المشاركة الأصلية كتبت بواسطة بــنــدر
بالنسبة لدقات الي تلقاها علاجها أنه تروح تشتري شريط أو اسطوانة رقية شرعية وتخلي يشتغل
لانها 100 % عين والله يحفظها لك ويحميها ويبارك لك فيها
بالنسبة للاستفسار الأول أنا أغسلها مرتين بالشهر وما صار عندي شيء بالبوية طبعا لون لؤلؤي مدري سكري لون السيارة الي عندي وما لاحظت شيء بالبوية ممكن بالنسبة لك من المادية الي تحطها والله أعلم وانا مو فاهم من الاشياء هذي الي طلعت عندك
بالنسبة للاستفسار الثاني أنا العزل عندي ممتاز جدا وأقصى شيء مشيته فيها 200 أسمع صوت الهوى خارج السيارة مو داخل عندي وخاصة عند المرايات أسمعه لكن يدخل علي ما سمعت وهذا عند سرعة 200 وما أدري عن المادة هذي إذا كانت تأثر أو لا
الاستفسار الثالث بالنسبة للقير تقريبا هو بطيء في الاستجابة عندي خاصة لم أبي أزود السرعة شوي هو على كلامك يفكر ويسوي معادلات ويضرب ويطرح على حسب دعستك للبنزين وبعدين يطبع الناتج ويبدأ يتفاعل معاك بس ما شاء الله يعطيك عزم ممتاز بعد التفكير يعني ما يخطأ في الحسابات وما شاء الله يتأنى قبل لا يتجاوب وخاصة إذا بينزل نمرتين وأعتقد أنه شيء طبيعي فيها السيارة فارهة مو حق قومات يعني بس عزمها ما شاء الله تعطيك
طبعا الاستفسار الرابع عن مثبت السرعة جربته على سرعة 160 وحسيت أنه السيارة تشد وترخي تشد وترخي وهذا على أعتقادي بسبب الهوى الي بالواجهة لم تشد السيارة وتوصل 160 تبدأ هي تخف في ضخ البنزين بس تعرف الهوى الي يواجها بالسرعات العالية يخفف من السرعة فتحس السيارة بالفرق فتقوم تشد وهذا تحصلها 160 - 159-160-159-160-159 لأنه أنا عندي على الشاشة يطلع لي سرعة السيارة بالديجيتل واحيانا يوصل 158 -160 وممكن هذا هو السبب تحس تشد وترخي
وبالنسبة لي المشكلة الوحيدة الي طلعت لي بالسيارة هي صوت زنزنة في الطبلون خاصة لم يبرد الجو بس وقت الظهر يختفي بس بأوديها الوكالة في صيانة 10000 ويصلحونها والآن السيارة ماشية معاي 8300 تقريبا
ومشكور أخوي بلا حدود على موضوعك لأنه تقريبا مطلعين السيارة قريبين من بعض ونفس المستوى عشان استفيد منك وتستفيد مني والله يعم الفائدة على الجميع
أخوك بندر