الترانز آم .. تاريخ وذكريات
يمكن كثير مننا كان يشوف الترانز آم في صغره .. أو على الأقل كان يشوفه في بعض أفلام المطاردات في نهاية السبعينات وبداية الثمانينيات الميلادية ( مثل سموكي اند ذا بانديت )
وشخصيا كانت عندي كثير من الذكريات مع هالموديل .. وكنت أكثر مااتذكر منه الشعار المميز له .. الصقر اللي على الكبوت وكان أكثر ماشدني له ... وطبعا كنت أقدر أفرقه عن الكمارو بهالصقر .
في موديلات نهاية السبعينات ( 77 – 79 ) كانت مكاين الترانز آم من اللي أسمها 403 .. وكانت مكاين جدا جبارة ( بالمقارنة مع المكاين اللي من فئتها في ذيك الأيام ) .. وكنا نبحث عن هذي المكاين في كل محل ... ولاندخل التشليح إلا وننثله ..ندور عنها .
أكثر مايميز هذي المكاين هي كتابة ( 6.6 ) واللي ترمز الى سعة المكينة ( 6.6 لتر ) وكانت مطبوعة على رووس المكينة ، و في بعض الأحيان على الإقزوست ، وطبعا نكون فرحانين بالحيل ( كاننا لقينا كنز ) ، وكنا نحسب اننا لقينا مكينة الـ 400 حقت البونتياك ...
لكن الغريب ان هذي المكاين القوية ...ماكانت من البونتياك !!!
نعم .. ماهي مكينة بونتياك !!!
أعرف انكم تقولون ان ماعندي سالفة .. لكن اللي اتضح من ، ان البونتياك حطت مكينة الأولدزموبيل 403 على الترانز آم ( طبقا لأرقام المصنع ، فإن نسبة عالية من الـ 279026 سيارة من موديل الـ 77 الى الـ 79 جات عليها هذي المكينة ) ،
واستغلت البونتياك ميزة التشابه بين مكينتها الـ 403 و اللي مثلها من نفس السعة من الأولدزموبيل ( مكينة البيوك 403 تشبههم بعد ) .
ملاحظة : اللي عنده أي من هالمكاين ويبي يزودها بدون تعب .. يقدر يحط عليها رووس ( ادلبروك برفورمر آر بي أم رقم 6051) ، وهذي الرووس حقت الأولدزموبيل ( غرفة إحتراقها 77 سي سي ) بتعطيك فرق واضح ، خصوصا اذا استخدمت مع ثلاجة ( ثلاجة الـ 400 أعرض من الـ 403 ) ، ومع كام وسط .
وأترككم مع الترانز آم ( الموديلات الأقرب الى قلبي ) وصور من الذاكرة ... واعتذر عن الإطالة
