لماذا الفكتوريا بالذات

الفكتوريا لايعلا عليه
الامريكي شيك عليه وفحصه وانشاء الله ربك يفرجها
السعودي حلو لاكن مواصفات مافيه وغالي

كلن دلا بدلوه
ونا بادلي بدولي
تبون الصدق يا جماعه للحين ما بعد لقيت موتر لا ياباني ولا امريكي ولا كوري ولا اي شي
بمثل الفكتوريا برحابه ورسميه وراحه ومع كل هذا ما تطلب
لو نروح للكابرس كلن يقول يطلب وصاينته صعبه وقطع غالي
الدوج معروف ان قطعه غاليه
الفورد معروف قطعه رخيصه وصيانته ما تكلف
وشكرا......

فعلا اخوي ttoo
لو انقطع الفورد وش بيكون البديل ؟؟؟؟

السلام عليكم ..


شوفو ياخواني الاعزاء.

ترى الفورد ..مايطلع منه خراابات الا اذا اشتريته مو نظيف او فيه خرابات وانت مافخصته ..((سؤاء سعودي او امريكي ))..


لكن والله لو انقطعت الفكتوريا تشوف الناس تنهبل ..<<<<تذكروو كلامي..

تحياااتي..

طبعا في نقطه مهمه وهي بالنسبه لمحبي السيارات الامريكيه
ان الخيارات اصبحت محدوده اما فورد او تشارجر او كابرس طبعا لتقاربهم بالاسعار والفئه
الفورد سياره معروفه والتشارجر جميله لكن نادره وغير مرغوبه والكابرس شكل ومواصفات لكن الي يذمونه اكثر من الي مدحونه
فاتوقع هذا الي ساعد الفورد كثير بالاقبال عليه وهي فعلا سياره ماتندم عليها
تحياتي

السلام عليكم

احيي جميع الاعضاء شدني لقراءة الموضوع الاخ قناص المملكة لما تابعت ردوده بعد مارد على موضوعي استفسار عن بليزر 2009.
كان عندي فكتوريا 99 ارقام باب وكرسي متحرك فقط من عام 2002 الى قبل شهر امريكي.
الفكتوريا من تجربتي لها تستاهل اكثر من قيمتها سعرها اقل من حقها والله يااخوان موتر وسيارة مابعدها سيارة بس مشكلتها الحجم كبيرة ورسمية شوي.
طبعا طول فترة امتلاكي لها كانت الصيانة عادية الى عام 2008 بنزين وزيت وفحمات بعد كذا كل كم شهر شوية تصليحات ماتتعدا 1500 ريال يعني بدت تحتاج تشييك قبل السفر بعد 9 سنوات من صناعتها وعدادها تجاوز 180 الف .
لكن يكفي انها ولايوم وقفت فيني ولطعتني عالخط.
طبعا سبب البيع اني مليت منها ولاكنت ناوي ابيعها كفرات وكمبريسر وبطارية وصيانة كاملة لكل شيء قبل ماابيعها بشهر.
لو امدح فيها من سيارة ما اخلص للصبح خرابتها مجرد ربل واشياء بسيطة بس نصيحتي للي يستخدمها لايركب شي الا اصلي وينتبه للزيوت والموية والفرامل لان فراملها ضعيفة شوي بسبب وزنها.
تحاتي لكل ملاك الفكتوريا.

انا جربت فوردين واحد سعودي والاخر امريكي
طبعا كلها مستعمله بس شبه جديده
ملاحظاتي كالتالي
الامريكي قبل لاتشتريه فيه عده يجب اخذها بالحسبان قبل كل شي
اولا: اللي يقول غرقان ومضروب بويه ومش عارف ايش ولا دوريه ولاتاكسي
اقوله خذ رقم الشاص واستعلم عنه وانا سويتها والحمدلله طلع الموتر اوتسي

ثانيا / بالنسبه للخربات والنظافه
انت لك عين ثاقبه افحص الموتر صح بدي وميكانيكا وتاكد من قبل الشراء

ثالثا
الامريكي يتفوق بالمواصفات كثيرا عن السعودي بمراحل

الاستخدام السعودي وكاله فقط لاحطو وكاله وليس مستعمل !!
الوكاله مضمون 100% باذن الله

ولكن المستعمل ماينبغي ولابريال الا اذا حصلت نظيف ومن شخص تعرفه وتعرف سواقته ومحافظته ع السياره

ولو خيرت بين امريكي وسعودي
راح اخذ امريكي اضمن لي واحسن لي مواصفات وارخص لي بعد من فورد سعودي اقل شي مافيه شماسات شمس ولا مواصفات وهذي وجهه نظر خاصه فيني

^^^^^

خمس نجوم بالنسبة للتصادم اللامامي و الجانبي لمدة 13 سنة متتالية

و عمل لها إختبارات اثبتت كفائتها في سلامة الركاب في حالات الانقلاب حفظنا الله وإياكم منها

و ذلك الذي اجبر وزارة الداخلية الامريكية والامن القومي على الطلب من شركة فورد إبقاء السيارة

ضمن صفوف الاسطول الامني الامريكي الذي يشتري 80 ألف سيارة سنويا 60 ألف منها كراون فيكتوريا

اتمنى اننا لم نخرج عن سياق الموضوع وفكرته لكنها نقطة اردت توضيحها

شكرا

ماعتقد ان مواصفات السلامة في الفورد افضل من السيارات التي ذكرتها


وانا ارى ان السعودي افضل بمليون مرة من الامريكي

الف شكر اخوي نجم666
وفعلا انت جبت الزبده
والسيارات بالاول والاخير توفيق من الله
حتى لو كانت جديده والشكر لكل من تواصل معي بالموضوع
تحياتي

السلام عليكم ...
من خلااال ورطتي مع الإستخدام الأمريكي... ومش أنا بس... غيري كثير من الشباب اللي توهق في الوارد الأمريكي.... توبه توبه توبه .... ما أشتري إلا سعودي ولا أنصح إلا بشراء سعودي...
سواء كان موديل جديد أو مستخدم لمن لا يستطيع شراء الجديد...

السيارات الأمريكية كلنا نتفق انها مواصفات حلوة... لكن ومن وجهة نظري هي لا تخلو من ثلاث:

..تشتريه وتعتقد فيها النظافة وهي من براء الله الله ....
وهي مصبوغة بالكامل بسبب حادث أو تغيير لون عشان تعتقد انها وكالة وتشتريها..

أو تجيك من مخلفات الفيضانات اللي حصلت في أمريكا قبل حوالي أربع سنوات ماضية وتجيك مصدية دمرانه

النوع الثالث وقلييل من يتوفق فية وهو النظيف ولا بعد تلقى العداد ملعوب فيه بس السيارة سليمة...


نصيحة لكل من يريد شراء فورد...

لا تشتري إلا سعودي وراح تلقى نظيف إذا فلوسك محدودة ....وخاصة في معارض الرياض

وجهة نظري ومشكور عالموضوع ياماجد9...

محبكم

طيب انا بقلك شيء
انت استخر ربك قبل كل شيء
وربك يفرجها بس حاول تشتري نظيف
وتكشف عليه
ولا تكون ماشيه كثير ولامصدوم ولا مصديه

صادق اخوي قناص الرياض
المشكله لمى تروح للورش وتلقى فوردات بالهبل
تتخوف صراحه تقول معقوله الفورد بلاويه كذا
ولمى تتاكد منها تلقاها استخدام
طبعا مو كل الاستخدام لكن نادر تلقى استخدام نظيف
لكن لو جينا للمنطق وبصراحه انا اشوف ان الفورد سعره فيه حتى لو غالي مقارنه
باسعار السيارات الاخرى الي وصلت لاسعار فلكيه صراحه
واتمنى المزيد من الاعضاء
تحياتي

اكيد الوكالة غير و افضل بمليون مرة

يعني كل العيوب ولمشاكل اللي يطرحها ملاك فكتوريا و تسجل على الفكتوريا على انها مشكلة فورد
دائما ما تأتي من الستعمل و عشان كذ الفورد ينظلم

يعني لو جا واحد بيشتري فكتوريا جديده ينط له يعض الناس ويقولون خذ لك مستعمله ونفس الشكل
و يصدق المسكين على باله انه وفر فلوسه و يوم يشتريها و يصير فيها اي مشكلة يقول هذي عيب تصنيعي في الفكتوريا على عكس الي يفكها جديدة

هلا يا الغالي من ناحيه الصبر كل واحد يقول الزين عندي

مثلا انا موتري ماركيز 2000

وخويي فكتوريا 2008

كل ما يركب معي يتحطم بسبب مواصفات الماركيز ومع كذا موديل 2000

بالنسبه للفورد المستعمل الصاله تعطيك ضمان عليه
يشمل الحراره والقير والمكيف وكذا

اذا كان الواحد ناوي يبيع السياره بع فتره يمكن يفكر بالمستعمل

اما الي يبي يشري السياره لفتره طويله وماعنده نيه يبيعها مايصير عنده مشكله انه يشري وكاله

وجه نظر فقط

مشكور اخوي

مشكور اخوي saeid 1988
بس انا ملاحظ شي غريب بالنسبه للاستخدام الامريكي تحس ان وقفت ورزته
تختلف عن السعودي
تحس السعودي له هيبه ورزه لكن الامريكي حتى لو نظيف تحس فيه شي غريب حتى لو موديل جديد
واتشرف بسماع باقي الاعضاء

مثل ما ذكر الاخ الكريم واضيف ان
الفورد ما يخوف مثل باقي السيارات المستعمله
وعندك شي ثاني ان الفكتوريا من موديل 98 الى 2009 ما تغير تغيير جذري والتغيرات بسيطة
فيلجأ البعض انه ياخذ مستعمل موديل 2007 مثلا ما تفرق بينه وبين الجديد 2009 وبسعر ارخص ويمكن مواصفات اعلى..
شكرا لك اخ ماجد على موضوعك.