ايش الفرق بين : الياباني و الامريكي !!!

[دورفتو]

السلام عليكم ياشباب ....
بعد اخر موضوع لي (( اللي كان يتكلم عن الهوندا اس 2000 )) اتضح لي انه فيه عدة فوارق بين السيارات السبور اليابانيه وبين السيارات السبور الامريكيه ..... طبعا انا مب خبير مثل غالبية الاعضاء هنا لكن هذا سبب فتحي لموضوع جديد علشان استفيد منكم لانه عندي بعض الاسئله واتمنى اللي عندهم فكره عن الموضوع يجاوبوني .....
يعني ابي مقارنه شامله بين السيارات السبورت اليابانيه والسبورت الامريكيه من كل النواحي (( دراق - ثبات في المنعطفات - قوة التوقف - الوزن - قابلية التعديل سواء كان خفيف او قوي - قلة المشاكل - من اللي له هيبيه قوية وتفزع اللي حولك! ......... إلخ ))
طبعا معروف الياباني : سكايلاين - سوبرا - سلفيا - RX-7 & RX-8 - هوندا سفك - هوندا اس 2000 - وايفولوشن - سليكا - ايكلبس
الفريق الامريكي : كاميرو - لومينا اس اس - كورفيت - موستنج - فوكس تيربو - نيون تيربو - (( نستبعد الفايبر لانها غاليه وما أظن احد يقدر يشتريها ))




ياله شباب ..... ابي معلومات عن النوعين في كل شيء (( وما ابي تعصب انا ابي اتعلم ايش الفرق ومنهو الاحسن ))

[سيارة]

والله للأسف ما عندي خبرة في سيارات السبورت .

ونتمني نستفيد من الاعضاء .

[عماد2006]

أنا أقولك

أول شي الياباني خطير فالتعديل وهو أفضل يعني على أقل ريحة تعديل تشوف السياره قلبت طياره

الأمريكي قوي وهو ستوك لكن لعدلته بيكون أقوى لكن موزي الياباني

وبالنسبه لقلة المشاكل الياباني باعتقادي أقل مشاكل

الياباني أخف يعني القومه الصفر لصالح الياباني والخط لصالح الامريكي

أما اللي له هيبه فهو الامريكي وخاصة الصوت يعطيك حماس

أما الثبات ماأدري بس يمكن لصالح الأمريكي

وسرعة التوقف أتوقع الياباني

أتمنى اني أفدتك

وتحياتي لك

[bashar_255]

و الله أخوي انت قاعد تطلب شي أخذ مني 4 سنين عشان أعرف عدة جوانب منه

و بعدين انت لو تلاحظ ان اللي ردو عليك كلهم من القسم الأمريكي و عدم وجود فريق ياباني للرد علينا بيكون ظلم

للعلم اللي متابعين الياباني و تزويده صح ما يطالعو في المحركات اللي انتو صاجينا بها للعلم و يطالعو في محركات ثانية

على العموم الموضوع للآن الردود اللي شفتها ما دون دون دون المستوى المطلوب في موضوع مثل ذا يعني اسمح لي انت تبغي تقارن بين 60 سيارة يابانية مقابل 60 سيارة أمريكية و يجي واحد يقول هذا كذا و ذاك كذا و يتهئ لي ذاك كذا


تبي مقارنة صح خلنا نتكلم على الأساسيات و السمات الرئيسية و خلنا على المحركات أول و خلنا نقول المسمات الموجودة في أغلب المحركات

المحرك الأمريكي :

1. سعة لترية كبيرة .

2. نسبة انضغاط منخفضة .

3. يعتمد على محرك بدون شواحن .

4. قليل التقنية .

5. يعتمد على التورك .

المحرك الياباني :

1. سعة لترية صغيرة .

2. نسبة انضغاط عالية لمحركات الـ N/A

3. تعتمد محركاته الرياضية في أغلب أغلب الأحيان على تيربوهات .

4. عدد دورات محرك عالية .

5. يعتمد كلياً على التقنية .

6. يعتمد على القوة الحصانية .

نستبعد الفايبر لانها غاليه وما أظن احد يقدر يشتريها

الفايبر أرخص من السكاي لاين ، ليش نستبعدها ؟ العربون كل في الفايبر و مقارنته مع السكاي لاين

[لوريل 86]

بصراحة كنت أحب الياباني كثير وكنت ما أحب الأمريكي .. لكن الظاهر أني سأغير رأيي من كلام أخوي / بشّار سواءً في هذا الموضوع أم في مواضيع سابقة له .

[bashar_255]

هذا سؤال انطرح من قبل في المنتدى و انا جاوبت عنه لاكني عدلت بعض الجوانب و زد كلام فيه :


في التزويد يكون عمر المحرك الياباني اقل ويتعب اكثر والصوت مزعج جدا
حتى الحرارة عالية

اما المحركات الامريكية احصنتها عالية وهي مرتاحة

هل هذا الكلام صحيح ؟


أجابة السؤال من وجهة نظر تحتمل الصواب و الخطأ



للإجابة على هذا السؤال علينا مقارنة محركين متشابهين بالقوة واحد يكون أمريكي 8 سلندر و واحد ياباني تيربو 2.0 و 4 سلندر


للمقارنة أرشح 2006 Mitsubishi Lancer Evolution IX لأنه من أكفأ و أقوى المحركات اليابانية الصغيرة
و بالمقابل أرشح محرك الـ Ford Mustang 4.6 2005 لأن عندي له معلومات متوفرة و قوته قريبة من الإيفو

طبعاً القوة و الأرقام كلها لصالح الإيفولوشن لاكن خلنا نحلل الموضوع

محرك الإيفو 286 حصان على 6500 دورة بالدقيقة اما العزم فهو 289 رطل في 3500 دورة بالدقيقة و الردلاين هو 7000 دورة
محرك الستانج 300 حصان على 5750 دورة بالدقيقة و العزم هو 320 رطل في 4500 دورة بالدقيقة و الردلاين هو 6250 دورة

أول نقطة

لو تلاحظ هنا انه محرك الإيفو طلع 289 رطل مقابل 320 رطل للموستنج ولاكن
الموستنج على 3500 دورة كم رطل يجيب؟ أنا عندي مجلة موستنج عليها دبات ماجنا فلو و الداينو شيت على شكل أرقام جايب على 3500 دورة 284.9 رطل

كل ما كان المحرك أكبر كل ما كان كسب العزم أسهل


ثاني نقطة :

محرك الإيفولوشن ضغط التيربو هو 19psi و هو ضغط عالي لاكن بالنهاية نسبة الإنضغاط هي 8.8:1 و بإضافة التيربو كم بتصير يعني ؟ ( بصراحة ما عندي فكرة ) بس مهما يكون ما تتعدى الـ 11-11.5 أكيد

محرك الموستنج نسبة انضغاط السلندر فيه هي 9.8:1

التيربو هنا يعوض عن أن المكينة صغيرة فيعالجها بالتيربو لأن المعادلة هي ان كل 1 بار ( 14.7 psi ) تضيفها للمحرك تعادل زيادة لترية بحجم المحرك

اضافة تيربو الى المحرك يعادل اضافة سعة للمحرك عن طريق الستروكر

تعددت الطرق و الهدف واحد ، القوة الحصانية

بالنسبة للتيربو فإنه ما يقصر من عمر المكينة و ما يعمله هو ضغط الأنتيك بس يفتح البلف في الراس يدخل الهوا للسلندر يفتح بلف الإكزوست يطلع الهوا و خلصت العملية

لاكن تخيل أن محرك ريس ضغطه 13 بيعيش مثل محرك الموستنج الـ 82 اللي ضغطه 8.3:1 ؟؟

مستحيل المحرك ذا اللي ضغطه 13 طول ما هو شغال و هو يضرب في الأذرعة و الأذرعة تضرب في الكرنك و البساتن ماخذة حقها من الضرب

بينما محرك ضغطه 9.1:1 مثلاً مثل محرك الموستنج 5.0 من 87 الى 95 فتلاقيه يعيش فترة طويلة و حتى اذا انعدم من سؤ الإستعمال تفك المكينة ما تبدل غير البساتم ( عندي ذراع موستنج 5.0 مطعوج بالغرفة )

الضغط محد أساسي لعمر المحرك


طب أحين عندنا سيارة مصممة أن الرد لاين تبعها هو 6250 دورة مثل الموستنج و يجي واحد مثل بشار و يحط عليها كام محترم و طقم روكرات و يجهز الراس حق يخش الى 8000 دورة و كل شي تمام

أكيد المكينة بتتعب و هناك عدة أسباب منها أن ثقالة الكرنك شد بلادها هي جاية عشان ترصص الكرنك بيحيث ما يرج لي على دورات عالية لاكنها غير مهئة الى دورات فوق الـ 6000 فأكيد الكرنك بيرج و يمكن يشلخ لي السلندر و بهذه الحالة يلزمني ثقالة من شركة محترمة عشان ما تحصل هالسلبيات و لحماية البلوك " السلندر" و ممكن اطر أضيف سبايك من نوعية و يمكن اغير الكرنك لاكن لسا فيه سلبيات أنه يحك في جدران السلندر أسرع من قبل .

طبعاً هذا أنا قاعد اتكلم عن فرق 2000 دورة و لك أن تتخيل أن محركات الموستنج يوصل بعضها في الدراق الى 12000 دورة و أكثر فدقة السلف محسوبة عليهم


سرعة المحرك أيضاً من المحددات الأساسية لعمرها الإفتراضي


بالنسبة لوزن القطع الداخلية للمحرك و هذا الشي المهم

كل ما صارت القطع أصغر و أخف كل ما كان المحرك يجيب عزمه أسرع

للملاحظة أن أغلب سيارات الدراق يركب لك ستروكر أغلب قطعه ألمنيوم من أذرعة و كرنك و بساتن بس البلوك حديد و السبب أن الحديد يستحمل أكثر نت الألمنيوم

لاكن

اذا جا الستروكر معمول ألمنيوم و بطريقة التصنيع فور جد / بولت
فور جد : جمع برادة ناعمة للمادة اللي بنصنع منها و نضغطها بدرجة حرارة عالية لتشكل القالب المطلوب شكلاً
بولت : نحت قالب من المادة المطلوبة لتشكل الشكل المطلوب

هذي أقوى طريقة لتصنيع المواد في السيارة و اذ جا بهذه الطريقة المكلفة $$$ أكيد بيستحمل الشي الكثير

الـ 4 سلندر كله قطعتين داخل المحرك فتلاقيه أسرع في العزم أغلب الأحيان ( على حسب وزن المواد )

وزن القطع الداخلية للمحرك ( كرنك أذرعة بساتم ) له علاقة مباشرة في العزم


بالنسبة الى جانب الإلكتروني فأغب السيارات اليابانية يتمركز تزويدها حول الكمبيوتر و عيارات البنزين و انجكترات كلام معقد يفرق كثير

بينما المحرك الأمريكي انت مع واحد من الشباب جاي يقولك بنزود الموتر ثاني أسبوع يحط لك كام تقول له سويت برمجة يقول لك ما يحتاج ثالث أسبوع تلاقيه جاي مركب بكرات و فلاي ويل و ثلاجة تقول له سويت برمجة يرد عليك لسا آخر الشهر يمر عليك مقبع الكمبيوتر و الظفيرة و البخاخات و مركب كربريتر

السر أن البرمجة للمحرات الصغيرة ( التيربو بالذات ) ضرورية لأن كل القطع داخل المكينة على قولة دكتورنا ( يتبع نسقاً متسقا !! ) و أي تغيير ما بتحس بذاك الفرق الا اذا جيت و برمجت الموتر و مع كل برمجة تحس الموتر فيه روح جديدة .

محركات التيربو تحتاج الى برمجة دقيقة


فيما سبق تبين أن لكل محرك ايجابياته و سلبياته فالمحركات الصغيرة أسرع في العزم و أخف لاكن قدراتها محدودة و هندستها صعبة و مكلفة أما المحركات الكبيرة فهي سهلة و تكلفتها قليلة لأنها لا تحتاج الى تلك الجودة في التصنيع و هذي سموها مقارنة بين المحركات الغبية و الذكية

[kuwait]

أتورط صاحب الموضوع

[لوريل 86]

جزاك الله خير أخوي / بشّار على الشرح ... خلاص أنا صرت أحب المحركات الأمريكية .