السلام عليكم
عندي سياره جيب ليبرتي 2009 جبتها من كندا عدادها 77000 كيلو
الموضوع اني جبتها على البر من كندا الى ليبيا ودخلت بيها الحدود وكان المسافه لمكان سكني 300 كيلو
المهم مشيت بيها مسافه 100 كيلو واشر عندي تشك موطور وكانت الطريق مافيها انسان ماشي
الحقيقه اني ما وقفت وكملت اشرت عندي مؤشرات ثانيه الحراره والبطاريه والدراولك وكثير حاجات
نوضح انه في مشكله كبيره صايره بس الحقيقه اني ما وقفت لانه كانت طريق خاليه
المهم ممكن 50 كيلو والسساره بدت بتوقف خلاص وكان في مسجد قريب مشيتها لحد المسجد ووقف
شفت الماطور كان مولع لقيت السير اللي بيدور البومبا متاع الميه مفكوك والبومبا تبع الميه مكسوره
كملت بيها على رافعه لحد الورشه
غيرت البومبا لقيت المشكله متاع الحراره مزال موجوده فكيت الترموستات ظهرت مشكله الميه انها تخلطت مع الزيت
وقالي الميكانيكي نجرب الماده اللي تسكر التسريب .....صبيناها ما نفع ...وظهر صوت تخبيط بالماطور من الاعلى ...
المهم قالي الميكانيكي لازم انزل الماطور ونفتحه ونخدمه خدمه جديده والعمليه تكلف حوالي 1800 دولار
دهبت الى متخصص في الجيب قالي لو انك تغير الماطور افضل والتكلفه تكون 2500 دولار
حسبتها براسي وقررت اغير ماطور واريح راسي ... دهيت الى مكان يبيعو فيه قطع غيار تتفك من السيارات المصدومه
ولقيت ماطور جديد يعني السياره مصدومه وهيا جديده وصدمتها من الخلف يعني جديده من الامام وماطورها جدبد
لاحظت شيء غريب ....السياره اللي وقفت عليها وعجبني ماطورها ....فيها مروحة تبريد راكبه مع بومبة الميه وتبرد في الرداتوري
وسيارتي من الاصل ما فيها ...سألت كيف صار ...جماعه الماطور ما عندهم خبره كيف صار وقالولي ممكن المروحه متاع سيارتي تكسرت ووقعت
الحقيقه انا دخت وما عرفت انه السياره اللي جبتها وقعت منها المروحه هدي والا هيا مافيها من الاصل وقلت لو وقعت على الاقل خلت اثر
بصراحه غلطي اني ما وقفت بس نصيب
لو في حد بيعرف انه المروحه هدي وقعت او موجوده من الاصل يفيدني لان رح ركب الماطور الجديد بس ضاف عليا سعر المروحه 150 دولار ...
شكرا بارك الله فيكم
المشكله عندك من الاساس ان السير مقطوع وهو اللي يحرك طرمبة الماء وهذا اللي سبب ارتفاع حرارة السياره وبالتالي تضرر المكينه
بالنسبه للمروحه اعتقد ان المروحه اللي تقصدها هي مروحة تبريد اضافيه وبما انك جايب السياره من كندا مايركبونها بحكم الاجواء البارده اما السياره اللي حصلتها اكيد انها مخصصه للاسواق في المناطق الحاره او ان صاحب السياره مركبها والله يعوضك خير ان شاءالله
