قـصائد وأبـيـاتـ في وصف السياراتـ (( سجل اضافتك ))

[sultan alghamdi]

هذي قصيدتين الاولى للشاعر علي القحطاني وغناها عيسى الاحسائي وهي عن الشفر

محلا الشفر محلاه

محلا الشفر محلاه ومن وردة مشكور مشكور من فكر وجاب امتيازاتة
انا رحت اشاهد معرض الغانم المشهور شفنا مدينة كاملة من معداتة
على بابها شفت القديم زانها الموطور وياكثر ما شهدت انا من موديلاتة
احب الشفر وارتاح له والشفر محظور يحب الشفر من قربه في مسافاتة
مشينا من الطائف مع اول طلوع النور على كابرس(ن) ياحلو صرخت قزوزاتة
وصلنا الكويت وراعي الكابرس مسرور نشكرك يالغانم ونشكر محلاتة

والقصيدة الثانية ماادري من اللي كتبها لكن غناها طاهر الاحسائي وهي عن الجمس

الله على الجمس

الله على الجمس لولا وارد الستين ياليت ما بدلو رودة وسكانة
ياليت شالو مقصاتة مع الجنبين خلوة سستة على الدنقل كما اخوانة
ربحان يامن شرا من اربع وستين مايشتكي نفضة البطناج ربانة
الله واكبر على من ظبط التيمين وزن بلوفة وبيرنقة وذرعانة
لولا السلنسر وسيع ودبتة مترين كان انفجر من لهيب النار شكمانة
بين السلندر وبين الهيت له وجهين طرمبة الماي تقلب بين غمصانة
ام الشنابر مع البستم قونزنبين على الكرنكات في بوشات مليانة
كويل والديلكو مايحرق بليتين اسلاك سلكوب وافهم حق ميزانة
واحد وخمسة وثلاثة وسته قبل اثنين والاربعه حطها في آخر الخانة
الدينمو والكتاوت شغلها تموين بتريه ليستل والليسات بطرانة
السير والمروحة بوسط الكور تلحين تشبة ربابة ابومحمود والحانة
باور ستيرنق في السكه له بيبين يعجبك تصفير سفتي بلف خزانة
ام الغمارة بلاسلكي بكشافين طبلون ورشة علية اسمة وعنوانة

وأعذزوني على بعض الكلمات يمكن تكون غلط

[معقوله]

هذي قصيدة في الالتيمـا ..

زينت لك يا صاح من الشعر بيتين
بها معاني الوصف وشلون تنقـال
لموترن له من الشكاميـن ثنتيـن
احمر(ن) لونه ما جا على البـال
الموتر اللي لا مشى فوق ميتيـن
راسي كما يربـط الفيـل بحبـال
موتر(ن) لا نغزتـه قـال اهليـن
آمـر تدلـل أعطيـك بالـحـال
قو المكينة سبعة وخمسين وميتيـن
حجمهـا ثلاثـة ونـص وهبـال
ميته تسـوى خمسـة وكسريـن
بمعاونة اربع وعشريـن رجـال
يفرش على الخط ياخذ مساريـن
يسابق الشمس والريـح والظـلال
واوصف الموتر واعطه من الزين
يوم استوى فالخط وقال مـا قـال ..

تحيـاتي ،،

[M O A Y A D]

.
.
.
.
sultan alghamdi
معقوله



لا خلا ولا عدم اخواني

[ice 67]

السلام عليكم

وهذه بيتين لخاطر الفرت



لا تستهين بالفرت ترى الفرت مسحوره

لا تستهين بالفرت ترى الفرت مسحوره

اربع دقايق اربع دقايق

من رابغ لين مستوره

[M O A Y A D]

السلام عليكم

وهذه بيتين لخاطر الفرت



لا تستهين بالفرت ترى الفرت مسحوره

لا تستهين بالفرت ترى الفرت مسحوره

اربع دقايق اربع دقايق

من رابغ لين مستوره

يسلمو خيو

[عميد الطائف]

السلام عليكم ورحمة الله..

أولاً: أشكرك يا ميدو على الفكرة.. وعلى تنفيذها... وثم متابعتها.
ثانياً: لدي بعض الأبيات.. وأعتذر إن كانت مكررة لأني لم أقرأ جميع المشاركات..

القصيدة الأولى قيلت في مدح الـ VX-R وأعجبتني رغم تحيزي الشديد للـ GMC ضد اللاندكروزر
وهي بعنوان: في إكس آر يغار من زوله الجمس. لشاعر لا يحضرني الآن...

الله علـى اللـي لا ركبتـه ينومـس

جيبٍ لعسـرات المخاطـر يدوسـي

يفضّي لمهمـومٍ تنكّـد مـن العمـس

شرّه على عسر الجلـد والطعوسـي

مفتـاح بيبانـه بريمـوت باللـمـس

عذروبـه القيمـه وعـدّ الفلـوسـي

في اكس آر "يغار"من زوله الجمـس

اليـا تهـادى مثـل زول العروسـي

يزمي ليا صارت دروب الوعر رمس

من صمّمه شريف لو هـو مجوسـي

اللي حمس حالي بصالي لظى الحمس

انّـه حظيّـه للرجـال الهلـوسـي

من البيت للمسجد تقل صايبـه مـس

ما يقطع الفرجـه تقـول محبوسـي

ولو قيمته عندي تحيزمـت للعـرس

ابـا تطـرّى قبـل قطـع النفوسـي

بالجادل اللي غرّته تسـرق الشمـس

زملوق وسمٍ مـا وطتـه العسوسـي

ابا تمنى وباكر اردى مـن الامـس

ولا ظـن بالارفـاق رسٍ بلـوسـي

يا جامـع الدنيـا تمتّـع تـره دمـس

اشر الجديد وخل عنـك الهروسـي

من ياصل الجمّه نسي بلّـة الخمـس

ولا يروي الظامي هضال الرسوسـي

[عميد الطائف]

وهذه قصيدة أخرى في الجمس للشاعر حمد الدليهي ( الخالدي )... يصف محاورة دارت بينه وبين الجمس...

الدليهي:
ماعاد لك ياجمس في خاطري كرت ××× من يوم ساقوك الغشم والوراعيـن

انااشهد اني منـك عزلـت دبـرت ××× ماعاد اطالع فيك ابطـارف العيـن

الجمس:
الله واكبر يالدليهي تكبـرت ××× خليتني شفقن بركب السيادين

ماهو بحق اليوم عني تنكرت ××× تلعبي الورعان وسط البلادين

الدليهي:
جار الزمن ياجمس فيك وتعثرت ××× ولانسيتك يـوم جمـع المحبيـن

واليوم روح كنك اليوم ماصرت ××× لاصار وقتك يجمع الزين والشين

الجمس:
اذكر زمان فات كانـك تذكـرت ××× حكمك علي حكم الرجال السلاطين

اسرفت فيني يالدليهـي واسرفـت ××× اسرفت بي سرف اليهود بفلسطين

الدليهي:
فكرت في مافات ياجمس فكـرت ××× عديت نفسي من حساب الخبالين

كم مرة ضيقت صدري وبنشـرت ××× والناس ماتاقف على الدرب ماشين

الجمس:
كم مرة فيهـا زعلـت وتكـدرت ××× وسريت بي فالليل والناس ممسين

في مطلبك يالخالـدي ماتعـذرت ××× رفيق صافي لك على العسر واللين

الدليهي:
هيهات كم مره علينـا تبعثـرت ××× وكم ورشة فيها مضالك اسبوعين

هذي طبوعك كلهـا ماتغيـرت ××× غربلتني وذهبتني دين في ديـن

الجمس:
يعني خلاص تقول يالخالـدي بـرت ××× يوم انزلـوا بالمـدن كـل البداويـن

ياما وردت العد وامـرار صـدرت ××× على الوعر تعشيق من ثالث اثنيـن

وسط الغماره مـع وليفـك تخـدرت ××× وبدر الغريب يجاوب الصوت صوتين

الدليهي:
يالعنبوك اسكت تراني تفجـرت ××× وكل العلوم الماضيه جبتها منين

خلاص انا قررت شاريك قررت ××× وكل السوالف خلها فيك بعديـن

بذبح بدل حلفي كرامه وكفـرت ××× و الناس لوتزعل اناوانت راضين

تمشي بي الدنيا وانا ماتطـورت ××× ابيع واشري جمس خلفه قزوزين

وهناك أيضاً قصيدة الشاعر ناصر الفراعنة السبيعي في الجمس... قصيدة طويلة جداً وجميلة جداً رغم ورود بعض العبارات الخارجة التي تمنعني من عرضها... ولكن الحصول عليها في الشبكة سهل..

تحياتي لكم...

[عميد الطائف]

تعقيب بسيط على مشاركة الأخ سلطان الغامدي رقم 49:

احب الشفر وارتاح له والشفر محظور يحب الشفر من قربه في مسافاتة

والصحيح:
احب الشفر وارتاح له والشفر مخبور يحب الشفر من جربه في مسافاته.