السلام عليكم ورحمة الله وبركاته
اعزائي اعضاء مكشات
هذا المقال ( القصة) كتبتها من واقع تجربة (علقة)
الرنج روفر
سيارة جميلة
ومركبها روعة
لكن يعيبها قطع الغيار.......................
الماكينة عملية لكن القير ناعم يعني مايتحمل ..
اغلب مشاكل السيارة سهلة لكن معقدة
مثلاً
يخرب عليك الهيدروليك وتذهب بالسيارة للوكالة وتكتشف ان الخراب في قطعة صغيرة قيمتها 13000 ريال
(ثلاثة عشر الف ريال)
تسوى لي فيها فاهم وتلغي الهيدروليك (فكرة جهنمية)
تلغي الهيدوليك وتركب يايات وتبحث عن اللي يناسبها بتقول اللاندروفر ولد عمة يعني القطع تتراكب
بعد الطرح والجمع تكلفك هذي العملية قرابة الستة الاف ريال
هذا والعملية كلها توليف في توليف(تلفيق)
بتقول 6000 ريال في تلفيق حرام وبعدين يمكن الشغلة ماتضبط
تستخير الله وتطيح عينك على يايات المرسيدس لانها رخيصة
وبعد الطرح والجمع تكلفك العملية 600 ريال فقط
وتقول هذا التفكير ولا بلاش من 13000 الى 600 ريال والله اني ذكي
وتبدأ العمل في التلفيق والتصليح وبعد يومين تخرج السيارة من الورشة طبعا في اليومين هذي تمدح نفسك وتقول (والله منيب سهل ) من 13000 الى 600 بصراحة انا عبقري وذكي وهذا التفكير لاقالوا تفكير على رواقة
وانت واقف عند الورشة تنادي المهندس طلعلي السيارة خلنا نجربها
وتطلعلك السيارة كأنها من السيارات الوحشية بس ناقصها كفرات شيول
وتقول للمهندس وشلون السيارة طلعت بها الشكل وبعد المناوشات والاجتماعات مع المهندس تتفقون على ان المهندس يقصر من اليايات حتى ان السيارة يكون شكلها طبيعي
وخلال يوم واحد فقط تجيك السيارة ولااحلى منها شكلها من برا ماتغير لكن الهيدروليك الله يخلف
وتطلع تجرب السيارة اول ما تتعدى 55كم/ساعة يصيح الكمبيوتر اللي في السيارة لانك مسرع
(الكمبيوتر معلق على ان السيارة طايحة (نازلة) لاقل درجة)
تقول ما احد داري اهم شئ ان السيارة يمشى عليها
وتستخدم السيارة شهر ومع المطاب والتطعيس الخفيف
تبدأ القرقعة والاصوات وكل ما اكلت مطب تحس ان المكينة تتهاوش مع القير كل واحد يقول انت السبب
ما تتحمل وتمل من السيارة وتبيعها ب50.000 ريال بعد ما كنت شاريها بأكثر من 200.000 ريال
تنقهر وتشتريلك شاص قديم وتحط حرتك فية ومايقول لا
هذا هو الرنج روفر الجديد على قولة الشيبان (الجيل التالي)
طبعا كان موديل السيارة 2000 وكانت ماشية اقل من 70.000 كم
