بعد إذنك، سوف نختار موضوعك هذا ليكون موضوع سيارة الشهر في الموقع. بس الله يخليك وانت رايح تغير زيت عند الشركة المتحدة للسيارات تعطيهم خبر يمكن يكافئون الموقع بسيارة LHS. وأوعدك باخليك تسوقها.
من العصر وأنا طايح في الوكالة مكالمات. وأبشرك ... خل البشارة بعدين!
المهم اتصلت بالوكالة وقلت لهم نفس الكلام اللي قلته أنت. قالوا لي: كم واحد يشتري سيارة ثم يلعن السيارة والوكيل بسببها. هذا خويك يحمد ربه إنه حصل على سيارة أحلامه وهو مبسوط منها!
الجماعة بصراحة معاهم حق. بس أنا حلفت ما أصك التلفون إلا بشيء علشان لا أتفشل معاك.
قلت لهم: طيب كم واحد عنده سيارة أحلامه ومع ذلك ساكت عن محاسنها. وبعدين ترى الجميح وتوكيلات الجزيرة مكلميني يبون تلفون الرجال.
سكتوا الجماعة وقالوا خلاص ارسل لنا اللي كتبه خويك!!
بعد ساعة كلموني وقالوا موضوع خويك حولناه على كرايزلر لأن الشركة الأم أولى بمكافأته. خله يجيب معاه ملف علاقي وصور شمسية ومعروض وما يصير إلا كل خير.
فانتظر مكالمة من لي آيا كوكا أو واحد من ربعه! على فكرة هو لسه المسئول هناك ولا واحد ثاني؟
بس أقول لك حاجة وهذي مافيها مزح. قبل لا أفكر في موقع السيارات كنت سويت موقع بالإنجليزي لهواة إحدى الكاميرات الفوتوغرافية المشهورة. وكان نصف الإسم هو إسم تلك الماركة. يعني حتى الأعمى يعرف أن الموقع هو عن تلك الكاميرا. وأرسلت إلى الشركة أخبرهم بالموقع وعلشان أتأكد أنهم لا يمانعون من وجود اسم الشركة في اسم الموقع.
الشركة ما عارضت. لكن تصدق ورغم أن الموقع دعاية للشركة ورغم أن الموقع كان عالميا (موجه لكل هواة التصوير حول العالم) لم أحصل على كلمة شكر أو تشجيع واحدة!!
