مشكور اخوي* محمد * على الموضوع الرائع ...
انا ماعندي الكثير من المواقف الطريفة مع رجال المرور ..
ما عندي الا المواقف العصيبة .. مواقف كان فيها صراخ و هواش و توصل بعض الاحيان للضرب:D
ما اذكر الا موقف طريف واحد حصل لي
صار لي هذا الموقف الطريف قبل سنة ...
كنت طالع بشبح أسود S320 .. الشبح مشمبر و من داخل الجلد مشقق و حالة السيارة بشكل عام أسوء مما تتصوره .
المهم كنت راجع الساعة ((3)) الليل من محطة مــيــد وقفتني دورية .
سلمت عليه و سلم عليي ...
قال لي : ليش منت رابط الحزام
قلت له : تراه الحزام خربان
قال لي : كيف خربان و السيارة توها جديدة انت تلعب عليي
قلت له : العب عليك .. شوف السيارة مشمبرة و الجلد من داخل مشقق .. حتى المسجل مافيها لاني شلته علشان اصلحه .. و قلت له هذا بعد المكيف خربان .. و تحريك الاسيات خربان ..
قال لي : حرام .. ليش تلعب بالشبح كذا .. السيارة توها جديدة
قلت له : حبيبي .. هذه الوالد شراها من المانيا قبل 11 سنة ... يعني 11 سنة ابويي يلعب بها و العب بها انا و كل حارتنا يلعبون بها . و ما تبيها تخترب :D
((( راعي الدورية شفته داخ ))
قال لي : اذا قبل 11 سنة عندكم .. يعني هذه الشبح موديل 92
قلت له : ايوة
قال لي : الشبح ما يجي الا موديل 1998 او 1999 او 2000 او 2001 او 2002 او 2003
(( المهم راعي الدورية ما صدقني الا لما جبت له الاستمارة و ما ارتاح الا لما قرأ 92 حتى انه تأكد ان الوالد هو أول مالك للسيارة))
بعدين مسكته على جنب و فهمته للسيارت .. علمته موديلات الشبح و عطيته نبذة مختصرة وقلت له ان الشبح صار قديم .. وان في سيارة مرسيديس احسن من الشبح و ما صدقني الا لما وديته بيتنا و فتحت له الكراج و راويته الفياغرا ال 2003
وحتى يصدقني اكثر .. طلعت له اسمارة السيارة علشان يقرأ موديلها ...
والله راعي الدورية هذاك منسم و شكله كان عايش بالمريخ
شكله عايش بكهف !!
