لي تقريبا اربع شهور وانا ذابحتني الحيرة .. يوم اقول خلاص شارجر ومرة اقول كابريس ltz
وخلال هذه الشهور عرفت التالي
1- الدوج شارجر كشكل خارجي لا يعلى عليه
2- كل اللي يبسبون الشارجر كل معلوماتهم جايبينها من وكالة يقولون .. ولن تجد شخص واحد يسب الدوج عن تجربة
3- الدوج شارجر داخليه بكل امانة مو مره بل برأيي سيء.. واعتقد انك بتمل السيارة بسرعه لانك كصاحب سيارة بالنهاية بيهمك الداخلي مو الخارجي
وفي نهاية الامر استقر قراري على الدوج ... وكان سعر الـ se 2008 بـ83 الف
وسعر الـ ext 2008 بـ 103 الف
وفي صباح يوم الثلاثاء الماضي .. رحت بدفع العربون للوكالة على اساس اجيهم العصر وآعطيهم الباقي
وانا بطريق خريص .. مدري وش جاني وكأن احد يكلمني ويقولي التالي
يا رجال الدوج شكله حلو مره .. والكابريس شكله بعد حلو مره
الدوج كثير اللي يسبونه وحتى لو كانوا بدون تجربه لكن المثل يقول مافيه دخان من غير نار
الدوج مشكوك بأنه يعمر معك لاكثر من 4 او 5 سنين وانت رجال تبي سيارة تقعد معك لــ 7 سنين
داخلي الدوج لا يقارن ابد بداخلي الكابريس وتقدر تقول وش جاب الثرى للثرية
وبعد هالهاجس اللي جاني وانا بطريق خريص .. مادريت الا انا واقف قدام وكالة الجميح .. وكأن احد يسوقني سوق .. دخلت على طول قلت فيه ltz 2008 6 سلندر .. قال ايه قلت بكم ..قال 95ألف
قلت فيه لون اسود قال ايه .. قلت بشوفه قال طيب تعال .. اخذوني بسيارة لمستودعهم واكتشفت ان المستودع مليان موديلات 2008 من كل انواع السيارات
المهم اني شفت السيارة وقلت له طيب شوي وبرجعلك واروح بسرعه للوكيل العيسى وسألتهم اذا فيه 2008 كابريس قال لي لا ..
رجعت للجميح وعربنت والعصر دفعت الباقي
اللهم اجعلها خيرة لي يا رب ... ولا يزعلون مني اصحاب الدوج شارجر ..فمازلت اقول ان الدوج كل اللي يسبونه يسبونه من غير علم يقين .. لكني اخترت الكابريس
اخر شي يا شباب ابي منكم معلومات عن الكابريس ltz 2008 الـ6 سلندر
وخاصة شاشته لاني فهمت انها بس معلومات وليست ملاحة طيب اقدر ابرمجها ملاحة والا ما فيه امل
ولا تبخلون علي بكل المعلومات
وفقني الله واياكم
