بسم الله الرحمن الرحيم
إخواني : يشكو الكثير منا من كثرة الغرامات التي تثقل كاهل المواطن الضعيف ، ومنها على سبيل المثال : غرامات المرور على اختلاف أشكالها وأنواعها = سرعة ، تجاوز خاطئ قطع إشارة - مع أن اللي يقطعها يستاهل غرامة لأنه تسبب في خطر عظيم له ولغيره - وقوف خطأ ............ إلى آخره
المهم من الموضوع أن هذه الأيام كثرت مسألة ( صقع المخالفات على الطرق ) سواءً بسبب أو بدون سبب !!!! إي والله بدون سبب ، كيف ؟
للأسف أن البعض من الضباط إذا صارت ميزانيتهم تلك السنة منخفضة - قالوا طلعوها من الشعب - ويصبح الدفتر بيد الفرد من أفرادهم ، وهات يا ( صقع مخالفات ) لأنك إذا ما تخلص الدفتر ( دفتر المخالفات ) راح تطبق يوم كامل ( يعني دبل دوام ) ، وإذا خلصته بدري راح تطلع من يوم تخلصه مباشرة ، ويالله أنت وشطارتك ..
على خط الشرقية تفاجأت بأربعة تفاتيش كلها على السرعة ، والمصيبة من ذلك ، أنه ما تكفي مخالفة وحدة وخلاص ، كل نقطة مخالفة ، ويالله عليك العد عاد ، والمشكلة أنه ليس هناك تفرقة في قيمة المخالفة بين من يمشي 121 أو اللي ضارب الطبلون 240 ، كلهم بنفس المستوى والدرجة في المخالفة - ولا شك أن هذا من الإجحاف وعدم الإنصاف .
وإذا رحت تسدد المخالفة من المرور الله يعينك تدفع 500 ريال على المخالفة الواحدة للسرعة - واحلم أنه يجيك تخفيض فيها ، لأنه للأسف عرفوا أن هذه المخالفة هي من أكثر المخالفات وقوعاً على الطرق ، لذلك أصبح من يعطيك إياها كل القطاعات ، وكل قطاع يقول الزود عندي في صقع المخالفات ((( مرور - أمن طرق - شرطة - أمن مناسبات - أمن عام - سيارات البلدية !!!!! امزح )
والمشكلة أن معاملاتك تتوقف في المرور والجوازات والأحوال المدنية حتى تسدد ما عليك من مخالفات !!!!!!
يعني مثلاً توك متزوج وتبي تضيف زوجتك في البطاقة ، قالوا لك : لا يا روح ماما عندك مخالفة روح سدد بعدين يصير خير ، تقول أنت : طيب وش دخل إضافة الزوجة في هالسالفة ! أنا بضيف زوجة مو سيارة !
قالو لك : مالنا شغل حبيب ماما ! إحنا نعرف كيف نخليكم تسددون !
ويروح المغلوب على أمره ويسدد نصف راتبه عشان خاطر المخالفات - اللي يمكن بعضها ظلم والله !
على كل حال مالكم من طويل فايدة ، هذه طريقة تساعدك بإذن الله تعالى في تجنب مخالفات المرور وأمن الطرق وهي خاصة بس في مسألة السرعة على الخطوط .... وهي ناتجة عن ما يلقاه المجتمع من هذه المخالفات من ظلم وإجحاف ، فقالوا : نساعد بعضنا البعض / والناس بالناس والكل بالله
خلاصة الطريقة هي : التكبيس : نعم التكبيس ( استخدام أنوار السيارة لتحذير القادم أمامك من الجهة الثانية إذا رأيت أن هناك تفتيش سرعة له )
لاحظت غير مرة أثناء مشيي بالطريق السريع أن المعاكس لي من الجهة الثانية ، يكبسون عبر العالي والواطي ، فقلت خير سلامات إيش اللي صاير !
شوي وإلا البشرية تهدي السرعة من حواليي ، وصاروا يمشون مثلي ( 112 )
ثوان معدودة ، وإلا ذاك الثعلب الرابض تحت الكبري من الطريق الثاني ومطلع جهاز الرادار ! مع أن التفتيش اللي قبله كان يبعد 15 كيلو فقط ! وهنا يكمن الخبث والدهاء
بعض أللي معاي على الطريق مساكين ما فهموا وش سالفة اللي يكبسون في وجيههم ، خاصة وأن التفتيش اللي قبله يبعد 15 كيلو فقط !
وتوهم مصقوعين مخالفة ! شوي والمساكين اللي يعينهم صقعوهم مخالفة ثانية !
ما شاء الله صارت مخالفتين ! في خلال أقل من 25 دقيقة ، يعني الله يعينك تدفع ألف ريال !!!! هذا إذا سلمت من بقية التفاتيش اللي في وجهك ، يعني إذا تبي تسافر للشرقية من الرياض أو العكس أحسن لك تسافر جو رايح جاي 280 ريال فقط ( يعني نصف قيمة المخالفة الواحدة ) ! ولا تعب الطريق ولا مخالفاته ولا مصاريف البنزين ولا أخطار الطرق الرهيبة !
المهم يا إخواني أنا ما أنصح بالسرعة أبداً خاصة الكبيرة التي تزيد عن 140
ولكن المشي 110 صراحة ممل على الطريق خاصة طريق الحجاز 1300 كيلو من الرياض يعني يبيلك يوم عشان توصل لأجل تسلم من المخالفات
ولذلك يا إخواني : حركة التكبيس هذه صارت متعارفة محلياً بين السيارات المسافرة على الطرق ، فأول ما تشوف بعض السيارات أمامك من الجهة المقابلة تكبس لك ، أعرف أنهم شافوا لك كمين تفتيش راح تمر عليه فهدئ السرعة مباشرة ، وأنت كذلك من يوم تشوف قدامك كمين تفتيش للسرعة للي جايين من الجهة الثانية فلا تبخل على المواطن الضعيف بأن تكبس للي جايين أمامك من الجهة الثانية لتحذرهم من هذا الأمر ...
وفي الختام : للعقلاء سلامي وأشواقي وأعان الله المواطن الضعيف على تحمل كاهل هذه الضرائب والغرامات ..
وأقول لكل عميل هذا الموضوع ليس خاص فيك ، لأن لو النظام يطبق على الجميع إنكان معليش ، لكن إذا طبق على الضعيف دون القوي فلا وألف لا ...
وكان الله في عون الضعيف ..
