بعض الاستفسارات عن الأزيرا هنا الجواب

شفو يا اخوان بالنسبه لريموت الازيرا .فيه 3 ازرار فتح + قفل + فتح الشنطه " يمكن سبقنا الاخ بندر بها" ... اما عن المدا .. انا السياره للحين معي سنتين ونصف والريموت للحين ما غيرت له البطاريات ... المدا الي وصله 400 متر تقريبا وهذا الكلام البارح ... اتوقع لو البطاريات جديده يوصل ل800 متر او اكثر ويمكن توصل كيلو .... هذا وسلامتكم ... واي استفسار انا حاضر .... علما بان الازيرا الي معي للحين ماشيه 135000 كم

ابسالمكم يرجاااال احد معه ازيرا ومشالله عليه وعليهااا عدا 200 الف كيلوووو وكيف بعد 200 السياارة ممتازة ............. كرما اتمنى الردووود ...... يرجاااال

الله الله الله .. ابدعت اخوي بندر

الله يسعدك دنيآ وآخره

وبآين عليك خابز الأزيرا خبز (تعرف كل مافيها) ماشاء الله عليك

افدنا اكثر واكثر الله لايهينك .. تراني استمتع بمثل المواضيع هذه

:)

سلمت اناملك , والله يخلي لك السيآره

.
.

بعض الأشياء من الأزيرا حبيت أضيفها
مثلا الريموت مداه بعيد ولا أعرف وين أقصى حد له
يعني أقدر أفتح السيارو وأقفلها من على بعد أكثر من ربع كيلو 250 متر
فما أدري من يقدر يفيدنا أبعد مدى للريموت لأانه بعد عن السيارة مسافة بعيدة جدا مثل ماقلت تقريبا ربع كيلو والسيارة تفتح وتسكر معاي من على بعد

الشيء الثاني يتعلق بالريموت وهو تقدر تعرف من على بعد لم تقفل السيارة هل أحد البيبان مو مقفل زين أو الشنطة مو مقفلة زين وحتى غطاء المحرك

في حالة إنه قفلت السيارة واشتغل انوار الفلشر فالسيارة مأمنة
وفي حالة ما اشتغلت أنوار الفلشر فمعناه إنه في باب مفتوح أو شطة أو غطاء المحرك

شيء آخر الريموت له تقريبا سنة ونصف وما ضعفت البطارية ومازال يرسل من مسافات بعيدة

إذا السيارة شغالة ما تقدر تتحكم بالريموت سواء إغلاق أو فتح
في حالة السيارة شغالة مستحيل تقدر تقفل الباب والباب مفتوح إلا اذا سكرت الباب تقفلها وإنت داخل السيارة وإذا حبيت تقفل الباب وإنت خارج السيارة ما تتقفل أبد إلا تتبع الخطوات التالية:
1- نزل شباك السائق والسيارة شغالة راح ينزل أوتو
2- قفل الباب حق السائق بالسنتر لوك
3- إدخل يدك من الشباك وإرفع الشباك حق السائق
في الحالة هذي السيارة مقفلة تماما وهي شغالة بس لازم تضمن إنه المفتاح الاحتياطي معاك

جهاز الانذار حق السرقة لا يتفعل إلا بعد مضي 30 ثانية من إقفال السيارة بالريموت
أما قبل 30 ثانية فتقدر تفتح أي باب بدون تشغيل جهاز الإنذار

للتشيك على النظام الأمني للإنذار هل هو شغال أو لا
في معظم السيارات تقدر تجرب جهاز الإنذار من الريموت هل هو شغال أولا
بالنسبة للأزيرا الوضع يختلف

للتشيك على النظام اتبع الآتي:
قفل السيارة بالريموت وناظر أعلى الطبلون
تلقى لمبة لونها أحمر أعلى الطبلون جنب القزاز الأمامي فيه حالتين
1- إذا اشتغل اللمبة باستمرار بدون ما تعطي فلاش ( يعني تطفى وتشتغل باستمرار)
فهذا عطل بالجهاز الأمني للسيارة والجهاز مارجع
2- في حالة إنه أعطت نور متصل لمدة 30 ثانية ثم اعطت فلاش فمعناه إنه النظام يعمل بصورة جيدة

فائدة أخرى للمبة الي على الطبلون وهي تعطيك علامة عن نظام امني خاص بمحرك السيارة ففي حالة إدخال المفتاح بالسويتش بدون أن تلف المفتاح للتشغيل تطفأ اللمبة حتى تخرج المفتاح وهذا يعطيك علامة بأن المفتاح جيد ويمكنك تشغيل المحرك بأعطيكم حالتين:
1- في حال إدخال مفتاح واللمبة إلي أعلى الطبلون ما طفت فمعناه العطل من المفتاح في حالة عدم القدرة على تشغيل السيارة أو إدارة المحرك
2- في حالة إنه اللمبة طفت ولكن السيارة لن تدار فالمشكلة ممكن ن البطارية أو المحرك نفسه وليس بالنظام الأمني


أتمنى إني افدتكم ببعض المعلومات وقد تكون معروفة لكثير منا


أخوكم بندر

^^^^^^^^^^^
مو أبرمج الشبابيك قاعد أشوف أي حركة ممكن تتبرمج على الريموت قصدي هههههههه

وياليت أخوي عبدالعزيز تفيدنا اشلون ولا مثل ماشريتها مبرمجة من الوكالة على الريموت

^
^

وليشت تبرمجها اذا هي شغاله عندك

الكلام اذا كانت ما تشتغل يعني القزاز مايرتفع بضغطة زر تسوي لها الحركه

مسألة ربط الذاكره بالريموت سواها اخونا ابوعبدالعزيز وانا ماعرفتها او يمكن ما تضبط بسيارتي

أخوي بلا حدود
ضغط أكثر من زر في السيارة 3 و 4 و 5
ما تغيير شيء معاي
تصدق ضغط على أزرار الشبابيك 5 ثواني
ولا تغيير الأوتو ولا شيء وقاعد أجرب ممكن سويت برمجة على الريموت ارفعها وانزلها
برضه ما صار شيء

ما في أحد يقدر يفيدنا بالبرمجة هذي بأي طريقة وبأي وسيلة ولو من موقع أجنبي :a120(89):

معقولة البرمجة موووجودة بس ميفعلةونهاا الى الشركة ودى افجر الشركة ............ يووم السبت وخير ____..00.. الاخ عصب

ليش عشانه كيا

:D

^
^

السورينتو يقولون ماله برمجه :D

^ ^
يبي لنا واحد يفتح إنجليزي يبحث عن أسرار البرمجة

في سيارات هونداي

تكفى أخوي فارس ودي أعرف أي شغلة تقدر تعرفها إذا قدرت أفعلها
شكله فيها أشياء بس يبي للواحد يعرفها
أجل أجلس أجرب كل زر 3 ثواني :a120(37):

^^^^^^^^^^

أنا لاحـظت بمشكـلة القزازه عندي أنها إذا فصـلت البطاريه

ماترتفع أوتو

لكــن مشكووور على المعلومه

هلا بندر الجهاز مو متوفر الا بالوكاله والوكاله اللي تسوي لك الامور هذي بالنسبه لي ما دفعت ولا ريال ويبطون يشدون ريال هذي المواصفات اعتبر نفسي شاريها مع قيمة السياره ومن حقي افعلها بدون تكلفه ومو مشكلتي ان هيونداي ما وفرت خاصيه يقدر صاحب السياره منها يفعل هالمميزات

المفروض يكون فيها زي اليوكون والكابريس واللومينا تقدر تكيف السياره على كيفك مو لازم تروح الوكاله

وفيه حركات تسويها بالسياره تتحكم فيها ببعض المميزات بدون الجهاز لأني مره مودي السياره الفحص والظاهر فصلو البطاريه ويوم استلمتها لاحظت ان الدرايش الاماميه ما تفتح اوتو يعني ميزة الاوتو غير مفعله ورحت كلمت المهندس وقالي علق على زر القزازه كأنك بتفتحها 3 ثواني وبتتفعل معك وسويتها لقزازة السواق والراكب وتفعلت وانا متأكد ان فيه شغلات ثانيه بنفس الطريقه لكن من اللي يعرفها او وين نقدر نحصل هالمعلومات

بالنسبه للجهاز ماله سعر لأنه ما ينباع انا عرضت الخمس الاف على الوكاله ابيهم يبيعونه لي لكن رفضو لأن شركة هيونداي الأم تمنع بيع الجهاز على حد كلامهم

الله يبارك فيك أخوي بلا حدود
بس ممكن كم سؤال

طريقة تفعيل تقديم الكرسي وارجاعه مع التكلفة وهل اي مكان يقدر يسويها ؟؟
طريقة برمجة البيبان تقفل اذا وضعتها في D بتكون أفضل من إذا مشت 30 مع التكلفة وأي مكا يقدر يسويها؟؟

بالنسبة للجهاز الي تقوله ليش مايبعونه وأنا ودي أشتريه بس مو كأنه غالي شوي
ومميزات الجهاز والمعلومات مثل شاشة معلومات اليوكن يعطيك كل شيء تبيه

الله يجزاك خير


أخوك بندر

أشكر أخوي على التقييم والتهنئة والله يبارك فيك


أخوك بندر

ماشاء الله تقرير ولا اروع يا اخ بندر ... وانا من سكان الخميس جنبك ... والازيرا سيارة ولا اروع .. بس شكلك انت حان عليها وبقوه 40,000 ... الي عندي 130،000 موديل 2006
وولحيين اللهم لك الحمد ماشيه معي تمام التمام .. انا حبيت اشكرك على هالموضوع المتميز مع تمنياتي لك بالتوفيق

مـوضــوع لا يعـلى عليه
و مجـهود رائع منك اخي الكـريم

يعطـيك ألف عافيه

^
^

لا ما انصح احد يقيم المشاركه كلها نصب في نصب :D

حبيت امزح معك بس يا بندر

بالنسبه لميزة رجوع الكرسي هذي سويت لها تفعيل من عند الوكاله واي واحد يملك ازيرا يقدر يسويها

حساس المطر لا يوجد بأي ازيرا في المملكه

6 سيديات نعم متوفر في اللي بدون شاشه

ميزة اقفال الابواب تقدر تفعلها من الوكيل ولها عدة خيارات " اقفال بعد تجاوز 30 , اقفال عند وضع القير على الدي "

طبعاً فيه مواصفات كثيره للأزيرا غير مفعله من المصنع ومو موجوده للأسف في دليل مالك السياره ولا يوجد اي مانويل يوضح المواصفات اللي غير مفعله من المصنع

كان ودي احصل " الكوميناكيتور " الجهاز اللي يستخدم بالوكاله لكنه لا يُباع للأسف

عرضت على الوكاله 5000 ريال + واسطه بس رفضو يبيعونه لي

الجهاز مفيد جداً تقدر تفعل المميزات اللي تبيها وتلغي اللي ماتبيها خصوصاً انك ما تقدر تتحكم فيها من شاشة المعلومات بالسياره

بالاضافه الى انك تقدر تسوي لها صيانه بنفسك وتفحص المشاكل لو كنت تملك هذا الجهاز

كل شي تقدر تتحكم فيه من الجهاز واتفه الامور تقدر تكيفها على هواك مثلاً كم مره تبي الفلشر يولع اذا فتحت السياره بالريموت

طبعاً الشغلات هذي اكتشفتها بنفسي وقت ما يطق عندي عرق اللقافه وادخل الورشه متسللاً , اصيد كم معلومه قبل ما انطرد

ولا الوكاله للأسف ماتصرح بهذي الامور ابداً مدري ليش