[ ح ــياة التــم ــيز ][..;3074108']^^
سؤالك مهم صراحة..
بالنسبة لنا , لا لم نحاول بيعه من وقت شراءه حتى الآن..
لكن المهم في سؤالك انه هل الاستيراد الاميركي مرغوب عند البيع؟
في السيارات الاميركية ( أقصد من ماركات اميركية فورد و GM و كرايزلر و دودج و بلا بلا... )
الاختلاف ما راح يكون كبير , و الدليل شوف سوق التاهو و الاسكاليد المستورد, الفورد و الكرايزلر.
و ان كان فيه اختلاف فراح يكون طفيف لصالح السعودي طبعاً, و السبب يرجع لأن وكيلها موجود و العداد بالكيلو.
يعني في النهاية شي مخصص لك و لسوقك افضل من المستورد..
و لكن مثل ما ذكرت الفرق الطفيف هذا بسبب الوكيل و انها مخصصة للسوق السعودي
مو لفارق في السيارة ابداً
اما لو ننظر لسيارات مختلفة, راح نلقى مثلاً ان التويوتا و اللكزس خصوصاً اللكزس السعودي او الخليجي
يفرق سعره بشكل واضح عن المستورد الاميركي عند البيع ..
و نفس الامر لـ BMW و مرسيدس بنز..
الوضع تقريباً عادي, و من يرفع اسعار السعودي هم تجار المعارض الغير عادلين ومثل ما نسميهم الشريطية.
لان ما فيه اي سبب يخليك ترفع سعر السبارة..
مثلاً الكامري فل كامل الاميركي , المفروض يكون سعرها اعلى من السعودي صراحة في المستعمل..
لانها تجي 6 سلندر و مراتب جلد و حتى تشغيل بصمة, و انا اتكلم موديلات 2008 أتوقع.
في السعودي لازم تشتري كامري أسمها ( اوريون )
في الاميركي ما راح تلقى هذا الشي و الشركات ما تغير سياراتها ( للسوق الاميركي او السعودي )
مثل ما ذكرت لك ..
لذلك الشريطية ما راح يمديهم يقولك السعودي احسن و مدري ايش..
و لذلك خصوصاً في السيارات الاميركية المستوردة, ماراح تلقى فرق كبير في السعر.
تقدر تشوف موقع حراج, و تقارن بينهم في الاسعار ( المستورد و السعودي )
و راح تشوف ان اي شي ( صناعة اميركية ) ما يختلف كثير بل اختلاف لا يذكر على حسب نظافة السيارة
اما الصناعة اليابانية فيه اختلاف بالسعر, و من ثم الالماني و هو اقل اختلاف من الياباني..
يعني اكثر الصناعات الي تختلف اسعارها في المستورد هي السيارات اليابانية..
حتى السيارات اليابانية ( الي تصنع في اميركا ما يختلف سعرها )
مثل السيكويا و التاندرا و الافالون .. هذه اسعار المستورد فيها مثل اسعار السعودي تقريباً
و لو انه اقل من السعودي و لكن مو ذاك الفرق.
لو تشوف الانفينتي QX56 موديلات 2004 الى الان.. تلقى اسعاره متقاربة.. مع انه ياباني..
لكن ما احد يقدر يلعب فيه.. او يقول للناس بأن السعودي او الخليجي احسن..
بعكس اللكزس , الي يقولك هذا بريمي و عز الطلب و مدري وش :D
و فوق هذا ياخذون لوحات الاستيراد و يركبونها عشان الكشخة..
يعني المسألة في اللكزس صارت مظاهر و ليس بسبب فرق جوهري في السيارة
اتمنى اكون اقدتك و اي سؤال انا حاضر
كفيت و وفيت... ما شا الله عليك وأشكرك عالتوضيح.. اجبتني على سؤالي وعلى اسئلة كانت تدور براسي من فتره
