هلا بالشباب .. يالله حيهم وبقهم
في اول يوم عيد قابلت واحد من الاعضاء , وشريت منه غطاء الاسبير مثل حق [COLOR=red]2008 الاسود ,[/COLOR]
بس فيه فتحه للكاميرا مخصص لـ 2010
وحبيت ابيعه لسببين :
1- لاني نسيت اني كنت حاط رابط المنتدى على غطاء الاستبنه الاصلي ولا ودي انه يروح ..
مع ان فيه امكانيه احط الرابط على البدي او على القزازه الخلفيه
.. بس هذي اللكاعه ونا اخوكم :P
2- ما توقعت ان هذا شكله .. انا متوقعه غطاء فيبر كامل مو وجه واحد .
-------------------------------------------------------------------------
طبعاً ابقولكم عيوبها علشان اكون صادق معكم .. واهم شئ الثقه والامانه .
1- الغطاء مو فيبر كـــامل , يعني بس من جهه وحده اللي هو الاماميه .. يعني تلبس الاستبنه تلبيسه .
2- اذا ركبته ودقيت R , بيصير على اطراف الكاميرا على الزوايا اسود .. علشان التلبيسه ..
3- فيها مخوش , وهذي صورتها بس للاسف ما طلعت واضحه بالكاميرا ..
فإللي وده يشوف الغطاء ماعندي مشكله ولو ماعنده اي نيه بالشراء ..
على الاقل يعرف ان غطاء الاستبنه له نوع آخر ويتعلم ومنها نشوفه ونتعرف عليه .
3- تراهو يركب بسرعه وينفك بسهوله ..<< اتوقع عرفتو المقصد ...
بالعربي اذا عندكم ناس حونشيه وراعين سرقات , يمكن يسرقونه منكم .. لانه تلبيسه ..
الا اذا انت بتوقف موترك في البيت او حارتكم سكنها محترمين .
الصور جايه بالطريق .. بس ماودي اعطيكم الصور قبل ما تقرون عيوبها ..
واحد من الاعضاء كان قاعد معي قبل ما اكتب الموضوع وتوني مقابله قبل شوي ..
ورفض اني اكتب عيوبها يقول ما يحتاج تشين سلعتك بزياده ..
بس يا شباب ما ابي واحد ياكلها مثلي .. << والمعذرة يا اللي شريت منه الغطاء..
صحيح اني قابلتك وتشرفنا بمعرفتك ونعم الرجل انت ..
بس انت تقولي ان الغطاء اخو الجديد وسليم , بس للاسف صارت ممخشه وفيها قطرات بويه ..
ومسحتها بموية وفوطه فقط ..
بس تكفى لا تقول اخو الجديد وسليم وهو مغبر شوي وممخش وفيه بقع بويه ..
يمكن اجرح مشاعرك وتزعل الان .. بس دقيت عليك و ارسلت لك رساله بس مالقيت اي رد منك ..
على العموم ..
انا برأت ذمتي واللي بيشوفها قبل ما يسومها برآآحته ..
على ما اذكر الرجال يقول شاريها بـ 700 والشحن بـ 200 ..
طيح قيمه الشحن صارت 700 وطيح قمتها لانها مستعمله
وصارت 350 ..
شريتها منه 400 وزوتدت السعر على بالي انه اخو الجديد وكنت محتاجه لو اشتريه بـ 700 ..
الصراحه مالي حد معين .. ولا انوي اني اكسب من وراها ..
ودي يرجع راس مالي واطلع منها بسلام ..
واذا ما جابت لي راس مالها , خيرة واستاهل انا , لاني سمت شئ وشريته وانا ما شفته ..
طبعاً انا نظفتها بفوطه ومويه فقط .. يمكن تختفي المخوش اذا غسلناها ونضفناها مزبوط ..
وهذي الصور يا الغوالي ..
ونفتح باب السومه بـ 300 ريال وبالتوفيق لكم ..
واللي يبي يشوفها قبل ما يسومها حياه الله ..
اخوكم : عبدالمجيد الكليب
