السلام عليكم ورحمة الله وبركاته
*
*
*
من خمس أيام تقريبا كنت في طريق الملك عبدالله وإحتجت أغير زيت وسيفون .... وأطالع بعد مفروشات المطلق وأنا متجه للروضة لقيت مركز الراشد وفيه كفرات وغيار زيت لا وسطحه بعد ....... قلت يالله توكلت على الله ودخلت موتري على الحفرة
وجاني اليماني وسألني : مرحبا .... قلت له أبغير زيت وسيفون .... طلعت من السيارة وأطالع فيه وهو ينظف السيارة من داخل ويشيل ورق الشجر اللي طايح بالكبوت ...... خدمة مميزة .....:rolleyes: ..... وبعدين فك الصرة والسيفون عيا يطلع معاه وكان الموتر حار جاب - أعزكم الله - خرقة حمراء ((( لا أنساها ))) ولفها على يده عشان حرارة المحرك... وبعد معاناة تدل على عدم التمرس بالمهنة إنفك الفلتر
وجاب فلتر جديد وحطه بمعاناة أيضا ومحاولات مستميته .... والله خفت وكان خوفي بمحله ... وغير الزيت وقال لي شغل السيارة ....وفتح فلتر الهوا وسألني تغيره قلت لأ ... نظفه بالهوا وياليته ما نظفه ..... فجأة تغيرت ملامح مساعده صغير السن وبحركة غير واضحة سكته وقال لي طف السيارة وشغلها مرة ثانية .... مافهمت ليش بس سويت مثل ماقال قفل علبة فلتر الهواء وقال 95 ريال دفعتهم ونزلت عن الحفرة ووقفت السيار أصفر عداد تغيير الزيت لقيت مساعده صغير السن أصابه قلق مافهمت ليش
مشيت بالسيارة للروضة ولقيتها تطفي وهي ماشية بعد 10 كلم من مركز الراشد المشؤوم ....شغلته اشتغلت وتبي تطفى أدعس لها وما تستجيب وكنت باصدم أكثر من مرة وإذا جيت إشارة أدعس والجير بال N ...... وبعدها إشتغلت تمام قلت الحمد لله بروح البيت وبكرة بعد الدوام بشيك عليها ........ورحت الدوام وبعد الدوام جاني مشوار للأهل وصلتهم وعلى كبري الخليج رجعت المشكلة أخف من أول وصلتهم بحمد الله وراجع البيت وطفت السيارة بعد كبري الخليج وتهدي السيارة وورى شاحنة قلت الله يستر بس .... طلعت من السريع ووقفت عند الحرس الوطني حاولت أشغل السيارة وصار لي أغرب شي بحياتي .... دعاسة البنزين بمكانها والبنزين يزيد ويخف ويزيد ويخف جتني دورية وطلع لي العسكري سمع الموتر يسويها وأنا طلعت منها ضحك وقال إفتح الكبوت خل الجني يطلع :D
قال لي طف السيارة وطلبلي جزاه الله خير سطحة شالتها ب 100 ريال على الروضة:eek: .... إستغلال ! ... حطيتها بمحطة نفط جاني كهربائي قال وش صار معاك قلت له غيرت الزيت طفيت السيارة وفك فلتر الهوا والجزء اللي بعده - سامحوني مني خبير :D - وطلع منه الخرقة الحمرا اللي كانت ملفوفة على يد أخونا اليماني الله يصلحه .....
وبكذا أكون دفعت 125 ريال وتوهقت بالطريق السريع وكان ممكن يكونوا الأهل معي بسبب غلطة أبو يمن اللي عيا يصلحها أو يدلني على اللي صار
حسبي الله ونعم الوكيل
