المسأله تجميع دراهم - موضوع لنقاش -

[كابـــSSـــرس]

بسم الله الرحمن الرحيم

السلام عليكم ورحمة الله وبركاتة

مساكم الله بالخير جميعا

الموضوع عن تضليل السيارات بالكامل - تكتيم- لذلك وضعته في العام لتوضيح


مقدمه :-

شمسا حارقه - جامعه اكثر من 5 ساعات ناطل موترك في الشمس وطبعا شمسنا معروفه

ماترحم الله ينجينا من عذابه

المهم ندخل في الموضوع

انا مسوي تضليله للموتر كامل 01 من الصيفيه يوم دخل فصل الشتاء شلت الامامية وخليت الي على جنب

المهم ياخوان رحت لدمام مرتين ومريت داخل مدينة الرياض بأكثر من تفتيش

اليوم وانا في حي الشفا بجنوب الرياض طحت في مركز تفتيش في حاره لنركز على كلمة حاره

دوريه وحده مسويه تفتيش المهم ياخوان كان فيه جنديين وملازم جالس في السياره

جيت وقال لي اثباتك والاستماره قلت له سم عطيته الاحوال والاستماره قال لي بالحرف الواحد

وانت وخشتك تتمشى ومامعك رخصه ؟؟؟؟

اسلوب استفزازي قلت له انت وش طالب الاثبات الشخصي الاحوال تكفي

المهم عطيته الرخصه واظاهر خلاها استقعاد قال ومضلل الاماميه

شرحت له شمس وبعدين منظر ووووو من الكلام

قال لي ارفع القزازه قلت ابشر << مسوي محترم

قال وبالحرف الواحد : انت عاد ماتستحي مضلل كامل وجاي تتسيف

<<< في هذه الحظه الانبير وصل H وطل دخان مع اذني

قلت له انت وش تبي بضبط تراك عاد تعديت حدودك

قال ابيك تشيل التضليل الاماميه قلت بس ابشر << مسوي بارد ومن جوا مولع

جيت افك الى وابو الشباب حط دفتر القسايم على الكبوت قلت وش تسوي

قال احرر قسيمة تضليل

<< الضغط يولد الانفجار << صارت عليه هذه المعادله

انا شلت يده وقلت والله ماتكتب وارتفعت الاصوات والناس يناظرون

المهم اتى لنا الملازم قائلا : << ترى ذا الجمله متعوب عليها

سلامات وش فيك

قلت كيت وكيت والرجال ماخذها استقعاد والسالفه

قال له الجندي القصه واخر كلامه هو فعلا مادعاني لكتابة الموضوع

وهي :-

ياطويل العمر تبيني اكتب مخالفه واخذ عليه تعهد

يعني السالفه شفط فلوس واستقعاد للعالم

راح الملسون وجاء الضابط والشهاده لله فعلا كان رجل خلوق وطيب

قلت له ان القصه كذا وكذا وانا جاي لستراحه لانيب ادور وانا اصلا من شمال الرياض

وعطيته من ذا الكلام وفهم وقال لي ان التضليل الكامل غير مسموح به على شان الارهاب

ولازم العسكري يشوف السياره كامل من الداخل

وقال للعسكري :-

خلاص خله يروح بكل بساطه ؟

ورحت لافكيت تضليله ولاخذت قسيمه بس الي خلاني اكتب الموضوع


عدة محاور :-


هل المواطن ضحية اخلاق االعسكري يعني اذا كان تافل العافيه الله يعينك انواع الاستقعاد

هل الغرض من الحملات التفيشيه وفي مواقع سخيفه هي من اجل المال ؟

لماذا لايكون هناك دورات تدريبيه لبعض الجنود وكيفية التعامل مع الاخرين؟

من اجله فئه تندمر سياراتنا من الشموس وللمعلومية الارهابين مايضللون

والدليل الاحداث الاخيره يعني عذر غريب صراحه ؟


اتمنى من الجميع ان يفيدنا بالمعلومات او قصه حدثت له



تحياتي للجميع

[azoOoz 100]

والله موضوعك اخوي في محلــــــه ..

بقولك سالفه صارت قبل 3 سنوات لواحد من الشباب

وكنت انا معه ..


كنى نفتر بالشوارع وكانت السياره مضلله تضليه نيكل خفييييفه مره

ومركب اريل في الخلف وكان بو الشباب مو رابط الحزام

المهم وشوي اللي وذيك الكبسوله تكبس ونصفط وطلب الرخصه والاستماره

والحبيب مامعه رخصه والعسكري خذ الاستماره والاثبات وقالنا الحقوني ع القياده

ورحنا هناك وجاء العسكري وقاله انا الحين بعطيك تعهد انك ماتسوق الا لمن تطلع رخصه

وبعطيك 4 مخالفات بعد :

1- عدم حمل رخصه قياده

2- تضليل << مع ان التضليله نيكل خفييييفه اللي داخل السياره واضحين مركبها بس شكل

3- الاريل

4- عدم ربط حزام الامان


المهم يمسن يسار ودبر خويي واسطه تطلعه من هالورطه بدال لايجي احد يكفله

وبعدها كلم خويي خويي العسكري وماادري وش قاله وجانا العسكري

وقال ليه ماقلتلي انك تعرف فلان ومن هالكلام الزين ,, وبعدها عطى خويي الاستماره

واثباته وخلانا نمشي .....



وبسسسسسس

ادري اني اشقلتكم بقصتي بس وش اسوي حبيت اشارك بالموضوع





تحياتــــــــــي

[مخربها]

السلام عليكم ....


يا ابن الحلال اقسم بالله فيهم ناس ما يعرفون انواع السيارات اساسا ... واحد من العيال معاي لينكون LS يوصل التفتيش وعليه بلاغ سرعه ويلغاهم يناطرون في السياره ولاهم عارفين وشي ... يسمعهم يعلمون بعض بأوصاف السياره ..

قبل فتره كنت عند الفيصليه عند البوابه الثانيه اللي امتداد طريق الثلاثين تقريبا الساعه 1 بالليل والشاره فاضي دق علي واحد من الشباب وقالي وقف عندك بجيك دقيت الريويس تقربا 10 امتار الا الفكتوريا الدوريه وراي يقولي اطلع قدام سحبت عليه ووقفت الا ابو الشباب وقف الدوريه وجاي على جليه وقالي هات الرخصه والاستماره قلت له ليش ؟؟ قالي عاكس الطريق ؟؟؟

قلت له انا داق ريويس يخوي وشو اللي عاكس قالي مالي شغل انت عاكس ... شفته عبيط لقاني بهالليل ويبي يوسع صدره علي ويزحلقني بكم مخالفه حاولت اتفاهم معاه بس مافيه فايده وراح ركب الدوريه وقالي هات اثباتك انت اللي ومعك واستمارة السياره وصك الباب وهو فاتح القزازه قلت له طيب رحت واخذت اللي يبي وتسندت على شباك الدوريه ووجهي بوجهه وقلت له هذي الاوراق بس قبل لا تكتب المخالفه ابي اسالك سؤال .. قال وشو .. صكيت الابتسامه العريضه بخشته وقلت له وش بتكتب في المخالفه قالي عاكس الطريق قلت له ابيك تكون انسان حقاني وتخاف الله مثل ماهو واظح عليك العدل ماشاء الله عليك ابيك تكتب داق ريويس 10 متر في شارع فرعي لان هالطريق اللي حنا فيه يعتبر فرعي ناظر فيني وحسيت انه حقد بس صك الابتسامه بوجهي وعطاني اوراقي وقالي خلاص ماراح اكتب لك مخالفه بسامحك .....





بالله وش رايكم ؟؟؟؟

[salehhd]

السلام عليكم
مشكور على الموضوع

ولي عودة ان شاء الله

[Camry-GLi]

اخواني بصراحه السالفه ومافيها ان العسكري علي كيفه يطبق النظام ,,,,,
يعني لو انك من نفس القبيله بيسامحك ولو هو يعرف واحد يقرب لك اكيد بيساعدك ...

يعني السالفه ومافيها واسطه ومزاااااج

انا صارت لي سالفه قبل 6 شهور في حي العقيق

كان فيه تفتيش طويل مرره والمشكله انه كان صف واحد ومافي الا العسكري واحد يفتش ... وفيها 3 سيارات شرطه فيها حوالي 5 عساكر
انا كنت مستعجل وسويت صف ثاني .. وجاني عسكري وقال هات الرخصه والاستماره ووقف لو سمحت ... انا استغربت لدرجه اني توقعت ان على سيارتي بلااااغ
ولمن وقفت السياره وجيته .. قال ليه سويت صف جديد ..؟؟ انا تفاجأت وقلت له .. انا مستعجل ومادري ان هالشي ممنوع ..

والله العظيم عطاني الرخصه وقال .. لاعاد تتعودها مره ثانيه .. <<< قلت له ليه في مخالفه عليها ولا هذا نظام جديد توك مطلعه من راسك ..
ناظرني بحقد وخلاني .. لانه يدري انه مايقدر يسوي شي ..


سالفه ثانيه بقولها لكم ...

خويي قبل اسبوعين في جده مسكوه في تفتيش وحجزو سيارته تدرون ليه ؟؟
لان معاه جمش ومركب شناااابر (كفرات بالون ) ....... ومركب انتل طويل .... العسكري يقول له ان الشنابر تغيير لمعالم السياره ,...؟؟؟



معليش طولت عليكم بس ... نقول الحمد لله ان شرطه الرياض اخلاقهم افضل بكثير من حقين جده

[B R A B U S]

السلام عليكم ورحمة الله وبركاته



اولاً حبيت اشكرك اخوي العزيز على الموضوع الأكثر من رائع ,,,

والله يخلينا نفتر حرتنااا شوي في العسكريين من القهر الي فيناا

بصراحة رجال المرور في البحرين مزاااااج على الأخر يعني يوم

تشوفهم ما في احلى منهم ويوم تسب وتلعن فيهم من عمايلهم

مثلاً يوم انه ركبت على المرسيدس تظليل 02 واغمق شوي بعد

كانت الدوريات تمر عليي وانا حتى مو رابط الحزام بس وحتى

النافذة الأمامية صاكها تظليلة ويمرون ويقعدون يطالعون فيني

وبس ,,, وانا اقول يمكن خايفين بأني اطلع واحد من هل الهوامير

ويزفت فيهم بالشارع ,,, ويوم من الايام اخوي كان في السيارة

راد البيت وما يشوف الا المرور وراه يأشر له قال اخوي ما راح يوقف

في الشارع راح اوقف في اقرب مخرج للشارع المهم وقف وقال له

انت وش مسوي في السيارة ضاربها سوبر دراك و النافذة الامامية

بعد ما يصير وقال له خويي مو غلطتي غلطة الي ركب انا قلت له ركب

قانوني بس ماركب ... قاله ما يمشي هل الكلام وطخه 10 دينار مخالفة

وشال التظليل الأمامي ,,,,


وحادثة اخرى كنت يومياً ازور احد كبار الشخصيات في منطقة تبعد عنا

تقريباً 30 كيلو وكان في المخرج حقتها تفتيش وكل يوم امر عليها وكان

نفس العسكري الي يوقف السيارات وكل مره يخليني اطوف ,,,

يوم من الأيام ما لقيته الا يقول لي وقف وعطهم الرخصة قلت له طيب ليش

قال اقولك وقف وعطهم الرخصة قلت له طيب ورحت وقفت الى العسكري

الي يطخ مخالفات وقلت له تفضل هاي الرخصة قال ليش موقفك عيل قلت

له ماادري مع اني يومياً اطوف عليه لما ارد من عند فلان بن فلان قال

لي اسمح لي يالطيب وان شاء الله راح اخبره الحين انه ما يتعرض لك غير اليوم

وراح عطاه كم زفه ليش انه اعلى منه رتبه وقال له اني من طرف هذا الرجال ,,,


طولت عليكم وايد في قصصي واتمني انكم ما تملون منها ,,

بس تبين الانواع المرور وتعاملهم ...


اخوكم

clk_200

[عذب الاحاسيس]

الاسبوع اللي فات في حي السامر بجدة قدام كتيكت <<<< للي يعرف جدة

في اشارة زحمة وكل العالم تبي تاخذ اليوتيرن والله اخذنا اليوتيرن ويوقفنا التفتيش وش فيه ليه قاطعين الاشارة <<< بالله وش رايكم

ومن هنا وهنا وماادري ايش واخلاق سيئة تلاعنت انا وياه وعطاني المخالفة ومشاني لاحجز ولاهم يحزنون والله انه اكثر من نص الدفتر مخالفة قطع اشارة

سؤالي بس هل هالشرطي مايخاف الله مايخاف احد يدعي عليه وهو مظلوم هل مايخاف تستجاب دعوة ويعاقبه الله في نفسه او اولاده


سؤالي اذا كان الشارع اصلا زحمة هل من حقه يحرر مخالفات >>> بدال مايجلس يضبط السرى يجي يحرر مخالفات
والمشكلة كلهم عينة وحدة تخيلوا شايب تقريبا عمره 60 ويعطيه قطع اشارة بالله وش رايكم
وش موقفك وانت تسدد المخالفة <<<< اهم شي 900 ريال

تحياتي للجميع والله يكافينا شر مرورنا الهمجي

[bashar_255]

انا مستعد أعطيهم 1000 ريال سنوياً سموها ضريبة أو اغتصاب أو جباية لاكن ما يستنذلو على مع العلم اني ما أخذت مخالفة من قبل

صراحة

كرامتنا أولاً

تحياتي ،،،