[SIZE=4]بسم الله الرحمن الرحيم
[ قصتي مع المخدرات ]
اليوم اقدم لكم قصتي انا ( ملا غضنفر فلاش ) مع ابشع المحرمات و اسرعها مهلكة و اخطرها على المجتمع ... ~
اليوم اكتب لكم القصة و متردد اقول لكم قصتي عشان تستفيدون منها وله اكتم هالشي الي صار و ماخلي حد يستفيد من تجربة مُرّة انا مريت فيها ,, لكني خايف من انكم تبتعدون عني عقب ما تقرون هالسالفة الخطيرة ..... ‘
بس اطمنكم اني ودرت هالشي بفضل الله و بمساعدة احد الطيبين الله يجزيه خير ,,,,,
القصة صارت في سنة 2010 لكني كتبتها في بدايات 2011 من بعد شفائي و علاجي بعدة اشهر .... ~
قبل ما تبدأ القصة براويكم طريقة حياتي قبل التعاطي عشان تعرفون شو الي خسرته ...
1 - حياتي قبل التعاطي .... *
كنت موظف في احدى الجهات العسكرية المشددة كان راتبي يفوق المقدار الي اصرفه لإني كنت انسان قنوع و بما اني كنت عازب فما كنت اصرف وايد ....~
و كنت ساكن مع اهلي و كنت دايما اصلي و كنت من المواظبين على شئ اسمه صلاة و كنت كثير السماع للمحاضرات و الاشرطة الدينية ( مع اني كنت اسمع الاغاني في بعض الاحيان ) ‘‘
تخيلو قبل ما يصير فيني الي ياي > انا و شي اسمه جقارة ما كنا نيلس بغرفة و ما كنت اروح غرفة اخوي و لا حتى اركب وياه لإنه يدوخ و انا ماحب هالريحة !!
2 - اسباب التعاطي ... *
و كانت لي حبيبة تعرفت بها عن طريق النت و كنت اعشقها و هي نفس الشي تعشقني و نموت في بعض .... بقيت معها حوالي 3 سنوات و انا اكلمها فالمسنجر و كل شهر مرة او مرتين بالكثير اتكلم معاها بالتلفون ،، ~
كنت ادري هي بنت محتشمة و خجولة وايد و انا نيتي كانت صافية لها و ما تخيلت عمري اعيش بدونها و كانت على بالي دايما .. ‘
و بعد فترة شفت حبيبتي كأنها لما تشوفني تتضايق , كم مرة و جي احس فيها شئ بس ما تريد تقول لي ~
و في يوم من الايام مسكتها و حاصرتها و قلت لها اليوم لازم تقولين لي شو السالفة و شو الي صاير !! *
فما رادت فالبداية تقول لي و لكن بعد اصرار و الحاح مني باحت لي بكل الي صاير
قالت لي بإنها مخطوبة لولد عمها و ان اهلها اتفقو على كل شي بدون مشورتها
البنت كانت تدرس و هالي خلاني اتفائل بالخير و اقول اول ما بتخلصين الدراسة بخطفج منهم كلهم ( يعني بيي بتقدم لج ) و محد فالدنيا يقدر يبعدنا . . ~
لإني ما تخيلت انه ممكن يزوجونهم لبعض قبل ما هي تخلص دراستها و بعد فترة سرت انا في سفرة لخارج البلاد لمدة شهرين ثلاث و لما رديت كانت الصاعقة !!
صار الي ما كان بالحسبان ... ~ !
ولد عمها ملج عليها و اتفقو انهم يتزوجون بعد انتهاء السنة الدراسية !!! وحدة من رفيقاتها قالت لي ان القصة كيت و كيت و خلاص ما ينفع شي !! *
و هي سوت لي بلوك فالمسنجر و رقمها ما كنت حافظنه لإنها كانت محلفتني ماحفظه و دايما امسحه من السجل و الرسايل و مادق الا يوم هي تدق !! ~
فمن هني تدهورت حياتي ! صرت ماعرف انام ولا اكل ولا اشرب و دايما افكر فيها و فالي صار فيني . . ‘
قمت اكره حياتي و لو كان بيدي جان انتحرت وقتها حتى اني ما كنت اهتم في نفسي و مارتب عمري و مضيع الحلاق و الي يشوفني يقول هذا متخبل !! ~
3 - طريقة التعرف على المخدرات ... *
و في مرة من المرات طلعت مع الربع مع اني ما كنت اطلع مع حد في هالفترة لكن بعد اصرارهم سرنا الممزر تيلسنا ...~
الربع شافوني على غير حالتي لإني كنت دايما مبتسم و كنت الجوكر النشيط المستانس فسألوني شو السالفة و انا كله اقول ماشي و ماشي و محد يدري بسالفة هالبنت ،، ‘
و تمو يلحون علي وايد لين ما قلت لهم كل السالفة و الي استوا حسيت انهم تضايقو من السالفة و تأثرو بالي صار فيني . . ~
واحد من الربع الله يغربله و لا يوريه خير قال لي هدي اعصابك و ريح بالك الدنيا بكبرها ما تسوى ‘
و انا وقتها الدنيا ما كانت تعني عندي لي شي مول و قلت له : صدقك والله
و هالكلمة : صدقك والله هي الي غيرت مجرى حياتي بدون ما ادري !!!
و قال لي حط هالبندول فالبارد و اشربه ( الله يغربله كان مخدرات )
و لما شربته ما حسيت بشي و حسيت اني ارتحت و ان الهموم الي كانت في قلبي كلها راحت و تميت افضفض لهم ،، ~
و من ذاك اليوم و انا دايما كنت اخذ هالمادة المخدرة و اتعاطاها عشان تنسيني حب عشته
فالبداية كان يعطيني اياها ببلاش , لكن لما شاف اني ادمنت على المخدرات كان يقول لي هات بيزات عشان اجهز لك الحبة السحرية > طبعا لو كان يقول لي انها مخدرات يمكن كنت بغير رايي بس دايما كان ييب طاريها بأسماء حلوة مثل الحبة السحرية و البندول العجيب و جي
و انا ما كنت اقصر وياه و بدال ال500 و 200 اعطيه الف و الفين ولا تهمني البيزات اهم شي عندي النعشة و راحة البال المؤقتة الي كانت تيني . . ~
4 - حياتي و انا مدمن مخدرات !! *
و لما صرت مدمن ما قمت اعرف لا دوام وله شي حتى اني استقلت من الشغل لإني ما كان لي خاطر اروحو خاطري بس جي اقعد بدون ماسوي شي
و كان صديقي ( عدوي ) الملعون في وقتها هو الي كنت احسبه الصديق لإنه من وقف وياي و كان يريحني بهالمخدرات ،، ‘
و فترة بعد فترة و انا كنت ادمن اكثر و اكثر و احيانا كنت اتعاطى و امشي فالشوارع اروح وين ما توديني ريولي . . !
تخيلوني مثل البهيمة تايه مادري وين اروح و ضايع في هالشوارع تمر ايام شبابي بدون فايدة
و مضت ايام عمري حوالي 5 اشهر و انا اصرف كل ما عندي على هذا السم الملعون
و احيانا اعزم ربعي المدمنين على هالسم ..... ~
و بعد فترة فضى رصيدي فالبنك مع انه كان اكثر من 50 الف قبل كم من شهر !!!
لكن ما همني قمت اتسلف من اي حد اشوفه و كنت اتذلل في حالة اللاوعي و انا سجين هذي المادة المخدرة الي مادري شو مسوية فيني و صارت فترة و ما قام حد يسلفني و ما بقى لي حد غير اهلي !! *
امي كانت تعرف بسالفة هالبنت لإني كنت قايل لها الموضوع و انها انخطبت لكن ما عرفت انها ملجت !! ~
فيوم شافت حالتي قالت اكيد مثل الافلام الهندية حزين على حبيبتي و ان هالمشكلة بتزول مع مرور الوقت !! . .
لكن ما درو ان المشكلة اكبر من فراق و حب !! ~
و مرت الايام و قمت ابيع كل ما عندي و سيارتي سحبوها من البنك لإن راتبي ما كان ينزل !!
فما كان عندي شي اسويه الا اني اطلب من امي و ابوي لكن شقد اطلب و شقد يعطوني
فقمت اسرق من جيوبهم و انا حالتي تبدلت : من الي يصرف و يعطي فالبيت الى الي يصرف و ياخذ كل شي فالبيت . . ~
كنت اسرق من جيوبهم و من شنطهم و ماخلي حد في حاله حتى اخواني و خواتي الي اصغر عني !! ‘
5 – طريق العودة الى الحياة البشرية !! *
و في يوم من الايام تفاتنت مع اهلي و تضاربت وياهم و طلعت من البيت
و لقيت موتر اخو ربيعي (طبعا هذا اخوه كان متوفي في حادث سيارة و كان سكران يمكن هذا كان السبب في انه يساعدني ) ~
, موقفة صوب بيتهم
فقمت شليت حصى و كسرت الجامة ،، !
و قمت ادور فالموتر عن اي شي له جيمة اقدر ابيعه و انا في هاللحظة ما يهمني شي غير اني آخذ الحبوب السحرية و اريح مخي و ما دريت ان هالشخص لما سمع صوت التكسّير بيطلع من البيت . . ‘
لما خلصت شغلي من الموتر و شليت اغراض يمكن نظارته و يمكن المدواخ و ماذكر شو ... طلعت لقيته موجود يترياني !!
لما شافني قال لي : شو تسوي يا فلان !
و جان اتلعثم ( متبنج ) و مادري شو اقول و هو من حالتي عرف اني صرت مدمن (في مدمنين وايد في هالمنطقة ) و حالتي في ذاك الوقت ما كانت تسر لا صديق ولا عدو فهذا الريال الطيب الله يجزيه كل خير مد ايده و ساعدني و نصحني و ما زلت اتذكر هالجملة منه :
(( شاب وسيم و متدين و عاقل مثلك وين و هالامور وين ,, ليش تخلون الشيطان يلعب في عقولكم ,, انتو مستقبل اليوم تعال وياي )) ~
مع اني كنت خايف انهم يسجنوني او يسوون فيني شي وداني وياه لوحدة من المستشفيات الخاصة الكبيرة و تم يعالجني على حسابه و ما قصر وقف معاي وقفة مليون ريّال ! *
الله يرزقه الجنة بغير حساب و يحقق كل الي فباله و يسعده و يسعد كل الي يحبونه دايما ياااارب ،، ~
6 – بحمدلله تعافيت و تشافيت *
و احلى و اجمل لحظة اذكرها من بعد شفائي ان امي و ابوي زاروني فالمستشفى و شكله الريال الطيب قال لهم عن الي صار فيني و اني تعالجت من هالمرض ،،
اذكر ذاك اليوم تميت احضن كل واحد من امي و ابوي و اخواني و خواتي و اصيح و طلعت الحرة الي في قلبي من يوم ما فارقت حبيبتي اسميني ارتحت نفسيا ذاك اليوم و بعد فترة من يوم ما شفيت بحمد الله سرت و بلغت عن الي كان يعطيني مخدرات و كان ناوي يدمر مستقبلي و مستقبل شباب غيري و الله يعلم كم شخص تدمر مستقبله من هالملعون الله يلعنه و مسكوه بالجرم المشهود و معاه المواد و دش السجن ( اظني * مب متأكد * دخلوه مؤبد ) ~
و المدمنين الي كنت اعرفهم خليتهم يتعالجون غصبا عليهم و الحكومة ما قصرت وياهم و طبعا ما بنسى اول صلاة ظهر صليتها عقب هذي التجربة الخايسة و اني طولت السجود الاخير و كنت اقول سبحان الله و اعيدها و لساني ما يمل منها كأني شخص اندفن و الله اراد اني ارد للحياة مرة ثانية و ما وعيت بنفسي الا و اني كنت منسدح عالارض و السجادة يمي و نزلت دمعة وقتها مادري ليش يمكن لإني شعرت بسعادة لإن الله كتب لي حياة يديدة و يمكن حسرة على الشهور الي ماقدر اعيدهن و يمكن دمعة على كل شخص آذيته و انا في حالة اللاوعي و ماقدر اترجاه يسامحني . . *
7 - نصيحتي لكم + نظرة للمستقبل *
اترجى كل من يقرا قصتي يسامحني لو اني خطيت عليه فالشهور السابقة و تدعون لي ان الناس الي اذيتهم يسامحوني قبل يوم القيامة عشان ما تحاسب على افعال فعلتها و انا بهالحال .. و نصيحتي لكل شاب او شابة يصير له هالموقف و يحس انه صار مدمن للمخدرات انه يخبر اخوانه و اهله لإنه مهما صار هذيل اهلك و بيوقفون معاك و بيعالجونك و لو ما قلت لهم ممكن تخسرهم و تخسر حياتك و انا الحين الحمدلله رديت الى دوامي من عقب شوية ( مسكة باليس = واسطة ) و تحركات يمين و يسار و ترقيت بحمدالله .... ~
و خذيت لي سيارة ثانية و اكيد شفتوها ^^
و ناوي اخذ لي الجي تي ار اليديد شكله واو ههههههههههههه طبعا هالسالفة من كم من شهر و انا كنت في عز شبابي في سن ال19 و كان ممكن لو لا تدخل هالشخص الطيب اني ابقى طول العمر على هالطريق المظلم !! و غيرت المنطقة الي نحن ساكنين فيها ( ام خنور ) و انتقلنا لمنطقة ثانية جريبة منها بس مافيها هالكثر مشاكل و هالسوالف .. ~
و الله لا يوريكم مثل الي انا شفته و صدقوني(( نصيحة مجرب )) :
كل شي يتعوض الا الصحة و العافية ،، ~
و الحين يالس ادور لي حرمة و ناوي اكمل نص ديني بإذن الله
و الله الله في اعماركم و اسمحو لي عالاطالة .... ~
اخوكم يوسف البشكردي ( ملا غضنفر فلاش )
[/SIZE]
