هذا ما يفعله بعض الشريطية "ترجيع العداد"

[abosaud11]

اخواني الكرام :

انتبهو عند شراء سيارة جديدة فقد اشترى احد الزملاء سيارة من من نوع فور ماركيز سعودي من المعارض

السيارة ماشية 90000 كيلو

المهم راح للوكالة وقال متى اخر مرة سوت السيارة صيانة قلو له قبل 7 شهور وكانت ماشية 120000

فأنظر أين وصلت الذمة ببعض ضعفاء النفوس الذين لا يتحرون الحلال في كسبهم

[HEMI]

اولله مرجعينها اكثر من 30 الف كيلو !!!

هذول طال عمرك حسابهم بالآخره عسير ماهو بيسير

[air]

والله ان اللي يغش الناس والله ان ربي مايوفقه ووالله ان ربي بيسلط عليه واحد يسوي فيه زي ماسوى في الناس والعن والفلوس اللي من بيع السيارة راح تمحق بركتها

[abosaud11]

مشكورين يا شباب على المرور ورفع الموضوع

ما اقول الا حسبنا الله ونعم الوكيل

{ومن يعمل مثقال ذرة خيرا يره @ ومن يعمل مثقال ذرة شرا يره }

[m7zon]

بسم الله الرحمن الرحيم
لازم المسلم يقيم حقوق المكيال والميزان لان الله سبحانه توعد بمواعيد شديده للي يسوون كذا
للأسف غابت الذمه وغاب الضمير
بس ريح بالك 120 الف تعتبر نظيفه مره وان شاء الله يتهنى فيها اخر هنا واخر حلاوه يارب
وهذاك حسابه عند ربه
وماندري من الغلطان يمكن الشريطي شاريها من راعيها الاصلي وراعيها لااصلي لاعب على الشريطي او في امريكا مرجعينها
الله يعلم ياخوك
ربك يعين والله يبارك له وماحصل الا الخير هذي هي الدنيا تغابن في البيع والشراء والمشاعر وكلشيء
ومانقول الا يارب انت حسبنا وحسيبنا ومعيننا

[MGM LS]

حسبي الله ونعم الوكيل فيهم

يارجل مو اول واحد ولا اخر واحد

هذا رد للناس اللي تقول ما يقدرون يغيرون بالعداد العادي

زميلي عنده ماركيز 2000 عداد عادي يارجل يفره بيده فر لو يبي يخليه 0000000 ويمشي من جديد قدر

بس برضو الانسان يخاف ربه وما يسوي أشياء زي هاذي

وماصار إلا الخير وانا خوك

وبالتوفيق ,,,

[abosaud11]

فعلا كلامكم سليم

[m7zon]

لايحترق قلبك في الحسرة
احمدالله على الصحة والعافية والفلوس تجي وتروح والحي يبشر بالحياة الف لاباس وهذي لذعات الدنيا
كلها مسأله وقت وتنتهي بس انت لاتردد هالشيء على نفسك كل ماركبت السياره وتقول هذي اللي انغبنت فيها هذي اللي كذبوا علي فيها..اطرد هالافكار على طول اقنع نفسك بالرضا التام
ياما ناس راحت سياراتهم وراحوا اخوانهم وامهاتهم واهاليهم راحت ارواح وش عاد الحديد كله وسخ دنيا وانا اخوك لاتشيل اية هم وروق بالك بحاضرك الماضي انتهى لايعود الحاضر لك تقدر تسعده او تحزنه المستقبل في غامض علم الله ولامانع من الأماني اللطيفة اللي تروق البال
وإن شاء الله امورك تساهيل ومثل ماقال الشاعر: اللي مضى ياصاحبي (أتركه)(راح) ونــّس لنا في مقبلات الليالي..
اول كان معي سياره وراحت تشليح وتكسرت عظامي وسويت عمليات وتبهذلت ويالله استعدت العافيه وقدرت امشي والسياره انباعت برخيص الفلوس كـ خرده .....لا ولحقتني الملامه وسمعت اللي تحسروا عليها اكثر من سلامتي...وحمدت الله في نفسي ان هالدنيا من جد رخيصه..واقولك حتى استمرينا نقسط فيها حتى بعد ماراحت تشليح..
وإن شاء الله الجاي يكون رحمة ولطف من رب العالمين....
وهذا انا عوضني الله بهالميركوري ولو انه عليها كذا ريكورد من امريكا وقد جتها ضربه في الشاص لاكن مااثرت يعني ضربه بالوجهيه على الشاص كذا..وماقالوا لي الصاله عن هالشيء..ولاكن سليمه ومافيها الا العافيه الحمدلله ولاحزنت .......بالعكس مبسوط ومرتاح وراضي بالقسمة والنصيب وشوفني كلشوي اعدل فيها تعديلات رياضيه ..وافكر بجدّيه واتمنى السوبر شارجر..ودي اخلي هالدلوعه تكون بنت المارودر السفاح..ابو 32 صمام ..استمتع بوقتك ماصار الا الخير اهم شيء انت طيب؟ قل ايه طيب.... ياكثر فرحتنا بسلامتك والله عساك دوم طيّب
تحياتي ...انا رديت فوق بشكل سريع لاكن الحين تفرغت شوي تقبلوا احلى الأمنيات من أخوكم محزون.