كما وعدتكم سابقا...ولفائدة جميع الاعضاء سوف اذكر بعض الطرق التي تستطيع من خلالها معرفة ما إذا كان إطار السيارة يحتاج إلى الإستبدال او لا
هناك طرق عدة وسأذكر المشهور منها:
1- الطريقة الاولى: وهي بإستخدام أداة قياس الدعسة او مايسمى ب Tread Gauge وهي عبارة عن أداة صغيرة على شكل مسطرة يكون طرفها من جهة الكفر عريض وهناك قلم ينزلق في الشق الموجود وسط دعسة الإطار بحيث يعطيك قراءة عمق الدعسة Tread Depth
وهذه صور لها:
وهناك أنواع اخرى رقمية :
طيب ماهو أقل عمق للدعسة بحيث يجب عندها تغيير الإطار؟
أكثر صانعي الكفرات يحددون عمق الدعسة ان لايقل عن 1\16 من الانش اي مايعادل 1.6 ملم
2- الطريقة الثانية: وهي بإستخدام عملة البنس الامريكية
كما هو معروف ان البنس الأمريكي (Penny) عملة معدنية مصنوعة من البرونز وعليها صورة أحد تماسيح شيبان أمريكا المنتهية صلاحيتهم منذو مبطي وهو الرئيس الأمريكي السابق ابراهام لنكون
طيب وش علاقة لنكون بدعسة الكفر؟ الظاهر والله اعلم ان فيه موتر توطاه وهو ماشي على رجليه في احد الشوارع (اكيد ماشي على رجليه اجل على راسه! ) ولقو آثار دعسة الكفر على وجهه وكانت واضحة ومن خلالها حددو نوع الاطار وصادو الرجال اللي توطاه
شكلكم دخلتو جو مع الفلم الهندي هذا؟!!
طيب انسو الكلام اللي راح وخذو العلم اللي Freezing على ال moustache
يتم وضع البنس الامريكي بشكل مقلوب داخل الشق الطولي في الكفر بحيث يكون رأس لنكولن مقلوبا..ويتم النظر من جانب الإطار..فإذا كانت خشّة لنكولن (المقلوبة) وخصوصا شوشته داخل الدعسة معناتها ان الدعسة عميقة ولايحتاج الإطار إلى تغيير
اما اذا كان راس لنكولن (المقلوب) ظاهر كاملا فمعناته ان الدعسة غير عميقة وتحتاج إلى تغيير
هذي صورة توضيحية:
طبعا مثل ماتلاحظون راس لنكولن غاطس حده بالدعسة معناته ان الكفر سليم
اما لو كان راسه كامل واضح للعيان معناته ان الكفر يحتاج لتغيير
طبعا المسألة ليست دقيقة بما فيه الكفاية ولايعتمد عليها كثيرا
بعدين تخاف ان فيه واحد سبيكة يبغى يشيك على الكفر ثم يرسل على الخاص ويقول لي: كم قيمة التذاكر من هنا لأمريكا؟!!
3- الطريقة الثالثة: وهي الطريقة الناجحة والتي لايعرفها الكثيرين وقد يتفاجأ البعض من هذه المعلومة...ويكفي انها الطريقة المعتمدة لدى رفيع الشأن شخصيا (تكفى! )
هناك يااحباب مربعات صغيرة تربط بين خطوط الدعسة المتجاورة..وتكون عادة بارتفاع اقل من دعسة الكفر وتسمى بال Wear Bars أو Treadwear indicators
وهذه صورة توضيحية لها:
داري ان اكثركم بينقز يم موتره يشيك اذا هالخطوط موجودة بالكفرات او لا :D
ببساطة شديدة...عند مسح الدعسة ووصولها تماما لمستوى سطح المربع الصغير المذكور Wear Bar هذا يعني انه قد حان الآن موعد تغيير الإطار
اما اذا كان مستوى الدعسة فوق المربعات المذكورة معناته ان الكفر باقي فيه عمر ..اهم شي تأكد لايكون فيه طقوق تقول كنه شطوب في رجلين مقاول
الشقوق اللي في الكفر حالة استثنائية,,ويجب عندها تغيير الإطار بغض النظر عن ارتفاع الدعسة..هذي معلومة يجب ان تكون واضحة لدى الجميع
اهم شي لايطلع لي واحد ذهين ويقول لي: طيب لو كانت الدعسة اقل مستوى من مربعات ال Tread Bars وش اسوي بالكفر؟
في هذه الحالة : يجب على صاحب السؤال ان يبيع سيارته تشليح ويطقها كعابي ابرك له واريح لنا :D
نقطة أخيرة هامة:
عند استعمالك لاي من الطرق الثلاث المذكورة سابقا, تأكد من عمل الاختبار في اكثر من موقع من الإطار..حيث ان بعض الإطارات تكون ممسوحة من الجانب فقط ومن المنتصف حالتها جيدة...وهذا يعني حاجة السيارة لعمل ميزان
والكفر في هذه الحالة يقدر بحسب الوضع الأسوأ
حيث ان الاعتبار في هذه الحالة هو للجانب الاكثر مسحا وبناء عليه يتم اتخاذ القرار
معليش طولنا عليكم بس اتمنى ان يكون في الموضوع ولو جزء يسير من الفائدة
وتقبلو تحياتي
