ناوي يوكون .. لكن دفرنس وإلا دفرنسين ؟؟ وش رايكم ؟

abufhd @user_31210 · 15-06-2006

السلام عليكم ورحمة الله وبركاته ..

اخوكم ضيف جديد عليكم .. وناوي إن شاء الله أشتري لي يوكون من موديل 2003-2005 لكن متردد .. آخذ دفرنس وإلا دفرنسين ..

طبعاً أنا مالي بالبر والرمال :) يعني يمكن بالسنة مرة أو بلاش مرة بعد :)

والدفرنس الواحد يريحني فيه : إنه أخف .. وأقل صرفية بنزين .. وأقرب للأرض :) آمن من الدفرنسين بإذن الله ..

واكثر استعمالي للسيارة داخل الرياض .. يعني مشاويري واجد ولا عندي سيارة صغيرة ..

وش رايكم يا جماعة الربع ؟

abufhd @user_31210 صاحب الموضوع · 24-06-2006

اللهم آمين يا أبو حذيفة ..

وما يشعر بفقد المطر إلا أهل البر وأهل القرى والهجر المعتمدين على القلبان في جلب الماء ..

هالسنة الله المستعان اكثر القرى والمحافظات اللي معتمدين على القلبان .. يروون بوايتات الماء .. لأن القلبان ما عاد فيها إلا الحصى :(

الله يجيب الخير ويرحمنا برحمته ..

ابوحذيفة @user_31189 · 23-06-2006

انشاء الله اليوكن سيعيد لك امجادك وادمانك................بس ادع ربي يرزقنا بالمطر والربيع السنة الجاية..

abufhd @user_31210 صاحب الموضوع · 22-06-2006

ما أخفيك يا أبو حذيفة .. خويك كان مدمن بر وكشتات .. والآن أكره البر كره عجيب .. الظاهر جتني عين !!

تخيل لي ثلاث سنوات ما كشت للبر :) مرة او مرتين مغصوب .. وطلعة نص يوم بعد :(

ابوحذيفة @user_31189 · 22-06-2006

مبروووووووك يابو فهد...الله يعطيك كل خيرها ويكفيك كل شرها.....الحين لسان حالك يقول متى يجي الشتا والبرد عشان الكشتات....

abufhd @user_31210 صاحب الموضوع · 22-06-2006

إحح .. استر علينا ..

كفشتني :):)

مشتاق16 @user_18980 · 22-06-2006

هههههههههههههههههه الله يرجك ابوفهد ماقلت اني اعرفك

اقسم بالله من اسلوبك عرفتك وشلونك فيصل :)

abufhd @user_31210 صاحب الموضوع · 22-06-2006

وعندي بعد اثنين من الشباب ناوين تظليل وكلمني واحد منهم اليوم يقول شف لنا خصم بما إننا اثنين :)

فنبي نصير أقل شي ثلاثة أو أربعة :)

وش رايك لو خليناهاللي بالمنتدى ومن أهل الرياض :)

هذا ماسنجري : [email][email protected][/email]

مشتاق16 @user_18980 · 22-06-2006

ابوفهد اسمع

انا ناوي اضلل عن طريق شركة يولمار مجربها وشركة رائعة جدا جدا

انا بروح لهم بكرة واكيد بطلب منهم خصم بحكم اني سبق وان ظللت منهم

اواعدك هناك ونطلب خصم بحكم انا اثنين :)

وش رايك على فكرة اخوي ابوفهد شكلي اعرفك :)

abufhd @user_31210 صاحب الموضوع · 22-06-2006

الله يبارك بعمرك ويسلمك أخوي صالح ..

لكن الكشتة ما منها فكة .. إن زرتنا أو زرناكم :)

salehhd @user_17805 · 21-06-2006

السلام عليكم

الله يعطيك خيرها ويكفيك شرها

وبارك الله فيك وبك يا اخي ابو فهد

موضوع الثمامة ترى امزح معك وانا اخوك

لاني من الشرقية وانت في الرياض والمشوار بعيد

واسأل الله سبحانة وتعالي ان يحمعنا معاك في جنات النعيم على سرر متقابلين

اخوك صالح

abufhd @user_31210 صاحب الموضوع · 21-06-2006

بحمد الله .. اشترينا السيارة ونقلنا ملكيتها :)

يوكون2004 ماشي50.000كلم والحمد لله السيارة نظيفة وبحالة ممتازة ..

اللون زي الصورة اللي فوق ..

السعر 88.000 ريال

أخوي صالح .. على وعدنا الثمامة .. بس خلن أسوي أب ديت لعزبة الكامري :)

أخوي عاشق16 .. الجديد ماله مثيل واسأل مجرب :) لكن لو شريت جديد بتكون صيفيتي بالرياض ..

أدخل اليوكون بالحوش وأخلي عيالي يتفرجون عليه وأقول تخيلوا إنكم مسافرين :)

يعني ممكن آصل الـ 100.000 بس أبجلس هالصيف بالديرة :)

والحمد لله على كل حال ..

طيب وش رأي أهل الخبر بالإكسسوارات الإضافية :
1- تظليلة .. انا ناوي جلاستك بس ما أدري غن كانوا موجودين وإلا عزلوا ..
2- عمود الإتزان اللي يركب قدام ( لا سمح الله .. )
3- شاشة دي في دي للبزران ( أجل وشوله شاري يوكن :) ).. يمدحون شارع المصلى ( نايف )
4- تلبيس المراتب ( تلبيس جاهز ) وإلا تنجيدها ..

مشتاق16 @user_18980 · 21-06-2006

اخوي ابوفهد

الله يقويك على اللف والدوران ويعطيك الف عافي

اذا تقدر تزود فلوسك وتشتري جديد تراه افضل واريح لك والجديد مامثله

salehhd @user_17805 · 21-06-2006

الخيرة فيما اختارة الله

الله ييسر اموركم وييسر دركم

طارت طلعة الثمامة:D

abufhd @user_31210 صاحب الموضوع · 21-06-2006

الله يعينكم على معاناتي :)

اليوم رحت للسيارة ويوم قلبناها زين إلا والله مهيب اللي انت تبي !!

يعني العداد 26000 كلم لكن حالة السيارة تتعدى 100.000 كلم بالراحة !!

وديكورها الداخلي بين بالنهار زين .. طاقته الشمس وفيه شطوب .. المهم مالكم بالطويلة :)

أخوكم أبو فهد سحب العربون ومشى .. وثاني معرض إلا وأحصل عندهم يوكن تووووووووووه جاي :)

2004 ونفس اللون صخري ورفارف بنية .. ماشي 50.000 كلم لكن تحس الموتر ما شاء الله نظيييييييييييييييييييف ..

وفحصناه والحمد لله كل شي فيه تمام .. وبكرة بيردون لنا عن صاحب السيارة لأني أعطيتهم 88.000 ريال

ويقولون : راعي السيارة يبي 90.000 ريال ...

وصراحة الموتر يستاهل .. أقل ما فيها أدفع 2000 ريال وأريح راسي من اللف والدوران والبحث :):)

الحمد لله هذي رابع أو خامس سيارة نستخير الله فيها .. ولعل في الأمر خير إن شاء الله ..

abufhd @user_31210 صاحب الموضوع · 20-06-2006

الله يبارك بعمرك أخوي ..

اليوم إن شاء الله ناوي أفحص محركات السيارة .. والله ييسر الأمور ..

وأبشر باللي يطلع بك للثمامة .. مع إني ما أحب البر ولا الطعوس :)

salehhd @user_17805 · 20-06-2006

السلام عليكم

مبروك ان شاء الله وتستاهل كل خير

متى امرك ونطلع نجرب الموتر في الثمامة

امزح معاك

الله يعطيك خيرها ويكفيك شرها

abufhd @user_31210 صاحب الموضوع · 20-06-2006

وش رايكم :) :

abufhd @user_31210 صاحب الموضوع · 20-06-2006

الله يبارك فيكم جميعاً ..

صراحة ما أدري كيف انا كنت متعلق بالسيارة بشكل جنوني مع إن سعرها مرتفع !!

وصلتني رسالة الصبح وانا نايم :) يقول فيها صاحب السيارة :

المعذرة أخوي .. السيارة تم بيعها بـ 99000 ريال !! :eek:

لكن الحمد لله عوضنا ربي خير .. |1|

نزلت اليوم المعارض وحصلت لي 2004 لونه صخري والرفارف بني..
( تحكم بالدركسون-دفرنسين-هوك-متصل منفصل- ماشي26000كلم-
مرايا تنزل تحت مع الريوس - شاشة القراءة عربي- سيدي-مكيف أوتوماتيك)
السيارة فيها الرفرف الخلفي الأيسر وتم رشه .. وكانت حكة بسيطة .. رش بدون معجون ..
السيارة وقف عليها العصر الشريطية وساموها بـ83000 ريال وأنا أبشركم لقطتها بـ85000 ريال
السيارة مع راعيها وكالة وراعيها رجل كبير بالسن ماله مشاوير عليها ..

salehhd @user_17805 · 19-06-2006

السلام عليكم

بصراحة روحة الامارات راح تكلفك كثير وغير كذا الموتر من غير ضمان

والامارات مايهتمون بالسيارات الامريكية كثير فما اعتقد انك راح تحصل ضالتك

وزي ما قال الاخ نايت سعرة 95 مبالغ فية ولو انسام بهذا السعر كان باعه ومااستناك

ومن ناحية ثانية دام انك بتستخدم فالسعر مو مشكلة كثير

لاكن انصحك انك تستخير قبل كل شي والله ييسر امورك

اخوك
صالح