السلام عليكم ورحمه الله وبركاته . كيف حالكم يا اخوان صار عندي مشكله في دبل الجمس٢٠٠٦ شبه وكاله وانا في النفود وحاب اطرحها في المنتدا للفاده بعد ماحصلت الحل

مشكله في الدبلجمس ٢٠٠٦ يمسك على 4 الدفع الرباعي واحاول الرجعه على الزر 2 مايقبل علماً ان لمبات الازره حقت الدبل طافيه . ولايعشق القير الا النمره الاوله فقط ويكتب في الطبلون تصليح 4 الكفرات حول المتابه هذي المهم
انا توقعت ان الدبل ضرب حاولت احل المشكله في نفس الموقف ماقدرت وبعدها مشيته حتى وصل الطريق بعد معاناه وطلبت سطحه من ورا رماح حتى الرياض ووقفته عند البيت لان الساعه ٢ اليل مايمديني على الورش قلت بكره الله يعيني على سطحة ثانيه .. المهم صحيت الصباح الساعه ٩ قلت اشيك عليه قبل ما اطلب سطحه وبعد ماشغلته لقيت لمبه 4 الدبل شغاله ضغت 2 حقت فصل الدبل واشرت عده مرات وحسيت بصوت فصل الدبل وانفصل مشيت على السياره ولله الحمد طلعت سليمه . قلت لازم اوديها للصيانه كي يطمئن قلبي
رحت لترايستار الي على طريق خريص قبل مكتب العمل على اليمين عند واحد مهندس اسمه عادل فلسطيني ممتاز . المهم شرحت له الموضوع . قال حط السياره على الرافعه بعد مارفع السياره لقى تهريب من صوفه الدبل طبعاً قديم الصوفه هذي حقت الرمان الاماميه الي قريبه من الدينمو حق الدبل والحساس وتهرب الزيت حق الدبل وينزل على حساس الدبل فلما تعشق الدبل يطلعه الدينمو على الحساس ويتعطل الحساس ولا يفصل الدبل الا بعد تقريبا ١٠ ساعات او ٨ ساعات لمن نشف الحساس ونزل منه الزيت . بعض المهندسين الي مايخافو الله يطلب مبلغ كبير ويقول الدبل ضارب وهو موضوع صوفه فقط وتشتري حساس جديد ب ٢٠٠ والصوفه ب ٢٠٠ والشغل حق اليد تقريبا ٦٠٠
هذي لفايده لأشخاص الذين ماعندهم خبره في هذا الموضوع