السلام عليكم .. ياشباب ناوي على البيجو 307 وعاوز آرائكم

الأخ العزيز جورجيو أرماني ...

أنا بصراحة عندي بيجو 307 موديل 2004 ماشي ولله الحمد 13250 كم تقريبا ً ، السيارة فيها مميزات غير طبيعية وأنت طبعا ً شفت السيارة و تعرف مميزاتها الأكثر من رائعة....

اللي أبغى أقولك إياه من ناحية تجربتي مدة 8 شهور السيارة بصراحة عملية وحلوه وثبات ومواصفات وفخامة الحق يقال ...

اللي واجهتها من مشاكل تنسيم الهواء الربلة كانت تعبانه والحمد لله تم تغيرها على الضمان والبكرات تم تغيرها كذلك على الضمان طبعا ً السيارة ما تخلو من العيوب ومن العيوب اللي أنا أراها في السيارة من وجهة نظري

* العزم ضعيف (محرك 1.6 ) وطبعا ً فيها محرك 2.0 ولا يفرق كثير من ناحية تجربتي.
* السيارة ما تتحمل يسوقا أكثر من واحد للأسف لأن الجير حساس والماكينة يفضل أنها تتعود على دعسه وحده.
* الأنوار تحترق بسرعة.
* تعامل الوكالة سيئة نوعا ً وأحيانا ً يحدث تأخير من شدة الضغط على الوكالة.

هذا اللي أراه من وجهة نظري ... وعندي واحد من أصحابي عنده 307 موديل 2004 ماشي تقريبا 32000كم للأسف ما عنده عناية في السيارة والسيارة كل بين فترة وداها الوكالة وغير قماشات وبواجي والبطاريه في فترة قصيرة ويتأخر على الصيانة ويسب في السيارة ... وكذلك عندي واحد من أصحابي 307 موديل 2003 ماشي 86000كم والحمد لله عنايه في السيارة ولا يتأخر على الصيانة ويقول السيارة زي الحلاوة مرتاحة منها ...

آسف أشد الآسف على الأطالة .........






تحياتي







عاشق الجولف

نصيحة من أخ صادق ..

انحش عن البيجو ..

ياخي وش اللي حادك عليها ؟؟

بصراحة ما ياخذ البيجو الا غاوي شقا ..

لا وكيل زي الناس ولا قطع غيار زي الناس ولا سعر بعد البيع زي الناس !!!!!!

بـ 55 الف تجيب لك سيارتين من أفضل السيارات ...

تجيب لك هيونداي سوناتا (( 2005 )) شكلها جدا رائع ومواصفاتها ممتازة...

والسوناتا تستحمل الكرف وعملية جدا ... انا مجرب موديل 2003 شهر كامل والله ما شفت منها الا الخير :)

أحسن من سيارتي الكامري الحالية ( 2000 )

وبما ان ذوقك اوروبي .. شف لك الفورد مونديو ....

شكلها اوروبي .. وتصنع في المانيا ... وتراها نسخة من الباسات :)

شف هالسيارتين اللي قلت لك عليهن .. والله يوفقك

بس نصيحة الا البيجو

اخوي الحميدي مرحبا فيك, عارف والله الأكورد ممتازة ومن جد سيارة , بس المشكلة ان الشباب كلهم عندهم أكورد, أنا ابغى شي زي ماتقول كدة unique فريد من نوعه يعني ...المشكلة الثانية إن الأكورد سعرها غالي وزي ماقلت لكم لو عندي سيولة مادية ولا أفكر في غير اللكزس بس ايش نقول مشي حالك حالك يمشي .. وبعدين ترى الأكورد ماهي معصومة من العيوب خويي عنده أكورد ياكثر تنسيم الهواء والرجرات والصوت المزعج من الدركسون وغير كذة مشاكل, على الرغم من ذلك فهي سيارة ممتازة. انا ما اخترت البيجو 307 إلا بعد بحث, فأنا اشوف سعرها مناسب بالنسبة لمميزاتها وشكلها, وتبقى القاعدة الثابتة من وجهة نظري للحصول على سيارة مريحة هي المحافظة عليها .. مثلا يجيك واحد طل ما يطلع تلاقيه ماشي 200 وما يبغى الماكينة تطلع فيها مشاكل, هو داخل أو طالع من السيارة تلاقيه يسك الباب بقوة وما يبغى تنسيم هواء, كل ما طلع او نزل شغل المكيف ويوقف بالساعات والمكيف شغال وما يبغاه ينخرب, يفحط وياخد غرز وياكل مطبات وما يبغى المساعدات تنخرب والأقمشة تنمسح والبخاخات تتوسخ, تلاقيه كل ماجا واحد من أصحابه أعطاه السيارة وتلاقي 4 دعسات على سيارة واحدة بالله كيف ما يبغى المشاكل تطلع فيها ؟؟ المفروض الواحد يعامل السيارة بشكل لطيف, قد ما تعطيها هي تعطيك, إذا أهملتها هي تهملك وتطفشك... هذه القاعدة من وجهة نظري ومشكور على مروركم.

هلا اخوي اذا انت ناوي تتعذب انا اقلك خذ السياره ،،

واذا انت مو حق عذاب نصيحه ابعد عنها احسن لك هذي نصيحه لك ،، وانت حر


انا اقلك في سياره شبابيه اكثر وهي هوندا اكورد والله انها سيارات صح ،،

تراء البيجو والله فيها مشاكل تشيب الراس ،،

تحياتي لك

ياساتر !!! معقول بعد 10 أيام ؟ صيانة عادية يعني والا سيارتك لا سمح الله في خرابات زيادة ؟ انا نفسي اتضارب مع ساماكو لأنهم يعطلوني يومين في الصيانة تقوم تقلي 10 أيام ! بس أخي S8 أنا أذكر واحد من الشباب ما أعرفه معرفة مزبوطة يعني قد شفته كذة مرة مع أحد أقاربي يقول إن صيانتهم تقعد بالكثير يومين ( هو عنده بيجو 207 موديل 2002 ).

بالنسبة لأخوي لمشاكلك مع ال 607 فكان الله في عونك, بس زي ماتعرف يعني ال 607 تصنف ضمن فئة السيارات الفخمة, وعاد هم الله يكافيهم يقولوا مدام الراجل دا اشترى من دي الفئة لازم نشفط منه حق قطع الغيار مزبوط, انت لو جربت الفولكس واجن باسات ايش تقول, مو هديك السيارة الفخمة الي زي البيجو 607 لكن والله أسعار الصيانة نار وقطع الغيار اوووووف شي من جد يقهر, بس اخوي يعني ايش تبغانى نسوي يعني, بالله نرجع لعصر الكورولا والكامري وهدي السيارات الي تخليك ترجع لعصر التسعينات والثمانينات , صحيح إنا ماتخرب كثير وجامدة بس ياخي هذا كله على حساب الراحة والقيادة الجيدة والتجهيزات, والله الصراحة لو عندي سيولة مادية ولا فكرت في شي اسمه أوروبي وكان على طول اتوجهت للكزس, كل تجهيزات الرفاهية + ياباني ... الأوروبي يبغالك من جد تعتني فيه وتحط دم قلبك, أما الياباني زي التويوتا ياشيخ تعامله زي الحمار يكون زي الألف معاك ,, وازا تبغى قطع الغيار في البقالة تحصلها .. بقالة مين ياعمي تروح للحجة تحصلها ... الصراحة ماجربت اللكزس انا وما ادري اذا فيه مشاكل كثيرة وعن قطع غيارها, الي يبغى يشتري ياباني " تويوتا وهوندا بس ".

عموما انا راح اعمل خيرة واشوف ربنا ايش يكتب لنا ومشكور أخي الكريم.

الصراحه أخوي S8 كفى ووفى...