مرحبا بالجميع ،
كثر الكلام عن الباترول موديل 2017 بالمحرك الجديد الستة سلندر ... مابين مديح وذم ... والبعض طرح رأيه بناء على تجربته ... وفيه من طرح رأيه بناء على معلومات وأرقام المحرك والسيارة بشكل عام ...
وشخصياً ما ارتحت حتى جربته بحيث أعطي رأيي فيه بكل صراحة ووضوح ... وكعادة تجاربي مختصرة بس يمكن هالمرة أكثّر كلام ... تحملوني شوي
استاجرته ماشي حول 8 آلاف كيلو ... يعني شبه جديد .. فئة بلاتينوم موديل 2017 ستة سلندر بسعر 1200 ريال لمدة يوم ...
معلومات المحرك :
ستة سلندر بسعة 4.0 لتر بقوة 275 حصان والقير من سبع سرعات
هذا المحرك نفس محرك الاكستيرا والباثفندر الجيل الماضي لكن مع وجود بعض التحسينات والتعديلات والتطوير فيه ...
الحقيقة ان الموتر بطل ... والمحرك تحسه مناسب لحجمه ....!
فزته رائعة واستجابته ممتازة ... والقير تحسه ناعم ومريح السيارة ....
صوت المحرك مرتفع شوي لكن غير مزعج و لا يجعلك تصرف النظر عنه ....الى سرعة 70 وبعدها تحس المحرك صوته خفيف أو تقدر تقول ينام ...!
لا مقارنة بينه وبين محرك 8 سلندر 400 حصان اللي سبق وأن طرحت تجربتي له ...المحرك الثمانية أفضل ..
أما المحرك اللي تم إلغاءه 8 سلندر بقوة 320 حصان ... فالحقيقة ما جربته ... ولا أقدر أقارن بينهم ...
سبق لي تجربة محرك الأرمادا 8 سلندر ... وهو أفضل من الباترول 6 سلندر وإن كان قيره الأرمادا 5 سرعات ..
هل المحرك 6 سلندر جدير بالاقتناء ؟؟؟
نعم ... نعم .. نعم ... ثلاثة نعم !
المستخدم العادي واللي مهوب راعي مطارحات ومقاومات بيرتاح معه ...
ما جربته بالبر والطرق الوعرة لكن واضح من أداءه بالديرة انه يبيّض الوجه بالبر ...!
تمنيت اجربه مع تحميل ركاب وعفش وأشوف هل يثقل الموتر أو لا ... وللأسف ما حصل لي ..
على الرغم من ان المحرك مشترك مع الاكستيرا الا الفارق بين أداء السيارتين كبير بسبب التحسينات والقير اللي من سبع سرعات .. أنا موتري اكستيرا 2015 وحسيت بفرق لدرجة تقول المحركين مختلفين تماما ..!
وإن كان الثمانية سلندر أفضل .. هذا لا يعني أن الستة سيء ... كلها جيدة ..
إلى سرعة 150 الموتر ثابت وممتاز ..ولاتعديت هالسرعة .. وعموماً سيارة عائلية السرعة فيها مخاطرة وتهور ..!
لازال الباترول يحتاج إلى عزل أكثر ... بحكم انه سيارة باهظة الثمن وإن كان العزل جيد بشكل عام ...
نعومة المطب لينة عجيبة وممتعة ..
تقييم استهلاك الوقود سيء جدا حسب البطاقة المرفقة بالسيارة
لتر لكل 8.5 كيلو
وهاذي الصور مع بعض التعليقات
الموتر حجمه كبير بالديرة ومزعج شوي بالزحمات
الرحابة الداخلية مميزة سواء بالمقاعد الامامية او الخلفية وأشوفه أفضل من جيب اللكزس واللاندكروزر ...
الهوية الداخلية لمعظم سيارات نيسان أشوفها طولت شوي .. أصبحت مملة ..!!
باب كبير وثقيل المفروض تكون المساكة بالوسط وتكون أفقية ليست شبه عامودية لسهولة التحكم بها ... موقع المساكة مزعج لكبار السن والأطفال والعاجزين ..!!
سيارة قيمتها توصل 200 ألف .. مقاعد جلد بدون تسخين ولا تبريد ودرجة الحرارة عندنا توصل صفر بالشتاء و50 بالصيف ...!!!
هذا عيب مزعج ...!
حركة طي المقعد الثالث فقط حلوة ... يختفي ولا يأخذ مساحة كبيرة ....
اللي ما أعجبني بحركة طي المقعد الاخير الكهربائي انك اذا بغيت تطويه تضغط على الزر باستمرار مايكفيك ضغطة وحدة وهذا متعب شوي لاسيما ان نزول المقعد يكون ببطء ...!!
صورة محرك الباترول 6 سلندر
وهاذي صورة محرك الاكستيرا ونلاحظ بعض الاختلافات الخارجية
صنع في اليابان ... فقط في اليابان
هذا استكر بالكبوت عن المكيف وقلت أصوره لكم
هاذي تجربتي من غير مجاملة ولا تملق لأحد ...أتمنى تفيدكم ..
حصل لي تجربة عند وكيل نيسان بترومين ومجانية لكن ما حبيتها لأني ماراح آخذ راحتي بقيادته على مسافة ووقت أطول ...
بارك الله فيكم ..مواضيع قد تعجبك