ماهي اسبـاب الحراره مع السرعات العاليه ..؟

تاكد من الخراطيش الجديده
اذا كانت تجاري فانها تكون ضعيفه اي ممكن ان تنضغط وتمنع جريان الماء من والى المكينه

اولا :تحتاج وزنية ديلكو . ثانيا: افحص البلوف هل هي موزونة ولا مشدود عليها بس اتوقع انك تحتاج وزن ديلكو وتضبط معاك انشالله.

مشكورين ياشباب ماقصرتوا والله :smile:

شف البلاستك الاسود اللي تحت الصدام الأمامي هذا تراه يجمع الهوى يمكن منه

اذا لم تنحل مشكلتك فلازم تغير غطاء الرديتر لانه هو السبب اذا مشيت ترتفع الحرارة

اخوي ناصر والله انت ماشالله تعجبني لايردك الا الطبلون هع..
بس شف انت تقول مايضره اذا نزلت الحراره الثلث واذا اسرعت زادت الحراره الى النص طيب اذا انت شايل هم النقطه هذي رجع البلف علشان يثبتلك الحراره وريح بالك وريح راس المكينه لان ترا الحراره لاصارت ترتفع وتنزل كثير وخصوصا عند بداية الصيف يختل توازن المكينه لانها طول الشتا بارده ومريحه بدون هالبلف يوم جا الحر قام يتلعوز وهذا سبب ان الناس اللي معهم امريكي او الماني قديم عند بداية الصيف بالرياض توقف سياراتهم حراره لانهم شايلين بلوف بينما الياباني الحراره ثابته ياالنص ياثلث .
السياره طبيعي مع السرعه تزيد حرارتها بس انت بمجرد ماترفع رجلك من البانزين مثلا قدام نقطه تفتيش مايمديك تهدي تنزل الحراره , لكن اذا الحراره تزيد فوق النص واذا هديت ماتحس انها تنزل هنا انتبه اما غير كذا لاتخاف توكل على الله وحط رجلك ولا يردك الا سدير.

السلام عليكم

اخوي ناصر مساك الله بالخير


يالحبيب انا معاي 96 اس اس اذا مشيت بالخط اكثر من 180 الى 200 الحراره ترتفع ومن 160 وتحت تقريبا تصير ثلث والثلث للكابرس يابعدي طبيييييييييعيييييييييييه جدا جدا وماجاك عندي .. تطمن وريح راسك لان السياره بالسرعات العاليه شي طبيعي ترتفع الحراره لان الضغط على المكينه قوي .. وصدقني حتى لو تحط فريزر بالمكينه ماراح يقلل عليك نسبه الحراره .. بس بالاخير حبيت اقولك شغله ... مادري سيارتك مكينتها مثل الاس اس والا تختلف ..

فيه هوز يجي من قدام المكينه وينزل تحت من جهة السائق والهوز هذا اوله المنيوم يجي تحت البخاخات ( الغطا الاسود الكبير اللي فوق المكينه ) هذا الهوز دايم يقفل من داخل وللتاكد من سلامته امسك الطرف اللي يدخل المويه الى المكينه وافتح البلف حقه وشغل السياره وشوف مسار الماء يجي معاك تمام والا لا .. اذا كان ماينزل مويه معناه مقفل عندك هذا الهوز او السيخ الالمنيوم .. بالطريقه هذي تبدله كامل تقريبا 150 ريال وشغل يد 50 ريال وانسى الحراره مدى الحياه ولو انت مافهمت علي انا اخدمك اذا انت بالدمام قابلني ومايكون خاطرك الا طيب ..


اتمنى اني افدتك

فمان الله

أي والله انا راديتر المكيف قدام راديتر التبريد ..... بفتح الهوز بكرى عليه وبرد لكم ههههه

يعطيكم العافيه ماقصرتوا والله

وشكلي ابخليها على حالها وبس

خساير على الفاضي

بسم الله الرحمن الرخيم
السلام عليكم ورحمة الله وبركاته
اخوي العزيز هناك اسباب كثيرة ارتفاع درجة الحرارة ...عليك ان تبدا باسهل الاسباب.
فائدة الثرموستات او البلف هو الحصول على افضل درجة حرارة ليكون تشغيل المحرك فيها
ذات كفاءة عالية لذلك عليك باعادة البلف الى المحرك بفصل الشتاء.
اما سؤالك عن ان مؤشر الحرارة يصل الى النصف فاعتقد عادي لان عندي ازيرا فالحرارة
تكون تحت النصف بشرطة...ومن اسباب ارتفاع الحرارة,,غطاء الراديتر,الراديتر,نوعية السائل
المستخدم,وجود صدأ بهيئة تكلسات تمنع انسياب السائل بشكل طبيعي,الثرموستات او البلف,كفاءة
المروحة,الراديتر الخاص بالتبريد لانها تثبت في الامام لذلك بفضل غسلها بين فترة واخرى,الكازكيت
,اي اعوجاج في راس الماكنة,قد يكون هناك خطأ في قراءة المؤشر(الكيج).
دمت............بود

اذا كان رديتر المكيف امام رديتر التبريد فأنصحك انك تغسل رديتر المكيف من الخارج بظغط ماء عالي عند اي مغسلة لان رديتر المكيف اذا كان متسخ يمنع مرور الهواء بسهولة الى الرديتر 0 سلااااام

^^^^^^^^^^^^

اهـا .. الله يعينك اذا لقيت حل خبرتك ان شاء الله

أيه انا ماترتفع الا مع الخط يعني اذا مسكت خط سفر تقريباً بعد ثلث ساعة ترتفع فووووق لين اظطر أهدي وأمشي 100

وسيارتي مازدا6 موديل 2003

جزاك الله خير ياابو فايز

اليوم طلعت السياره من الورشه غسيل اديتر ومكينه وللاسف مافاد :smilie20:

اخوي ناصر انا حدثت عندي نفس مشكله سيارتي وهي فكتوريا المشكله ان الحراره ترتفع عندي عند السرعات العاليه وتكون طبيعيه من ال 140 وانت نازل بس اذا زدت السرعه عن ال160 تزود الحراره وكنت شايل البلف ونصحني احد الاخوان اني ارجع البلف ورجعت الحراره طبيعيه مع اي سرعه وفي اي وقت الحمدلله انت اشتر بلف اصلي من الوكاله وحط ماء رديتر اصلي حذه من اي وكاله لا تأخذ من النصابين وجرب الله يوفقك

^^^^^

اذا ماترتفع الا بالخط بس وداخل المدينه تمام معناها ان الراس سليم تقريبا

وش نوع سيارتك ؟ كابرس بعد ؟

يالغالي انا مثلك اذا وصلت 140 ترتفع الحراراة للـH مع العلم ان حرارة السيارة الطبيعية تكون بالنصف لأني مركب بلف.... غيرت البلف والراديتر والطرمبة والمراوح سليمة 100% ماباقي شيء ماغيرته في دورة التبريد ومع هذا الحرارة ترتفع اذا وصلت 120-140

يقولون راس المكينة بس ماني مصدقهم؟؟

^^^^^^^^

والله تقدر تقول ماء عادي :bigggrin:

الاخضر راح من كثر مازود فيه من الماء العادي يوم كان الاديتر مشقوق ..

شاكر لك