مرحبا
شريت فورد كراون فيكتوريا 2009 سعودي مستعمله قبل كم سنة واستخدمتها سنتين ونص وكانت تجربة حلوة جدا جدا ماراح انساها. بعد سنتين ونص صدمني واحد من ورا وعدم علي الخلفية كاملة + الشاصية وبعت السيارة
شريت بعدها مازدا 6 2016 جديدة ولكن انصدمت صدمة حياتي الاستخدام اختلف علي بالكامل وعضيت اصابع الندم اني اخذتها. جلست معي سنة وبعتها بخسارة ولكن اهم شي الراحة النفسية لان فعلا ماعرفت لها ولا ارتحت لها ولا عجبتني ابدا
بحثت عن كراون فيكتوريا 2011 سعودي والحمدلله حصلت وشريتها من مالكها وكلي حماس باسترجاع ايام الفيكتوريا القديمة - طبعا حطيت مبلغ وقدره وشيكت الموتر بالكامل لان رحت بترومين وشيكت الموتر عنده من ناحية زيت مكينة زيت فير زيت دفرنس وفضيت الرديتر كامل وعبيته جديد ونظفت المكينة والبخاخات ورحت بعدها للعضيب شيكت الارضية عنده وعطاني تقرير بالخرابات وصلحتها كلها عنده مع ميزان وترصيص وفحصت عنده كمبيوتر وسليمة ما شاء الله
بعد فترة من الاستخدام 3 اشهر تقريبا احس ماش فيه شي مب صح يعني كأن السيارة اختلفت علي في قيادتها وفي مرتبة السواق والراحة مب نفس الفورد الاولى 2009 ما ادري هو وسواس ولا صدق او عشان استخدمت ياباني لمدة سنة كاملة الله اعلم
ولكن اللي لاحظته هو التالي:
1- مرتبة السواق المخمل فيها احس انه ماسك ملابسي مره ويبهذلني احس مب مرتاح وكل شوي اعدل جلستي من جهة المقعدة او من جهة الظهر
2- مرتبة السواق في المقعدة نفسها احس انها مرتفعة من جهة فخذي الايمن ومنخفضة من جهة الفخذ الايسر احس اني مايل جهة اليسار يعني وكل شوي اعدل جلستي لعلها تضبط الجلسة طبعا في 2009 ما اذكر اني عانيت من مشكلة الميلان هذي
3- للحين من شريت السيارة عجزت ارسي لي على وزنية معينه في المرتبة والمسند حق الظهر ودواسات البنزين كل يوم اقدمها وارجعها وارفعها وانزلها وماش للحين ماقدرت اختار وضعية معينة كل شوي اقول لا مب مريحة خلني اعدلها لان اول اذكر اني كنت مختار وزنية ثابتة ومرتاح فيها + الدواسات احس ان البنزين راجع ورا والفرامل متقدم قدام بحيث لو ببدل قدمي من بنزين الى فرامل تلقاني اشيل قدمي ورا شوي زيادة عشان اقدر اضغط فرامل
4- لاحظت نظام التعليق قاسي وماغير مطامر ومافيه ليونه عكس اول يوم كانت معي ال2009
5- عزم السيارة ضعيف مقارنة بال2009 لان وقت ال2009 اكون ماشي 100 واضغط لها اخر شي الموتر يفز فزه مب صاحية لدرجة احيانا يفحط الكفر - اما في 2011 ضعيف العزم
طبعا بحثت في كل مكان في النت عن الفروقات كلها مابين 2009 و 2011 لكن مالقيت ابدا الا بعض الاشياء التافهه مثل مسندة الراس الكبيرة في 2011 ومالقيت كلام رسمي
حاولت ابحث عن مرتبة السواق نفسها مالقيت معلومات رسمية عن اختلافات المرتبة مابين 2009 و 2011
طبعا بحثت عن صور المرتبتين لقيت فيه اختلاف في النقشه حقت الخياطة بس قلت يمكن شكل فقط والمحتوى نفسه مدري عاد وايضا لقيت ان الزر اللي ينفخ الظهر مختلف مكانة في الموديلين
طبعا رحت لمحل تلميع قلت فك لي المرتبة حقت السواق يمكن تكون مكسورة او شي وفكها لي وقلبها ومافيها اي شي سليمة ورجع ركبها لي وفكرت اني اروح اشتري مرتبة 2009 واركبها
ايضا احس اني متحسف قلت ليتني خذت فل بدل ما اخذ ستاندر لان الفل يجي جلد وعداد الكتروني وازرار خارجية ومكيف لمس ف قاعد افكر احولها فل لكن متردد وكم التكلفة لو بقلب السيارة فل كامل؟
المستخدم السابق احسه بخيل كيف اقدر اشيك وراه واشوف تقرير كامل عن السيارة؟ هل اروح للوكالة افحص مثلا؟
هذا اللي عندي حاليا ولو تذكرت شي بقوله لكممواضيع قد تعجبك