غبار اسود على الجنوط الاماميه ؟

أنا مشكلتي مهيب التأثير على السياره

المشكلة انه الكفر عندي كفر خطر و الجنوط فضيه كل شوي يتوسخن و لا يطلع للموتر شكل

يعني كل يوم اغسلها و المع الكفر ؟ الصبح اغسل و في الليل اسود !!

طيب يا اخوان انا عندي يطلع الغبار بقوة , و الفحمات اصليه شاريها من فرع لعبداللطيف و الهوبات مخروطة صح , ليش انا بالذات يطلع الغبار بها الكثر , ما انكر ان يطلع غبار لكن مهوب بها القوة , اخوياي اللي معهم هايلكسات اذكرهم بالأسبوع يغسلون و هالمشكلة مهيب عندهم بهالكثرة ...


يعني أكيد فيه مشكلة لان هالغبار مهوب طبيعي , أجل لو خليته يومين او ثلاث صار الجنط اسود !!

الغبار هذا كنت اشوفه عندي من سنتين ولا اهتميت له

لأنه ما يأثر عالسيارة و لا على عمر الفحمات

يعني ما يحتاج تخسر فلوس عالفاضي

يا اخوان انا رحت محل قطع غيار تابع لعبداللطيف , قلت عطني قماشات اماميه قال ما فيه قماشات اماميه , فيه فحمات


و انا بالاصل يوم جيت اخرط الهوبات شريت فحمات اصليه من عبداللطيف و خرطت الهوبات

لكن انا أبي المشكلة وين , لان جميع الميكانيكيين قالو لي الكليبر ماله دخل بالغبار الاسود


أبي حل يا أخوان جزاكم الله خير مهوب تخمينات ...

انا عندي نفس الشئ وفي الجنط الامامي فقط
السيارة وكالة على يدي ولا غيرت الهوب ابد

الامر طبيعي برأيي لان الفحمات ( القماشات) تتاكل مع الاستعمال وتآكلها يكون بترك البودرة هذه

انا سيارتي ماكسيما واعرف واحد عنده فورتشنر ونفس الشئ

اشتر طقم هوبات جديد وطقم فحمات امامي جديد من عبداللطيف
لاتشتري من السوق
وشف لك ورشه محترمه,, اذا ماتبي تدخل سيارتك صيانه عبداللطيف..
وشيك على الكليبر وقسام علبه الزيت ..
انا اجزم ان الهوبات مغيره وليست اصليه ...

أخوي إذا خرط الهوبات لازم تغير الفحمات اذا كانو مخلصين بس اذا كان فيهم نفس فراح ياخذون فتره عشان ياخذون على شكل الهوبات يعني الغبار الاسود هو صقل لسطح الفحمات وهذا شيء طبيعي ولا تعور قلبك انسى الموضوع وراح يروح انشالله، أو اذا حبيت ما تنطر غير الفحمات وراح يروح الغبار. يعطيكم العافية...

أيه ياخوي بس أريد حل , لأني مريت كل الصناعيه يقولون الفحمات الفحمات ... ياخوي تقول ما عندهم سالفه

إذا تنصحوني اغير قماشات , إن شاء الله بركب قماشات وكاله تويوتا أصليه

اصبر شوي على القماشات حتى تاخذ على الهوب و ان شاء الله تقل المشكلة كثير

اتوقع في البداية مهما كانت الخراطة ممتازة و الاقمشة اصلية
الاسطح ما تكون متطابفة بشكل كامل فيكون التاكل كبير شوي في اول الايام ومع الزمن تتراكب الاسطح وياخذ القماش على الهوب و يقل التاكل


ما انصحك تخرط اذا ما فيه مشكلة اخرى غير هذي يروح عليك الهواب خراطة في خراطة

تحياتي

مو إحتمال يكون السبب من نفس مادة القماشات اللي تخلي هذا الغبار يتجمع على الجنط
ففي أنواع من القماشات صخري وصوفي جرب
لكن أتوقع إن النوع اللي يخلي الجنط يصير أسود هو الأسلم للهوبات والله العالم

الله يجزاكم بالجنه , عرضتها على الصناعيه كلها عندنا قالو مافيه حل غير تغيير الفحمات

ياخوي ليش المشكلة فقط في سيارتي و جميع هايلكسات اخوياي مافيها هالمشكلة وسواقتهم اقشر من سواقتي

هل إذا غيرت القماشات تروح المشكلة ؟ لان واحد قالي اخرط و غير القماشات و تصلح


الله يبارك لكم افيدوني ...

طبيعي جدا

و القماشات تتاكل بشكل طبيعي في كل السيارات و الا عمرها ما تخلص و تحتاج تتغيير

انا معاى مرسيدس و نفس المشكلة و يمكن اكثر من سيارتك لدرجة انه لما يغسلها الحارس تترك اثر على الارضية من كثر الغبار

اتوقع بعض الانواع من الاقمشة حتى لو اصليه فيها قابلة للالتصاق بالجنط و التجمع عليه بينما انواع اخرى تطير البودرة مع الهواء بدون تراكم و هذي المشكلة
ويمكن تصميم فتحات الجنط يكون له دور

بالنسبه للمسيدس E مثل الي معاي المشكلة شائعة و يشكون منها كثر في المواقع الاجنبية و اتذكر واحد ذكر انه اشترى نوع خاص من الاقمشة لمنع تراكم البودرة طبعا من غير الوكالة لكن هل متوفر هنا مثل هذا النوع لسياراتك ما اظن

نظف الجنوط مضبوط لا تكون مزيتة

و مشى حالك

وعليكم السلام و رحمة الله و بركاته حياك الله اخوي

الغبار هذا يعتبر طبيعي واذا انت منزعج منه كما قلت ان تعمل خرطه وتكونفي مكان جيد كما فعلت انت ولكن مع الخرطة لابد من تغيير القماشات اي السفايف

كما قال لك الاخ عميد الطائف للتماشا مع الهوب الجديد

وليس هناك ظمان لزوال الغبار الا ان تكون فتحات الجنوط واسعه وتهوي اكثر ممكن هذا الشي يفيد اكثر
والله اعلم

اغلب السيارات يجي فيها

وسع صدرك انت ولاتشيل بها هم

والسلام عليكم

نعم يوجد قماشات بالتأكيد.. وليس لدي علم عن سعرها ولكني أتوقع أن تكون الأرخص لدى تويوتا..

أتوقع ( ولست متأكداً ) أن القماش السابق تشكل على حسب سطح الهوب المتعرج قبل الخرط.. وبعد الخرط لم يتناسب سطح القماش المتعرج مع سطح الهوب المستوي... والله أعلم.. أنصحك بعرضها وفحصها في الورشة..

بارك الله فيك , لكن اخي العزيز انا سويت خرط 100% في أفضل مخرطة عندنا , لكن البعض يقول غير القماشات ؟

هل يوجد قماشات في الامام ؟ و هل قيمة القماشات الوكاله غالية ؟



شاكر لك تعاونك