بالهواء او قم بمسحها بمنشفه مبلوله

وبالنسبه للكفرات تاريخ 2007 قديم وله اكثر من سنتين وعند شراء كقرات لابد من الانتباه لتاريخ الصنع لان الاطارات لها عمر افتراضي غالبا لاتزيد عن سنتين

الافضل انك ماتسافر على الكفرات القديمه خاصه الان في فصل الصيف وحرارة الخط لها ضررها على الكفرات

على فكرهـ ماهو نوع السيارهـ ؟؟