porsche fan
الله يجزاك الجنة ما قصرت على ردك والأزيرا الصراحة روعة شفتها بالشارع جذابة جدا
بس والله خايف من اعتماديتها يعني بعد 3 سنين كيف راح يكون وضعها ...
ما الومك انك خايف من اعتماديتها كون الكثير يقول ان هونداي غير اعتمادية وهونداي وهونداي !
شوف انا بتكلم معك عن واقع تجربة والله على ما أقوله شهيد , اولاً الهونداي وحدة من اكثر السيارات اعتمادية اللي شفتها , وكل سنة الهونداي تتحسن اكثر واكثر من هالناحية وايضاً الجودة والفخامة والراحة وكل شئ يتحسن فيها , احنا نمتلك سيارة عائلية هونداي اسمها H-1 اذا تعرفها , شريناها بعام 2008 وبعام 2008 تغير شكلها فبعام 2008 كان هذا الشكل اول ضهور له , واحنا اخذنا الدفعة الأولى منها كونها جيل جديد وشكل جديد , ومعظم الأحيان وبمعظم السيارات اذا كانت السيارة من الدفعة الأولى يكون فيها اعطال مصنعية ومشاكل ومع الدفعة الثانية المصنع ينتبه لأخطائة ويعالجها وهذي تصير كثير اذا شركة نزلت شكل جديد من سيارة او نزلت سيارة جديدة كلياً , سيارتنا الهونداي اللي هي من الجيل الأول للحين عايشة معنا ولا مرة ودينها للوكالة عشان عطل فيها او حاجة , السبب الوحيد اللي وديناها عشان نغير زيت وفحمات فقط , الهونداي هذي مسكنا فيها خطوط اكثر من مرة , مسكنا فيها خط رايح وجاي من جدة مرتين , والشرقية مرتين ايضاً رايح وجاي , ومسكنا خط الجنوب , وخط الجنوب شوارعه سيئة جداً وحفر وجبال وحاله ومع ذلك السيارة للآن تحسها توها طالعه من الوكالة , اصوات ديكور مافيه اعطال مافيه , وانا قبل كم يوم اكلت بالسيارة رصيف لو انه بسيارة ثانية يمكن تخرب كل القطع السفلية بالسيارة من هالرصيف :bigggrin: , ومع ذلك السيارة مافيها شئ ولا اصوات ولا شئ مع ان الرصيف كان مرتفع وقوي
ولد عمتي عنده هونداي سوناتا 2010 , السيارة عايشة معاه من افضل ما يكون , وحب الهونداي كلها من بعد سيارته وعرف انها شركة محترفة صناعة سيارات , ولد عمتي هذا ساكن بجنوب الرياض وبالتحديد بالشفا , وهذي المنطقة ممكن تكون اسوأ منطقة مزفلته بالرياض , الشوارع هناك من اسوأ الشوارع وكلها حفر ومطبات وتصير السيارات هناك تمشي وهي تتهزهز ما تمشي بخط مستقيم من سوء الزفلته , ومع ذلك الهونداي حقته للآن عايشة ولا مرة طلبت منه شئ , وللمعلومية هو اخذها بنهاية عام 2009 وشوف كملت معاه على سوء شوارع جنوب الرياض
ايضاً استخدام التكاسي لسيارات الهونداي خير دليل على مدى اعتماديتها , وكثرتها بالشوارع ايضاً دليل
من رأيي تاخذها ولا تخاف من موضوع الاعتمادية , انا اضمن لك انها تعيش معك خمس سنين :xyxthumbs:
