النجده يا خبراء المنتدى

بالنسبة لخرابات الفورد ..

موجودة عندنا 2 كراون فيكتوريا كلهن موديل 97 ..

ماشيات بحدود 240 الف كم ما شاء الله :)

كرفناها كرف ومسكات خطوط الله يعلم فيها ..

انا اقولك لك الحق انها بدت تقربع .. لكن مااااااشية ..

وحدة باعها اخوي قبل 4 شهور ب 23 الف ريال لانه بيسافر ولا مو مشكلة فيها ..

والثانية مو راضين نبيعها الا بعد سنتين اقل شي :)

بصراحة السيارة عملية ومريحة وقوية وشهادتي فيها مجروحة .. رغم اعجابي الكبير بالاكورد ..

صدقني اخوي الكريم ..

انك اخترت سيارتين من خيرة السيارات ..

لكني افضل انك تاخذ الفورد او الماركيز .. بحكم انك راعي خطوط .. ولازم تاخذ سيارة تريحك :)

وعلى فكرة الفيكتوريا والماركيز من موديلات 2003 قوو مكينتها ل 260 حصان

واظنها كافية :)

انت جرب السيارتين قبل اهم شي .. وشف ايهم ترتاح نفسك لها ..

واستخر ربك

وتوكل على الله

وبالتوفيق :)

ولا تنسى اهم شي انك تاخذ مواصفات سعووودية ..

ما تلاحظ انك تبالغ من جد يا اكورد وبس؟

اول شي السياره اللي جربتها وجلست معي فتره هي قراند ماركيز 2001 فلها ب 50 ريال تقريبا الى 55 ويمشي وانا ادعس لها لان رجلي حاره شوي 450 الى 500 بالرااااااحه يعني لو ما ادعس يمكن اقل بكثير
وبعدين عمر السعه وعدد السلندرات ما كانت مقياس ولا هذا ال s2000 حقت هوندا صرفيتها خياليه بالنسبه لسعتها

جلست معي السياره حدود السنه وما عمري غيرت فيها شي ابد حتى الزيت ما اغيره الا كل 7 او 8 الاف ان ما كان اكثر وماشيه تمام التمام والسياره الحين مع واحد اعرفه وما اشتكى منها ابد
وانا اعررف وشو الامريكي اللي يوجع الراس لانه عندي جمس ومعلمني وشو خرابات الامريكي زين
وقير الفورد يتحمل اكثرررر من قيرك ابو 5 نمر يعني لا تنبسط واجد بالقير لان فورد متخصصين اوتو قبل هوندا وهالقير مطور كثير وعارفين له زين وانا ما قصرت فيه ابد ولا اشتكى ابد
اما الاكورد من تجربتي واتحداك تنكر انت بعد انه خشن في التغيير اما الفورد ناعم وقريب من اللكزس في النعومه

وبالنسبه للقوه حرام عليك تراك من جد زودتها شوي
جربتها مع اكثر من سياره
لومينا ls ورحت عليها
مليونين جمس ورحت عليهم كلهم
ومكسيما قير اوتو رحت عليها والخط بقووووه

وكثير سيارات اروح عنهم خصوصا اذا كنت امشي من 80

وفي طلعة القديه اللي عند المزاحميه تمشي 160واحيانا 170 وبالجمس اللي عندي 8100 ودفرنس واحد احيانا 140 واحيانا 150 وتقول لي ضعيفه
اما نظام هوندا وش دخلني فيه انا؟ طيب تيوتا عندهم الفي في تي ونيسان عندهم نظام والجي ام عندهم الفورتيك وكل شركه ولها سياستها يعني مدري وش دخل هالشي
وبالنسبه للسرعه كم تبيه يمشي؟ 250؟
ترى 190 واجده مره وخصوصا على السيارات اللي مو مجهزه للسرعات العاليه مثل الفورد والاكورد والكامري ومثيلاتهم
واللي يرحم والديك لا تقول لي الاكورد ما تحس بها وانت تمشي 200 لاني بأضطر اني اقول انك تكذب على روحك لانك من جد تحس انك بتطير لا هي ولا الفورد ولا اي سياره مثلهم
اما المكيف حقها والله وبدون مبالغه اني اتوقع انه ابرد من مكيف الاكورد ولااااا تقول لي ياباني وامريكي

وبالنسبه لمسكت السعر انا معك ان الاكورد تمسك اكثر لكن ترى لفتره محدوده وبعدين بتنزل لكن الفورد ترى فيه حقه في مسكت السعر ورح للمعارض وشف اتحداك تحصل ماركيز موديل 2002 وفوق بأقل من 50 الف او فكتوريا

وبالنسبه للمواصفات ما تلاحظ انك مكبر موضوع الاكورد شوي؟ وشو اللي تكييف مزدوج امس راكب اكورد فل اوبشن 4 سلندر مكيفها واحد مو مزدوج وايرباقين مو 4 مدري من وين تجيب معلوماتك
وترى الاكورد اغلبه بلاستيك بعد <-- وش عنده الفانتيوم اللي كله خشب وجلد
ويمكن البلاستيك في الاكورد اكثر لكن بلاستيك الاكورد امتن من الفورد واحسن

وبالنسبه لكل المواصفات اللي قلتها في الاكورد من 6 سيديات الى المرايا والمكيف و الريموت والانظمه موجوده في الماركيز اللي كانت معي 2001 وشلون الجديده باستثناء الطبلون led فقققط

لكن الماركيز تتفوق بمواصفات اكثر عندك الهيدروليك وعندك كمبيوتر الرحلات وعندك الانوار تشتغل في الليل اوتو ومكيف خلفي وتراكشن كنترول وتقديم الدعاسات ونظام الهاند بريك والقير والاووووووووفررر درايف اللي مو موجود بالهوندا صح ولا لا؟
يعني الماركيز متفوقه على الاكورد 6 سلندر فما بالك بال 4
اخوي ماااااااااااافيييييييه مقاااااارنه والله الماركيز احسن بمراااحل
وبالنسبه للمفتاح من قال لك ان حق الماركيز تقدر تقص عليه؟ مااااا تقدر حبيبي وترى حتى الاكسنت بعد ما تقدر يعني مدري وش هالميزه اللي تحسب انها جديده قديييمه مرررررره وكل السيارات من 2001 وطالع فيها

والمشاكل والله ما سمعت احد يشتكي منها وحالتك صراحه غريبه

عموما عزيز وغالي ومستعد اناقشك في اي شي لانك شخص يستحق الاحترام والتقدير واسلوب الحوار معك راقي وممتع بس اصبر شوي بكتب موضوع عشان مشاركاتي بتوصل ل 600 :)

وصاحب الموضوع والله ما زلت انصحك في الماركيز وبقوه

تحياتي

على فكرة .. ما حذرت من الفورد إلا يوم جربناها

بصراحة .. مريحة جدا .. ولا تصف ولا اللكزس جنب راحتها

لكن خل نقول الحق .. والله ما تضمنها

كان عندنا فورد كراون فيكتوريا .. خربت علينا في خط القصيم .. واضطرينا نطلب سيارة من القصيم .. لييييش!!

القير خرب

بدون اي مقدمات

بعد ما صلحناه خرب مرة ثانية

اضطرينا نركب قير جديد

فترة بسيطة وخرب مرة ثانية

صلحناها ورميناها بالمعارض وافتكينا منها والحمد لله

رساوتها بالخط ما فيه فرق بينها وبين الهوندا

قوة .. والله ما عندها ما عند جدتي

كنت مرة أسوق فورد موديل 2000 في أبها رايح للسودة .. ومشغل البور .. وشفت راعي باثفايندر موقف على الخط يحتريني أعديه عشان يمشي بعدي

بعد ثواني شفت راعي الباثفايندر يسقط علي

والله العظيم إني دايس البنزين كله والظاهر كانت على السرعة الثانية وأشوف الباثفايندر يبعد ويبعد ويبعد

مع إن هذا 6 سلندر وهذي 8 سلندر وأخف

والله انقهرت

اللي أعرف إن فائدة الـ8 سلندر تطلع في الأماكن هذي .. لكن ما عندك أحد

ونفس الكلام حصل في فورد ثانية في منتزه السحاب .. وقفت علينا ولا قدرت تطلع إلين رجعنا ودسنا من أقرب مكان مستوي .. بينما السوبربان طلع وراح ======>شر البلية ما يضحك

وعلى فكرة .. وش فائدة الـ 8 سلندر إذا كان طبلونها على 190 بعدين يفصل ؟ خصوصا وإن مكان خوينا وطريق سفره مكان مستوي وما فيه جبال ولا مرتفعات ؟ يعني بس صرفية بنزين ؟!!

وبصراحة .. أشتري كامري ولا أشتري فورد

وبعدين انقرفنا من الشكل الموجود 8 سنوات ما تغير .. وهو أصلا ما تغير عن السابق بشكل واضح

ومن جوا عادية جدا .. حتى المرتبة الأمامية غير مفصولة .. قمة التأخر

والقير علاقي والطبلون عادي جدا .. بل كلاسيكي قديم

والمكيف ممكن يخرب عليك بدون أي مقدمات .. مثل ما حصل مع راعي الـ 2000 بعد ما شراها بأشهر وهو راجع من الشرقية


وأنا عن نفسي غير مقتنع بكلمة ( حرام أدفع في 4 سلندر ) لأن ديارنا ما تحتاج مكاين كبيرة .. ما فيه مرتفعات ولا جبال .. ومن المعروف إن الهوندا يمسك سعره بقوة .. بينما الفورد يطيح سعره مباشرة ..

وين صار الحرام .. في سيارة تمسك سعرها وإلا سيارة يطيح سعرها !!

سيارتي جابت 50000 من أول واحد سامها مع إنها مصدمة وماشية 70000 وبويتها معدومة من التمخيش وموديلها 2003 وصار لها سنة و8 شهور معي

أجل لو دخلتها في المعارض زين كم بتجيب !!

على العموم .. إذا أنت تهتم بالمواصفات خذ الأكورد .. أو فكر بالألتيما تراها حلوة ما شاء الله .. وكل السيارتين فيها مواصفات رائعة جدا تفوق الفورد بمراحل

وإذا أنت تهتم بالوسع وراحة المراتب خذ الفورد

وفي الهوندا فل كامل مراتب جلد ومكيف الكتروني مزدوج ومرتبة على كهرباء وريموت كنترول يتحكم في الأبواب والنوافذ .. وطبلون LED و2 إيرباق أو 4 .. ومراية عاكسة وتحكم بارتفاع النور ومثبت سرعة و6 سيديات و6 سماعات والخامات الداخلية مصنوعة من الإسفنج والجلد بينما الفورد فيه قطع بلاستيكية كثيرة مثل الهايلوكس .. ولا تخفى عليك أنظمة ABS و EBD .. وتجيك بفتحة وقير خمس سرعات وطبلون ما يفصل إلا عند 220 .. وتصميم داخلي ولا أروع منه .. وتقنيات غير موجودة في الفورد أولها تقنية الفيتك VTEC .. واللمسات الداخلية أنعم وأجمل من الفورد .. حتى مفتاحها ما تقدر تقص عليه عشان ما ينسرق .. مثل مفتاح البي إم ..

يعني ما تتفوق الفورد إلا بالسلندر والوسع .. أما الكرف ما شفنا منها كرف

طبعا كل هذا على فلوسك اللي ذكرتها

واستخر ربك

ما كان ببالي أقول الكلام هذا كله لكن الأخ الغالي NiCK أجبرني على ذلك :)

مالك الي اكورد وبس

طيب

عقلا

مكينة 4 سلندر سعتها 2.4 وخمس سرعات أوتوماتيكية ويابانية ====>حط تحت يابانية خطين

في مقابل مكينة 8 سلندر سعتها فوق 4 وأربع سرعات أوتوماتيكية وأمريكية ====>وحط تحت أمريكية ثلاث خطوط

بالله بتصير الفورد أقل صرفية من الهوندا بالعقل

طيب إذا أنت مجرب حط تجربتك .. وانا أدري إن الكفة لصالح الهوندا لأني أعرف الفورد .. بس أبغاك تقولها بنفسك

ولا تنسى إن الهوندا أعبيها بـ 45 ريال .. وإذا خلص البنزين نهائيا وطفت السيارة أعبيها بـ 50 ريال

علمني علشان أعلمك صرفية الهوندا

اكورد وبس

رح جرب صرفية الفورد من 98 وفوق وجرب الهوندا حقتك

اذا كان فيه فرق كبير بينهم لك مني سهمين في هوندا <-- وش عنده

واذا كان مافيه فضحك على روحك وهذا اللي بيصير

تحياتي

بسم الله الرحمن الرحيم

انت شكلك ماتبي شكل شبابي تبي سيارة كرف وتعيش

انا لو محلك اخذ الفورد وبدون تردد ^^^^^^^ توقيعي هوندا وكل شي عندي هوندا لكن الحق ينقال

الفورد سيارة عملية من الدرجة الاولى وثاني شي 8 سلندر يعني خطوط وانسى شي اسمه صرف وانت ادرى

وسعرها فيها اما من جهة المستعمل اغسل يدك بموية باردة كمان السيارة الامريكية اللي جاية من امريكا مستعملة مافيها

خير وعلى ضمانتي

والشي الثاني الخطوط يعني زيادة قطع غيار يعني الفورد ارخص قطع من الهوندا

ملاحظة:

مع اني مع المقاطعة لكن وش اسوي انت طلبت النصيحة ومابي الف وادور

تحياتي
عذب الاحاسيس

توكل على الله وخد الفورد

وانت براحتك



تحياتي

مالك الاهوندا


تحياتي

قولك شي يا اخي
اذا كنت تبغى سيارة للسفر فاكيد بانصحك بلفورد بس فيه نقطة لازم تحطها في بالك ان الفورد السنة الجاية راح يتغير شكله
والفورد المواصفات الامريكية افضل من المواصفات السعودية ولو تبغى تتاكد روح جرب المواصفات السعودية والامريكية
صحيح ان المواصفات السعودية فيها مواصفات احسن مثل التكييف الخلفي والشكمانين بس تربيطه مهو مثل الامريكي
لان الفورد السعودي مجمع في كندا
اما بلنسبة للهوندا فهي ممتازة بس ما راح تجمل في السفريات الكثيرة مثل الفورد وقطعها اغلى من الفورد
وانت شوف المواصفات الي تريدها في السيارة اكثر وعليها اختار السيارة
ولا تنسى تستخير مرة واثنين وثلاثة الين ما تتطمن للسيارة الي بتاخذها
وشكرا

هههههههه

والله عجب

^
^
^
انا اوفقك في الرأي بقوة :)

اللهم في نقطة انه يشتري مواصفات امريكية ...

فأنا افضل المواصفات السعودية .. تجي شكمانين واقوا .. واقل مشاكل :)

شف تبي نصيحتي؟

انا واللله العظيم أأيدك بقوه في نقطة انك تدفع 84 الف على هوندا 4 سلندر لانه مافيها شي يخليها تستاهل او اي سياره 4 سلندر مثلها وبهالسعر المرتفع مو هوندا وبس حتى لو مرسدس وبمواصفات قليه و4 سلندر حرام <== كل هالكلام عشان ما يزعلون راعين الهوندا :)

المهم انا انصحك وبقوووووووووووه في الماركيز والله العظيم انها هي والفكتوريا احسن شي امريكي هاليومين من ناحية التحمل والكرف واتوقع بدون مبالغه انها مثل الاكورد ان ما كانت احسن لانها بعد ارخص قطع غيار بفرررق
واكبر وافخم واكشه واقوى والبنزين ما يفرق الصرفيه مع ان هذي 4 وهذي 8 وجرب وتشوف :) ان ما كانت الهوندا بعد اكثر :P

لكن تدري وش عيبها؟ انها تطامر واجد في الخط واذا حملت فيها واجد تطيح في الارض عاد مدري فيه لها حل هالمشكله ولا لا

نجي لفلوسك
شف ترى الحين فيه كثيييييير ماركيز امريكي تحصله نظيف مرررررره وبسعر معقول اقل من المبلغ اللي معك بعد

ولا تخاف من المشاكل لانه مافيه انشالله ونص الماركيز اللي بالرياض امريكيه :) وانا انصحك تروح للمعارض المختصه في هالنوعيات وشف

هذا اللي عندي وانشالله تتوفق في الاختيار

تحياتي

بقول لك حاجة

الهوندا مراتبها قاسية بصراحة .. ونوعا متعبة للي متعود على مراتب مريحة .. يعني تحتاج فترة تتعود عليها .. أو إنك تغير مراتبها أو تفصل عليها اسفنج بطريقة جيدة بعدين ترتاح

الفورد مريحة للغاية

ومن ناحية الكرف فالهوندا معروفة بالتحمل والكرف .. وأنا متأكد إنها تكرف كرف ما تكرفه الفورد أبدا .. وهذا عن تجربة

صحيح إنها 4 سلندر .. لكن تعطيك .. وبعدين اقتصادية

أنا بنفسي قاومت قراند ماركيز موديل 2000 وقمت عليه .. وقاومت كراون فيكتوريا ورحت عليه في القومة وراح في الخط .. لكن لو نكمل فوق 180 أروح عليه لأنه يفصل

وبعدين الهوندا يمسك سعره بعد الاستعمال .. يعني صعب إنك تقول حرام تدفع فيها الفلوس هذي

وإذا أخذت فل كامل - وهو المبلغ اللي معك - بتكون أفخم من الفورد .. لأنها بتجي بمراتب جلد وفتحة ومكيف الكتروني مزدوج وغيرها من المميزات الغير موجودة في الفورد بالسعر هذا

لكن .. إذا أنت تهتم بالراحة بشكل كبير فالفورد أريح

وإذا أنت تبي تكرف السيارة فخذ الهوندا .. أنا معي لها سنة و4 شهور ماشية 75000 .. وأحرق المكينة حرق .. وأمشي 220 .. وأطامر فيها في المطبات والتراب .. وماشية زي الحلاوة ما شاء الله تبارك الله

وبالنسبة للرساوة في الخط ما فيه فرق بين السيارتين .. أنا مجربهن كلهن

وأسعار قطع الغيار .. الفورد أرخص من الهوندا

وخدمة الوكالة يبدو لي متقاربة بين الوكالتين

وبصراحة .. القير العلاقي ينفرني من الفورد

ومن مميزات الفورد إنها وسيعة ومريحة وشنطتها واسعة .. لكن فلوسك ما تجيب نوع زين من الفورد

وأنت شف الأشياء اللي تهتم فيها وبترجح لك اللي بتشتريه إن شاء الله

ولا تنسى الاستخارة